Sunday, 02 January, 2005, 08:41 GMT 13:41 PST

عراق: اٹھارہ نیشنل گارڈ ہلاک

عراق میں ایک کار بم دھماکے میں عراقی نیشنل گارڈ کے اٹھارہ اہلکاروں سمیت انیس افراد ہلاک ہو گئے ہیں۔ حملے میں چھ اہلکار زخمی بھی ہوئے۔

امریکی فوج کے ایک ترجمان کے مطابق یہ دھماکہ بغداد کے شمال میں بلد شہر میں عراقی سیکیورٹی دستوں کی ایک بس کے پاس ہوا۔ بلد بغداد سے آٹھ کلومیٹر کے فاصلے پر ہے۔

بغداد میں بی بی سی کے نامہ نگار کے مطابق یہ حالیہ دنوں میں امریکی اور عراقی فوجیوں پر ہونے والے سب سے سے زیادہ جان لیوا حملوں میں سے ایک تھا۔

عراق میں تیس جنوری کو انتخابات سے قبل مزاحمت کاروں کے حملوں میں تیزی آئی ہے۔ انتخابات کے دوران عراقی پولیس اور نیشنل گارڈ تحفظ فراہم کرنے کی ذمہ دار ہیں۔