Saturday, 29 May, 2004, 05:31 GMT 10:31 PST

غوری میزائل کا ایک اور تجربہ

پاکستان نے درمیانے فاصلے تک مار کرنے والے میزائل حتف پانچ کا کامیاب تجربہ کیا ہے جو جوہری ہتھیار لے جانے کی اہلیت رکھتا ہے۔

اس میزائل کا تجربہ ہفتے کو ایک نامعلوم مقام سے کیا گیا۔

پاکستان کی طرف سے یہ تجربہ بھارت میں نئی حکومت قائم ہونے کے صرف ایک ہفتے بعد کیا گیا ہے۔

پاکستانی فوج کے ترجمان نے بتایا کہ بھارت کی حکومت کو حتف میزائل کے اس تجربے سے پہلے اطلاع کر دی گئی تھی۔

میجر جنرل شوکت سلطان نے بتایا کہ ’ہم اپنے میزائلوں کی کارکردگی بہتر بنانا چاہتے ہیں اور آج کا تجربہ اسی سلسلے کی ایک کڑی ہے۔‘

انہوں نے خبر رساں ادارے اے پی کو بتایا کہ حتف میزائل نے اپنے ہدف کو نشانہ بنانے سے پہلے نو سو کلومیٹر کا فاصلہ طے کیا۔

انہوں نے کہا کہ پاکستان نے اس تجربے سے قبل اپنے ہمسایوں کو آگاہ کر دیا تھا۔

پاکستان کہتا ہے کہ اس کا ہتھیاروں کا پروگرام بھارت کے ایسے ہی پروگرام کا ایک جواب ہے۔

حتف پانچ میزائل پاکستان کے غوری میزائلوں کی سیریز کا ایک حصہ ہے۔

پاکستان نے انیس سو اٹھانوے سے غوری میزائلوں کے کئی تجربات کیے ہیں۔