Saturday, 22 January, 2005, 09:48 GMT 14:48 PST

کوئٹہ میں دھماکہ، ٹرینیں متاثر

کوئٹہ میں سنیچر کی صبح بلوچستان یونیورسٹی کے قریب ایک زوردار بم دھماکہ ہوا جس کے نتیجے میں بعض ٹرینوں کی آمد و رفت متاثر ہوئی ہے۔

اس دھماکہ کے نتیجے میں بلوچستان یونیورسٹی کے احاطے سے گزرنے والی ریلوے کی پٹری میں چار فٹ گہرا گڑھا پڑ گیا تاہم کوئی جانی نقصان نہیں ہوا ہے۔

بلوچستان یونیورسٹی میں آج کل عیدالاضحی کی تعطیلات ہیں۔

فرانسیسی خبررساں ایجنسی اے ایف پی سے بات کرتے ہوئے صوبائی وزیر داخلہ شعیب نوشیروانی نے دھماکے کے لئے ’دہشت گردوں‘ کو ذمہ دار ٹھہرایا۔

ان کا کہنا تھا: ’وہ دہشت گرد ہیں۔ انہوں نے عید کی تعطیلات کا فائدہ اٹھاتے ہوئے ریلوے کی پٹری پر بم نصب کرکے لوگوں کی مشکلات پیدا کیں۔‘

دھماکے کے فوری بعد ریلوے کے حکام نے کوئٹہ آنے اور جانے والی ٹرینوں کی آمد و رفت بند کردی گئی۔ لیکن ریلوے کی پٹری کی مرمت کے بعد ٹرینوں کی آمد و رفت بحال کردی گئی ہے۔

دھماکے کی وجہ سے بعض ٹرینوں کی آمد و رفت چند گھنٹوں کے لئے متاثر ہوئی۔ پولیس کے حکام نے نامعلوم افراد کے خلاف مقدمہ درج کرلیا ہے اور تحقیقات شروع کردی ہیں۔

کسی تنظیم نے اس واقعے کی ذمہ داری قبول نہیں کی ہے۔ حالیہ مہینوں میں سوئی گیس کے معاملے سے بلوچ قوم پرست تنظیمیں سرگرم ہیں۔