Friday, 14 January, 2005, 16:43 GMT 21:43 PST

امریکی کانگرس کے ارکان وانا میں

پاکستان کے قبائلی علاقے جنوبی وزیر ستان کے صدر مقام وانا میں امریکی کانگرس کے ایک چھ رکنی وفد نے قبائلی سرداروں سے ملاقات کی ہے اور انہیں علاقے کی ترقی کے لیے بھر پور امداد کی یقین دہانی کرائی ہے۔

وانا سے ایک قبائلی سردار محمد جمیل نے بی بی سی اردو سروس کو بتایا ہے کہ جمعہ کو ہمیں پاکستانی فوج کی طرف سے حکم ملا تھا کہ جی او سی پشاور آپ سے ملنے کے لیے آ رہے ہیں۔

انہوں نے کہا کہ جب ہم ملاقات کے لیے پہنچے تو وہاں امریکی کانگرس کے چھ ارکان بھی جی او سی پشاور کے ہمراہ آئے ہوئے تھے۔

محمد جمیل نے کہا کہ قبائلی سرداروں نے علاقے کی پسماندگی کا ذکر کرتے ہوئے ان سے سکول کالج اور سڑکوں کی تعمیر کے بارے میں کہا۔

انہوں نے کہا کہ قبائلی سرداروں نے علاقے میں روز گار مہیا کرنے کے لیے علاقے میں چمڑے اور پھلوں کو محفوظ بنانے کے کارخانے لگانے کی تجویز بھی پیش کی۔

انہوں نے کہا کہ امریکی کانگرس کے ارکان نے یقین دلایا ہے کہ علاقے کے لوگوں کو جس چیز کی ضرورت ہوگی وہ مہیا کی جائے گی اور علاقے کی ترقی کے لیے ضروری وسائل بھی مہیا کیے جائیں گے۔

جب ان سے پوچھا گیا کہ کیا علاقے میں شدت پسندوں اور مبینہ القاعدہ کے ارکان کے بارے میں کوئی بات نہیں ہوئی تو انہوں نے بتایا کہ امریکی کانگرس کے ارکان نے دہشت گردوں کے حوالے سے سوالات کیے تھے۔ انہوں نے کہا کہ قبائل سرداروں نے وفد کو بتایا کہ فوجی آپریشن کے دوران بہت سے شدت پسند اور غیر ملکی مارے گئے ہیں اور بہت سے علاقہ چھوڑ کر چلے گئے ہیں۔

انہوں نے کہا کہ وانا کا قبائلی علاقہ اب شرپسندوں اور غیر ملکی شدت پسندوں سے بالکل صاف ہے۔