Thursday, 24 June, 2004, 19:56 GMT 00:56 PST

بھارت کے بیان کا خیرمقدم

پاکستان نے بھارت کے وزیر اعظم کی طرف سے دونوں ممالک کے درمیان مذاکرات کے ذریعے مسائل کے حل کے بارے میں دیئے گئے بیان کا خیر مقدم کیا ہے۔

وزارت خارجہ کے ترجمان مسعود خان نے کہا ہے کہ پاکستان کی اس بیان سے حوصلہ افزائی ہوئی ہے اور وہ بھی کشمیر سمیت تمام مسائل کا مذاکرات کے ذریعے حل چاہتا ہے۔

انہوں نے امید ظاہر کی کہ آئندہ ہفتے دونوں ممالک کے وزراہ خارجہ کے درمیان ہونے والی ملاقات کا مثبت نتیجہ نکلے گا۔

بھارت کے وزیر اعظم منموہن سنگھ نے جمعرات کو ٹیلی ویژن پر اپنے خطاب میں کہا تھے کہ ان کی حکومت پاکستان کے ساتھ مذاکرات میں مخلص ہے۔ انہوں نے اس بات کی بھی تنبیہ کی کہ ’دہشت گردی اور تشدد‘ سے مذاکرات متاثر ہو سکتے ہیں۔