Thursday, 09 August, 2007, 08:05 GMT 13:05 PST

ہندی بولنے پر آٹھ افراد قتل

ہندوستان کی شمال مشرقی ریاست آسام میں بدھ کی رات شدت پسندوں نے ہندی بولنے والی آبادی کے آٹھ افراد کو ہلاک کردیا ہے۔ لسانی بنیاد پر قتل کا یہ واقعہ ریاست کے کاربی آنگ لانگ ضلع میں پیش آيا ہے۔

ریاست کے اعلیٰ پولیس اہلکار ایل آر بشنوئی نے بی بی سی کو بتایا کہ تقریباً تیس مسلح شدت پسندوں نے کاربی آنگ لانگ ضلع کے ایک گاؤں میں آ کر تلاشی لی اور ہندی بولنے والے افراد کو ایک ساتھ باہر لے جا کر انہیں گولی مار دی۔

پولیس حکام کو شبہ ہے کہ اس واقعے کے پیچھے علیحدگی پسند تنظیم یونائٹیڈ لیبریشن فرنٹ آف آسام یعنی ’الفا‘ کا ہاتھ ہو سکتا ہے۔

مسٹربشنوئی کے مطابق ایک مقامی قبائلی شدت پسند گروپ کاربی لانگپی نارتھ کیچر لیبریشن فرنٹ نے یہ واردات کرنے کے لیے الفا کی مدد کی ہے۔

جائے واقعہ پر اب پولیس کا پہرہ ہے اور علاقے میں مسلح شدت پسندوں کو پکڑنے کے لیے تلاشی کا کام شروع کر دیا گیا ہے۔

الفا انیس سو اناسی سے آسام کی آزادی کے لیے مہم چلا رہی ہے۔ خیال کیا جاتا ہےکہ تازہ حملہ آزادی کے ساٹھ سالہ جشن سے پہلے ریاست میں اپنی سرگرمی کو علامتی طور پر دکھانے کے غرض سے کیا گیا ہے۔

الفانے پانچ اگست سے ہی ریاست میں حملوں کا آغاز کردیا تھا۔ گزشتہ چند دنوں میں چھ مختلف بم دھماکوں میں تین افراد ہلاک اور پینتالیس سے زائد افراد زخمی ہوئے ہیں۔