فوجی گیرژن میں گنتی کا مرکز

کابل کے نواح میں واقع قصر دارالامان میں اردوئے ملّی یا افغان فوج کے گیرژن میں افغانستان کے مختلف علاقوں کے علاوہ پاکستان اور ایران سے آنے والے بیلٹ پیپرز کی گنتی کے لیے مرکز قائم کیا گیا ہے۔

سیکورٹی خدشات کے پیش نظر پہاڑوں کے دامن میں واقع اس مقام کا انتخاب کیا گیا ہے۔

صبح تقریباً نو بجے سے فوجی ٹرکوں پر کابل کے اطراف سے بیلٹ باکس آنا شروع ہوگئے تھے۔

قصرِ دارالامان، غازی امان اللہ کا محل تھا جو اب کھنڈر بن چکا ہے اور اس کے پیچھے واقع سویت یونین کا فوجی اڈہ جنگی طیاروں، ہیلی کاپٹروں، ٹینکوں اور بکتر بند گاڑیوں کے قبرستان کا منظر پیش کرتا ہے۔

نیپال سے تعلق رکھنے والے کاؤنٹر سینٹر کے ریجنل منیجر سوبودائے ساہا نے بتایا کہ یہاں آٹھ کاؤنٹنگ ہال مختص کیے گئے ہیں جن میں سے ایک پاکستان اور ر ایک ایران میں ڈالے جانے والے ووٹوں کی گنتی کے لیے استعمال ہوگا۔

جبکہ باقی چھ افغانستان کے مختلف علاقوں کے سے موصول ہونے والے صندوقوں میں موجود ووٹوں کی گنتی کے لیے استعمال ہوں گے۔ ان کا کہنا تھا کہ پاکستان اور ایران سے آنے والے باکس ہیلی کاپٹروں کے ذریعے لائے جائیں گے اور توقع ہے کہ پیر منگل تک پہنچ جائیں گے۔