دفاعی سودوں میں بدعنوانی، بلیک لسٹڈ کشمیری

جوہری معاہدہ بچانے کی کوشش تیز
بائیں محاذ کے تیور میں تبدیلی کے آثار نہ نظر آنے کے بعد حکمراں اتحاد نے ہند امریکہ جوہری معاہدے کو بچانے کے لیے حزب اختلاف کی جماعت بی جے پی کو منانے کی کوشش شروع کردی ہے۔ پہلے تو امریکی سفیر نے سینئر رہنما ایل کے اڈوانی سے ملاقات کی۔ پھر بی جے پی سے قریب سمجھنے جانے والی غیر مقیم ہندوستانی امریکیوں کی ایسوسی ایشن نے اپیل کی۔

گزشتہ دنوں اٹامک انرجی کمیشن کے چئرمین انل کا کوڈ کر اور قومی سلامتی کے مشیر ایم کے نارا‏ئنن نے بھی مسٹر اڈوانی سے ملاقات کی جس میں دونوں اہلکاروں نے جوہری ہتھیاروں کے پروگرام کے بارے میں بی جے پی کے رہنماؤں کے تحفظات کے جوابات دیے۔

ملاقات کے بعد مسٹر اڈوانی نے کہا کہ بی جے پی کے موقف میں فی الحال کوئی تبدیلی نہيں آئی ہے۔ حکومت کو چاہیے کہ وہ پارلیمنٹ میں اس معاہدے پر بحث کرے اور ووٹنگ کے ذریعہ ایوان کا موڈ جانے۔ پارلیمنٹ کا اجلاس پندرہ نومبر سے شروع ہو رہا ہے۔

ہند پاک سرحد پر پاکستانی فوج میں کمی
پاکستان نے مشرقی سرحد سے فوجیں ہٹانے کی تردید کی ہے

پاکستان کے فوجی صدر پرویز مشرف بھلے ہی اپنے ملک میں عوام کا اعتبار کھو بیٹھے ہوں لیکن ہندوستان کے سکیورٹی حلقے قبائلی علاقوں کی خطرناک صورت حال کے بارے میں ان کے بیان پر یقین کررہے ہيں۔ ہندوستانی خفیہ اداروں کے مطابق حالیہ مہینوں میں ہند پاک سرحد سے تقریباً اڑتیس ہزار پاکستانی فوجی ہٹا کر وفاقی انتظامیہ والے قبائلی علاقوں میں بھیجے گئے ہیں۔ ان میں تقریباً دس ہزار فوجی گزشتہ مہینے پاکستان کی مغربی سرحد پر طالبان سے لڑنے کے لیے بھیجے گئے۔

ہندوستان کے سیکورٹی حلقوں کا خیال ہے کہ گزشتہ چھ عشروں میں یہ پہلا موقع ہے جب پاکستان کو اپنی مغربی سرحد پر ایک بڑے چیلنج کا سامنا ہے اور اس کو اپنی توجہ پاک ہند سرحد کے بجائے پاک افغان سرحد پر مرکوز کرنی پڑی ہے۔تاہم پاکستان نے ان خبروں کو سختی سے تردید کی ہے کہ اس نے پاک ہند سرحد سے اپنی فوجیں ہٹائی ہيں یا ان میں کسی طرح کی کمی کی ہے۔

دفاعی سودوں میں بدعنوانی
چھ دفاعی سودوں کی تفتیش اسی برس شروع ہوئی ہے۔
ہندوستان میں دفاعی سودے اکثر تنازعے کا شکار ہوتے ہيں۔ ہر چھوٹے بڑے سودے میں بد عنوانی اور کمیشن وغیرہ کے الزم لگتے ہيں۔ پارلیمنٹ میں بحث ہوتی ہے پھر کوئی کمیٹی تشکیل دی جاتی ہے اور نتیجہ کچھ نہیں نکلتا۔ اس وقت بھی سات دفاعی سودوں کی تحقیقات چل رہی ہیں جن کی مجموعی مالیت کئی ہزار کروڑ روپے ہے۔ ان میں سے چھ سودوں کی تفتیش اسی برس شروع ہوئی ہے۔ بار بار الزامات لگنے کے بعد وزرات دفاع نے تمام دفاعی سودوں کو مزید شفاف بنانے کا فیصلہ کیا ہے۔

ساٹھ ہزار کشمیری بلیک لسٹڈ
کشمیری نوجوان(فائل فوٹو)
بلیک لسٹڈ کشمیریوں کو پاسپورٹ جاری نہیں کیے جاتے
کشمیر میں پولیس کے خفیہ شعبے نے تقریباً ساٹھ ہزار کشمیری خاندانوں کو بلیک لسٹ میں رکھا ہے ۔عام طور پر ان خاندانوں کو اس فہرست میں شامل کیا جاتا ہے جن کے گھر کا کوئی شخص شدت پسند رہا ہو یا پولیس کی نظروں مں کسی فرد کا کردار مشتبہ ہو۔ ايسے خاندان کے افراد کو نہ صرف یہ کہ پاسپورٹ وغیرہ جاری نہیں کیے جاتے بلکہ انہیں غیر ممالک جانے کی بھی اجازت نہیں ہوتی ۔ پاسپورٹ موجود ہونے کی صورت میں باہر جانےکے لیے کلیرنس نہیں ملتی۔

حقوق انسانی کی تنظیموں کے مطابق یہ فہرست روز بروز بڑی ہوتی جا رہی ہے۔ ان افراد کو سرکاری ملازمت میں بھی نہیں رکھا جاتا ۔ گزشتہ ہفتے سیکڑوں عازمین حج کی درخواستیں انہیں بنیادوں پر مسترد ہونے کے بعد ان خاندانوں کی ناراضگی بڑھتی جا رہی ہے۔ ان کا کہنا ہے کہ اگر کسی کے بیٹے نے بندوق اٹھائی ہے تو اس کی سزا اس کے باپ ، ماں یا گھر کے دوسرے لوگوں کو کیوں دی جائے۔

تہاڑ میں ’اذیت سے موت‘
دلی کی تہاڑ جیل
حقوق انسانی کے قومی کمیشن کی ایک تحقیقاتی رپورٹ میں بتایا گیا ہے گزششتہ جون میں دلی کی تہاڑ جیل میں مشتبہ جالت میں مرنے والے سات میں سے تین قیدیوں کی ہلاکت اذیتیں دینے سے ہوئی تھیں۔ یہ سبھی قیدی نوجوان تھے اور ان کی اموات تہاڑ میں قید ہونے کے چند دنوں کے اندر ہوئی تھیں۔

گزشتہ ہفتے دلی ہائی کورٹ میں داخل کی ایک رپورٹ میں حقوق انسانی کے کمیشن نے کہا ہے کم ازکم تین اموات یا تو پولیس کی تحویل یا عدالتی تحویل کے دوران قیدیرں کو بری طرح زدوکوب کرنے سے ہوئیں۔ کمیشن نے تمام مشتبہ کیسوں کی سی بی آئی سے تحقیقات کرانے کی سفارش کی ہے۔


	پاکستان نے مشرقی سرحد سے فوجیں ہٹانے کی تردید کی ہے


	چھ دفاعی سودوں کی تفتیش اسی برس شروع ہوئی ہے۔


	بلیک لسٹڈ کشمیریوں کو پاسپورٹ جاری نہیں کیے جاتے