’صحافت آج بھی قید ہے‘

انیس سو اٹھہتر ضیاالحق مارشل لاء اپنی فسطائی فرعونی طاقت کے ساتھ ملک پر سایہ فگن تھا۔ بولنے لکھنے اور اظہار رائے کے آزادی سلب کر لی گئی تھی۔

ہر طرف ہو کا عالم تھا۔جو بولتا تھا اٹھالیا جاتا تھا فوراً سزا سنا دی جاتی۔ ’ایک سال قید دس کوڑے‘۔ اگلے لمحے سزا پر عملدرآمد ہو جاتا۔

چودہ سال کے بچے سے لیے کر اسی سال کے بوڑھے سیاسی آزادیوں، آئین کی بحالی اور پریس کی آزادی کے جابر آمرکے سامنے سینہ سپر تھے۔ ایک اندازے کے مطابق تیس ہزار سے زائد سیاسی کارکنوں، دانشوروں، صحافیوں، کسانوں، مزدوروں کو کوڑوں کی سزائیں دی گئیں۔
مسعود اللہ خان نے گرج دار آواز میں کہا ہاں تم ہمارے سامنے ہتھیار نہیں ڈالو گے تم تو جنرل اروڑہ کے سامنے ہتھیار ڈال سکتے ہو۔

ناصر زیدی

ضیاالحق کی آمریت میں سب سے پہلا وار صحافت پر اگست 1977 میں کیا گیا پاکستان ٹائمز سے خواجہ آصف، مہناج برنا اور ایچ کے برکی کو برطرف کر کے کیا۔ بعد میں کراچی، حیدرآباد ، لاہور، ملتان میں ترقی پسند صحافیوں کو برطرف کیا گیا۔

جب آوازِ خالق خاموش نہ ہو سکی تو سندھ اور پنجاب میں اخبارات اور جرائد کو بند کر دیا گیا۔ سینکڑوں صحافی برطرف کر دیئے گئے۔ اخبارات پر سنسر شپ نافذ کر دی گئی۔ یہاں تک قرآن کی آیات کی بھی سنسر کیا جانے لگا۔

تیرہ مئی کا دن، لاہور کی گرمی اپنے جوبن پر تھی۔ ہمیں کیمپ جیل سے سینئر صحافیوں کے ہمراہ سمری ملڑی کورٹ لے جایا گیا۔ اسلم شیخ، سلیم عاصمی، علی احمد خان، نثار عثمانی اور تیس صحافیوں کو گروپ زنجیرؤں میں جکڑا دھوپ میں گھنٹوں عدالت میں سماعت شروع ہونے کا انتظار کرتا رہا۔ آخر چار چار کے گروپ میں سماعت شروع ہوئی اور دس پندرہ منٹ کے اندر فیصلے سنائے جانے لگے۔ نو ماہ قید بامشقتت، ایک سال قید بامشقت۔ جس کو نوماہ سزا ہوتی تھی وہ ایک سال سزا والے کو رشک سے دیکھتا تھا۔ ’یار تم تو ہم سے آگے نکل گئے۔‘

ہماری باری آئی۔میں خاور نعیم ہاشمی مسعود اللہ خان اور اقبال جعفری، ہمیں عدالت کے سامنے پیش کیا گیا۔ ہم سب کو ہتکھڑیاں لگی ہوئی تھیں۔ جیسے ہی ہم اندر داخل ہوئے ایک موٹا سا میجر فوراً کھڑا ہو گیا۔ دوسرے فوجی نے قرآن آگے کیا۔ میجر قرآن پر ہاتھ رکھ کر بولتا ہے ’میں خدا کو حاضر ۔۔۔۔‘ ابھی وہ اتنا ہی کہہ پایا تھا کہ خاور نعیم ہاشمی کی نحیف سی آواز آئی ’ٹھہریے! یہ تماشا کرنے کی کیا ضرورت ہے تم نے سزا دینی ہے دے دو۔‘

’عدالت‘ کو غصہ آ گیا اُسے یہ بات ناگوار گزری فوراً ن چیخ کر بولا ’تم سمجھتے ہو ہم تم صحافیوں کے سامنے ہتھیار ڈال دے گا ایسا ہرگز نہیں ہوگا۔‘
آزادی صحافت اور اپنے جائز معاشی حقوق کے لیے اٹھائی جانے والی آوازوں کو دبا دیا جاتا ہے

ہم میں سے ایک گرجدار آواز گونجی ’ہاں تم ہمارے سامنے ہتھیار نہیں ڈالو گے تم تو جنرل ارورہ کے سامنے ہتھیار ڈال سکتے ہو۔‘ میں نے مڑ کے دیکھا یہ ہمارے سینئر دوست مسعود اللہ خان کی آواز تھی۔ عدالت برخاست کر دی گئی۔ پانچ منٹ بعد پیشی کے لیے آواز پڑی، اندر گئے میجر صاحب فیصلہ سنانے لگے۔ ’مسعود اللہ خان پانچ کوڑے، نو ماہ قید بامشقت، ناصر زیدی پانچ کوڑے، نو ماہ قید بامشقت، خاور نعیم ہاشمی، چار کوڑے چھ ماہ قید بامشقت، اقبال جعفری تین کوڑے نو ماہ قید بامشقت، فیصلہ سنانے کے بعد عدالت برخاست کر دی گئی۔

ہم باہر آئے تمام ساتھی انتظار میں تھے۔ ہم نے پرجوش انداز میں ساتھیوں سے یک زبان ہو کر کہا ہمیں کوڑے بھی پڑیں گے۔
حال ہی میں اسلام آباد میں آزادیِ صحافت کے عالمی دن کے موقعہ پر 35 صحافیوں کو گرفتار کر لیا گیا تھا

جب کورٹ سے ہمیں جیل لے جا رہے تھے تو ہمارے علاوہ گروپ کے تمام ساتھیوں کو کیمپ جیل اتار دیا گیا اور ہمیں کوٹ لکھپت جیل لے جایا گیا۔ روٹین کی کارروائی سے فارغ ہو کر جیسے ہی جیل کی ڈھوڑی میں داخل ہوئے سامنے پہلوان نما انسان لنگوٹ کسے، کوڑے لہرا رہا تھا اور جیل کے قیدی گھیرے کی شکل ٹکٹکی کے چاروں طرف بیٹھے تھے۔ ایک کپتان سزا پر عملدرآمد کے لیے وہاں موجود تھا۔ مسعود اللہ خان معذور تھے لیکن اصرار کرتے رہے ’یار منوں وی کوڑے مارو نا۔‘ لیکن ڈاکٹر نے کہا کہ انہیں کوڑے مارنا ’رسکی‘ ہو گا۔

ہم باری باری ٹکٹکی پر باندھے گئے، اس طرح کہ بالکل برہنہ تھے اور ہماری پشت کے نیچے پنسل سے نشان لگا کر ایک کے بعدایک کوڑا مارتے رہے۔ زخم بنتے گئے۔ ہم سوچتے رہے کیا یہی وہ آزادی تھی جس کے لیے ہمارے بزرگوں نے جدوجہد کی؟ ہمارا خواب ٹوٹ گیا۔

آزادی کا سفر جاری رہا۔ پریس پر پڑی زنجیروں کے خلاف جدوجہد کا سفر آج بھی جاری ہے۔ نثار عثمانی مرحوم نے لاہور میں ضیاالحق کی پریس کانفرنس کے دوران کہا تھا ’جنرل صاحب سن لیجیے ! آپ پھانسی پر لٹکا سکتے ہیں لیکن آنے والی نسلیں ہمارا علم بلند رکھیں گی لیکن تمارا نام و نشان بھی نہ ہوگا۔‘

آج بھی پریس پر پابندیاں ہیں۔ لیکن کیونکہ دنیا بدل گئی اس لیے پابندیوں کے طور طریقے بدل گئے ہیں۔ اخبارات پہلے ’نظر آنے والی ایڈوائس‘ پر عمل کرتے تھے اب ’نظر نہ آنے والی‘ پابندیوں میں جکڑے ہوئے ہیں۔ قلم کار اپنے جائز حقوق، ویج ایوارڈ کے لیے آواز حق بلند کئِے ہوئے ہیں۔ ناپسندیدہ ایڈیٹر مالکان پر دباؤ ڈال نکلوا دیے جاتے ہیں۔
سرکاری اہلکار بڑی ڈھٹائی سے آزادیِ صحافت کے دعوے کرتے ہیں

صحافیوں کی تحقیقاتی رپورٹنگ پر قانون کی گرفت مضبوط ہے، جلسہ عام میں مرد آہن صحافیوں کو دھمکیاں دیتا ہے تند و تیز لکھنے والوں پر اپنے ہی اخبار میں لکھنے کی پابندی ہے۔ پریس کے کالے قوانین اپنی بھیانک شکل میں موجود ہیں۔ ہتک عزت کا قانون ( Defemation Law ) آزادیِ اظہار پر نئی تلوار ہے۔ کچھ نہیں بدلا۔ صحافت کل بھی قید تھی، آج بھی قید ہے۔ آج بھی صحافی آزادیِ صحافت کے لیے سینہ سپر ہیں۔