Saturday, 03 November, 2007, 10:39 GMT 15:39 PST

دلّی میں گجر برادری کی ریلی

ہندوستان کی ریاست راجستھان میں ریزرویشن کا مطالبہ کرنے والی گجر برادری نے سنيچر کو دارالحکومت دلی میں ایک بڑی ریلی منعقد کی ہے۔

پسماندہ طبقہ کی گجر برادری درج ’فہرست قبائل‘ میں اپنی شمولیت چاہتی ہے تاکہ اسے ریزرویشن کا فائدہ مل سکے۔

گجّر برادری کی ریلی:تصاویر

اس سلسلے میں پورے ملک سے ہزاروں افراد دلی کے رام لیلا میدان میں جمع ہوئے ۔گجر برادری کا کہنا ہے کہ ریاستی حکومت جلد سے جلد کوئی فیصلہ کرے اور انہیں’ شیڈول ٹرائب‘ ميں شامل کروانے کی کوشش کرے۔

یاد رہے کہ اس برس مئی، جون میں گجر برادری کی جانب سے شروع کی گئی تحریک میں تشدد کے بعض واقعات پیش آئے تھے جس کے بعد ریاستی حکومت اور گجر برادری کے درمیان ایک معاہدہ ہوا تھا۔

اس معاہدے میں کہا گیا تھا کہ تین سابق ججوں پر مشتمل ایک کمیٹی بنائی جائے گی جو اپنی رپورٹ آئندہ تین مہینے میں دے گی اور اس رپورٹ کی بنیاد پر گجر برادری کے فہرست قبائل میں شامل کیے جانے کے بارے ميں غور کیا جائے گا۔

لیکن تین مہینے گزرنے کے بعد اب بھی یہ رپورٹ سامنے نہیں آئی ہے جبکہ کمیٹی کی مدت میں دسمبر تک کی توسیع کر دی گئی ہے۔ اس بات سے ناراض لوگوں نے اپنے رہنماؤں کے ساتھ مل کر گزشتہ دو اکتوبر کو گرفتاریاں دیں اور جیل گئے۔