عمران خان نے آرمی چیف کو پیغام دیا ہے کہ اگر آپ سمجھتے ہیں ہم ٹوٹ جائیں گے تو یہ آپ کی غلط فہمی ہے: علیمہ خان

لائیو کوریج

1. 16 ستمبر 2025’ٹیرف کا مہاراجہ‘: انڈیا کی تجارتی پالیسیاں امریکہ کے لیے نقصان دہ ہیں، صدر ٹرمپ کے مشیر کا الزام

   امریکی صدر ڈونلڈ ٹرمپ کے مشیر برائے تجارتی امور پیٹر ناوارو نے انڈیا کو ’ٹیرف کا مہاراجہ‘ قرار دیتے ہوئے الزام لگایا ہے کہ انڈیا کی تجارتی پالیسیاں امریکہ کے لیے نقصان دہ ہیں۔

   پیر کے روز سی این بی سی انٹرنیشنل کو دیے گئے ایک انٹرویو میں ناوارو نے الزام لگایا کہ انڈیا امریکہ کے ساتھ غیر منصفانہ تجارت کر کے پیسہ کماتا ہے جس کی وجہ سے بہت سے امریکیوں کو نقصان اٹھانا پڑتا ہے۔ ’وہ (انڈیا) اسی رقم سے روسی تیل خریدتے ہیں، اور روسی اس رقم کو ہتھیار خریدنے میں استعمال کرتے ہیں۔‘

   ان کا مزید کہنا تھا کہ ایک طویل عرصے سے چین انڈیا کے لیے ایک سنگین خطرہ رہا ہے، ’اس لیے مودی کو چین [کے صدر شی جن پنگ] اور پوتن کے ساتھ سٹیج پر دیکھنا کافی دلچسپ تھا۔ مجھے نہیں لگتا کہ مودی وہاں پر کمفرٹیبل تھے۔‘

   صدر ٹرمپ کے تجارتی مشیر کا یہ بیان ایسے وقت میں سامنے آیا ہے جب انڈیا اور امریکہ کے درمیان تجارت کو لے کر تناؤ پایا جاتا ہے۔ گذشتہ ماہ امریکہ نے انڈیا سے مصنوعات کی درآمد پر 50 فیصد تک ٹیرف عائد کر دیا تھا۔

   انڈیا نے امریکی کی جانب سے ٹیرف کے نفاذ کو ’غیر منصفانہ اور ناقابل عمل‘ قرار دیتے ہوئے کہا تھا کہ اپنے 140 کروڑ شہریوں کا مفاد مدِ نظر رکھتے ہوئے اسے جہاں سے بھی سستا تیل ملے گا، وہ خریدے گا۔

   تاہم اب دونوں ممالک کے درمیان تجارتی مذاکرات ہونے جا رہے ہیں جس کی وجہ سے حالیہ کشیدگی میں بہتری کی توقع کی جارہی ہے۔

   جنوبی ایشیا کے لیے امریکی تجارتی نمائندے برینڈن لنچ منگل کو ایک روزہ دورے پر نئی دہلی پہنچ رہے ہیں۔

   لنچ کا یہ دورہ دونوں ممالک کے درمیان تجارتی مذاکرات کا حصہ ہے اور اس کے ذریعے انڈیا اور امریکہ کے درمیان موجود تجارتی تعطل کو ختم کرنے کی کوشش کی جائے گی۔

2. 16 ستمبر 2025گدو اور سکھر بیراج پر اونچے درجے کا سیلاب، 24 گھنٹوں میں سندھ میں 3,522 افراد محفوظ مقامات پر منتقل

   سندھ کے سینیئر وزیر شرجیل انعام میمن کا کہنا ہے کہ گدو اور سکھر بیراج کے مقام پر اونچے درجے جبکہ کوٹری پر نچلے درجے کا سیلاب ہے۔

   شرجیل میمن کا کہنا ہے کہ گدو کے مقام پر پانی کا بہاؤ چھ لاکھ 24 ہزار کیوسک جبکہ سکھر پر پانی کا بہاؤ پانچ لاکھ 60 ہزار کیوسک ہے۔ کوٹری پر پانی کی آمد 284,325 کیوسک اور اخراج 273,170 کیوسک ہے۔

   سینیئر وزیر کا کہنا ہے کہ گذشتہ 24 گھنٹوں کے دوران صوبے بھر میں 3,522 افراد کو محفوظ مقامات پر منتقل کیا گیا ہے۔ ان کا کہنا تھا کہ اب تک 173027 کو محفوظ مقامات پر منتقل کیا جا چکا ہے جن میں سے 469 افراد اب بھی ریلیف کیمپس میں مقیم ہیں۔

   ان کا مزید کہنا ہے کہ صوبے بھر میں 183 فکسڈ اور موبائل ہیلتھ سائٹس کام کر رہی ہیں جہاں اب تک تقریباً 93 ہزار افراد کو امداد فراہم کی جا چکی ہیں۔

3. 16 ستمبر 2025امریکہ کا مبینہ طور پر منشیات کی سمگلنگ میں ملوث وینزویلا کی ایک اور کشتی تباہ کرنے کا دعویٰ، تین افراد ہلاک

   امریکہ کے صدر ڈونلڈ ٹرمپ کا کہنا ہے کہ امریکی فوج نے بین الاقوامی سمندری حود میں وینزویلا کے منشیات کے ایک مبینہ جہاز کو تباہ کر دیا ہے جس کی منزل امریکہ تھی۔

   ڈونلڈ ٹرمپ کا کہنا تھا کہ ’منشیات کی سمگلنگ میں ملوث پرتشدد کارٹلز‘ پر حملے میں تین افراد مارے گئے ہیں۔ امریکی صدر کی جانب سے اس بات کا کوئی ثبوت فراہم نہیں کیا گیا کہ نشانہ بنائی جانے والی کشتی منشیات لے کر جا رہی تھی۔

   امریکی صدر کے بیان سے کچھ دیر قبل وینزویلا کے صدر نکولس مادورو نے کہا تھا کہ ان کا ملک کسی بھی قسم کی امریکی ’جارحیت‘ کے خلاف اپنا دفاع کرے گا۔

   دونوں ممالک کے درمیان کشیدگی میں اس وقت اضافہ ہوا جب رواں ماہ کے آغاز میں امریکی جنگی بحری جہازوں نے انسداد منشیات کی کارروائیوں کے دوران مبینہ طور پر منشیات کی سمگلنگ کی کوشش میں ملوث ایک کشتی کو تباہ کرنے کا دعویٰ کیا تھا۔ اس کارروائی کے نتیجے میں 11 افراد ہلاک ہو گئے تھے۔

   صدر ٹرمپ نے اپنے سوشل میڈیا ویب سائٹ ’ٹروتھ سوشل‘ پر جاری ایک پیغام میں لکھا کہ ان کے حکم پر امریکی فوجی دستوں نے منشیات کی سمگلنگ میں ملوث کارٹلز پر دوسرا حملہ کیا ہے۔

   ’منشیات کی سمگلنگ میں ملوث یہ انتہائی پرتشدد کارٹلز امریکی قومی سلامتی کے لیے خطرہ ہیں۔‘

   اس پوسٹ کے ساتھ ایک تقریباً 30 سیکنڈ کی ویڈیو بھی جاری کی گئی ہے جس میں ایک کشتی کو دھماکے سے پھٹتے دیکھا جا سکتا ہے۔

   بعد ازاں اوول آفس سے میں بات کرتے ہوئے ڈونلڈ ٹرمپ کا کہنا تھا کہ امریکہ کے پاس واضح ثبوت ہیں کہ یہ کشتیاں منشیات کے دہشت گرد گروپوں کی تھیں۔

4. 16 ستمبر 2025حماس کے رہنما جہاں بھی ہوں گے، انھیں نشانہ بنایا جائے گا: اسرائیلی وزیرِ اعظم نیتن یاہو

   اسرائیل کے وزیرِ اعظم بنیامن نیتن یاہو نے قطر میں گذشتہ ہفتے کے حملے کے بعد حماس کے رہنماؤں پر مزید حملوں کا امکان مسترد نہیں کیا ہے، اور کہا ہے کہ وہ جہاں بھی ہوں گے، انھیں چھوڑا نہیں جائے گا۔

   پیر کے روز یروشلم میں امریکی وزیر خارجہ مارکو روبیو کے ساتھ پریس کانفرنس سے خطاب کرتے ہوئے نیتن یاہو کا کہنا تھا کہ ہر ملک کو اپنی سرحدوں سے باہر بھی اپنے دفاع کا حق حاصل ہے۔‘

   قطر میں حماس کے رہنماؤں کو نشانہ بنانے کے اسرائیل کے فیصلے پر اسے نہ صرف بین الاقوامی برادی کی جانب سے غم و غصے بلکہ اپنے سب سے بڑے اتحادی امریکہ کے صدر ڈونلڈ ٹرمپ کی طرف سے تنقید کا بھی سامنا کرنا پڑا تھا۔ حماس کا کہنا ہے کہ گذشتہ ہفتے کے اسرائیلی حملے میں چھ افراد مارے گئے تھے لیکن اس کے رہنما بچ گئے۔

   نیتن یاہو کے اس بیان سے محض ایک روز قبل وائٹ ہاؤس نے بتایا تھا کہ صدر ٹرمپ نے قطر کو یقین دہانی کرائی ہے کہ ’ان کی سرزمین پر ایسا دوبارہ نہیں ہوگا۔‘

   جب ان سے پوچھا گیا کہ آیا امریکہ اس حملے میں کسی طرح سے ملوث تھا تو نیتن یاہو نے صحافیوں کو بتایا کہ ’ہم نے یہ اپنے بل بوتے پر کیا ہے۔‘

   دوسری جانب، دوحہ میں قطر سے اظہارِ یکجہتی کے لیے عرب اور مسلم ممالک کا ہنگامی اجلاس منعقد ہوا ہے۔ قطر کے وزیرِ اعظم شیخ محمد بن عبدالرحمن الثانی نے بین الاقوامی برادری پر زور دیا ہے کہ وہ اپنا ’دوہرا معیار‘ ترک کریں اور اسرائیل کو اس کے کیے کی سزا دیں۔

5. 16 ستمبر 2025دوحہ میں سعودی ولی عہد محمد بن سلمان اور ایران کے صدر مسعود پزشکیان کی ملاقات

   پیر کے روز قطر کے دارالحکومت دوحہ میں عرب اور اسلامی ممالک کے سربراہان کے اجلاس کے موقع پر سعودی عرب کے ولی عہد محمد بن سلمان اور ایران کے صدر مسعود پزشکیان کی ملاقات بھی ہوئی۔

   سعودی عرب کے سرکاری خبر رساں ادارے سعودی پریس ایجنسی کے مطابق دونوں رہنماؤں نے نو ستمبر کو اسرائیل کی طرف سے قطر پر کیے جانے والے فضائی حملے پر تبادلہ خیال کیا۔

   گذشتہ ہفتے دوحہ میں حماس کے رہنماؤں پر اسرائیلی فضائی حملے کے بعد، عرب اور اسلامی رہنما قطر میں ہنگامی سربراہی اجلاس کے لیے جمع ہوئے تھے۔

   سربراہی اجلاس میں اپنی تقریر میں مسعود پزشکیان نے دوحہ پر اسرائیلی حملے کو ’ڈھٹائی‘، ’منصوبہ بندی‘ اور ’سفارت کاری پر حملہ‘ قرار دیا اور کہا کہ اس کا مقصد ’غزہ میں نسل کشی کے خاتمے کے لیے سفارتی کوششوں کو سبوتاژ کرنا تھا۔‘

   انھوں نے کہا کہ یہ ’امریکہ اور کچھ مغربی ممالک کی ملی بھگت‘ ہے۔ انھوں نے اسرائیلی حکومت کے رہنماؤں کے خلاف بین الاقوامی عدالتوں میں مقدمہ چلانے کا مطالبہ بھی کیا۔

   انھوں نے یہ بھی کہا کہ دوحہ پر حملے سے ظاہر ہوتا ہے کہ کوئی بھی اسلامی یا عرب ملک اسرائیلی جارحیت سے محفوظ نہیں۔

   اس اجلاس کے آغاز میں قطر کے امیر اور اجلاس کے میزبان تمیم بن حمد الثانی نے اسرائیلی وزیراعظم بنیامن نیتن یاہو کو تنقید کا نشانہ بناتے ہوئے کہا کہ ’اسرائیل عرب دنیا کو اپنے زیر اثر لانا چاہتا ہے۔‘

   قطر کے امیر کا کہنا تھا کہ دوحہ پر اسرائیلی حملے کا مقصد غزہ مذاکرات کو تعطل کا شکار کرنا تھا۔

6. 16 ستمبر 2025قطر کے خلاف ’اسرائیلی جارحیت‘ خلیجی ممالک کی سلامتی کے لیے براہ راست خطرہ ہے: خلیج تعاون کونسل

   قطر پر اسرائیلی حملے پر تبادلہ خیال کے لیے پیر کے روز خلیج تعاون کونسل (جی سی سی) کی سپریم کونسل کا دوحہ میں ایک غیر معمولی اجلاس منعقد ہوا۔

   اجلاس کے دوران جی سی سی رہنماؤں نے رکن ممالک کی مشترکہ دفاعی کونسل کو ہدایت کی کہ وہ دوحہ میں ایک ہنگامی اجلاس منعقد کرے، جس سے قبل سپریم ملٹری کمیٹی کے اجلاس میں جی سی سی کی ریاستوں کی دفاعی صورتحال اور خطرات کے ذرائع کا جائزہ لیا جائے۔

   انھوں نے یونیفائیڈ ملٹری کمانڈ کو مشترکہ دفاعی میکانزم اور خلیجی ڈیٹرنس کی صلاحیتوں کو فعال کرنے کے لیے ضروری انتظامی اقدامات کرنے کی بھی ہدایت کی۔

   سپریم کونسل کا کہنا تھا کہ قطر کے خلاف ’اسرائیلی جارحیت‘ خلیجی ممالک کی سلامتی اور علاقائی امن و استحکام کے لیے براہ راست خطرہ ہے۔

   سپریم کونسل نے سلامتی کونسل، عالمی برادری اور بااثر ریاستوں سے مطالبہ کیا کہ وہ اپنی پوری ذمہ داریاں سنبھالیں اور ’ان خلاف ورزیوں کو روکنے کے لیے ٹھوس اور روک تھام کے اقدامات‘ کریں۔

7. 16 ستمبر 2025گذشتہ روز کی اہم خبریں

   • پاکستان کے صوبہ بلوچستان کے ضلع کیچ میں بم حملے کے ایک واقعے میں ایک افسر سمیت کم از کم پانچ سکیورٹی اہلکار ہلاک ہوئے ہیں
   • دوحہ میں عرب اور اسلامی ممالک کے سربراہان اجلاس کے موقع پر سعودی عرب کے محمد بن سلمان اور ایران کے صدر مسعود پزشکیان کی ملاقات بھی ہوئی
   • پاکستان کے وزیراعظم شہباز شریف نے اقوام متحدہ میں اسرائیل کی رکنیت معطل کرنے کی تجویز کی حمایت کرتے ہوئے کہا ہے کہ انسانیت کے خلاف جنگی جرائم پر اسرائیل کو کٹہرے میں لانا ہو گا
   • انڈیا کی سپریم کورٹ نے مسلمانوں کی طرف سے 'اللہ کے نام پر' وقف کی گئی جائیدادوں سے متعلق نئے ترمیمی قانون میں اس شق کو معطل کر دیا ہے جس میں کہا گیا ہے کہ صرف وہی شخص اپنی املاک کو وقف کر سکتا ہے جو کم از کم پانچ برس سے ’پریکٹسنگ مسلمان‘ ہو

8. 16 ستمبر 2025بی بی سی کے لائیو پیج میں خوش آمدید!

   بی بی سی کے لائیو پیج میں خوش آمدید۔ پاکستان سمیت دنیا بھر کی اہم خبروں اور تجزیوں کے متعلق جاننے کے لیے بی بی سی کی لائیو پیج کوریج جاری ہے۔

   گذشتہ روز تک کی خبریں جاننے کے لیے یہاں کلک کریں۔