Sunday, 18 July, 2004, 11:26 GMT 16:26 PST

فوجی گاڑی تباہ: تین گرفتاریاں

ایک فوجی گاڑی کو بارودی سرنگ سے اڑانے کے الزام میں ترکی خیل وزیر قبائل سے تعلق رکھنے والے تین افراد کو گرفتار کر لیا گیا ہے۔ اس فوجی گاڑی کو ایک ہفتہ قبل کازا پنگا کے علاقے میں ایک پہاڑی مورچے کے لئے پانی لے جانے کے وقت اڑا دیا گیا تھا۔ اس حملے میں چھ فوجی زخمی ہو گئے تھے۔

یہ گرفتاری اجتماعی ذمہ داری کے تحت ہوئی۔ اجتماعی ذمہ داری کے تحت اگر کسی کی زمین سے کسی سرکاری اہلکار پر حملہ ہو جائے تو اس کی ذمہ داری زمین کے مالک پر عائد ہوتی ہے۔

اس کے علاوہ کل رات شکئ ہائی اسکول میں تعینات فوجیوں پر مارٹر اور میزائیل کے کئ حملے ہوئے جو نشانے پر نہ لگے۔ فوج نے جوابی کارووائی میں وانا کی فوجی کالونی اور تیارزہ قلعہ کے مذکورہ علاقے کو توپوں کے گولوں کا نشانہ بنایا۔

فوج کے یہ کارووائی ساری رات اور آج دن کو وقفے وقفے سے جاری تھی۔ اس کاروائی میں ابھی تک کسی کے ہلاک یا زخمی ہو نے کی تصدیق نہیں کی۔