Sunday, 27 May, 2007, 11:52 GMT 16:52 PST

عمر فاروق
بی بی سی حیدرآباد، انڈیا

بچوں سے ’زيادتی‘ کا ملزم گرفتار

ہندوستان کی ریاست آندھرا پردیش میں پولیس نے سنیچر کو وجے واڑہ میں دس بچوں سے جنسی زیادتی کے ایک ملزم کوگرفتار کیا ہے۔

ملزم نے مبینہ طور پر جن بچوں کو زیادتی کا شکار بنایا تھا ان میں سے ایک کی موت بھی ہوچکی ہے۔

ریاست کے شہر وجے واڑہ کے پولیس کمشنر سی وی آنند نے بتایا کہ پولیس نےاکتیس سالہ شیوا کو ایک بچے کی پراسرار موت کے سلسلے میں گرفتار کیا ہے۔
پولیس کے مطابق شیوا نے پوچھ گچھ کےدوران اعتراف کیا کہ وہ بچوں کو فحش فلمیں دکھانے کے لیے لاتا اور ان سے جنسی زیادتی کرتا تھا۔

آنند کا کہناہے ’وہ شام کے وقت بچوں کو بہلا پھسلاکر کسی ویران جگہ یا پارک میں لے جاتا تھا اور انہیں اپنے موبائل فون پر فحش فلموں کے ٹکڑے دکھاتا اور ان سے جنسی زیادتی کرتا تھا‘۔

ملزم کا طریقۂ واردات: پولیس  شام کے وقت بچوں کو بہلا پھسلاکر کسی ویران جگہ یا پارک میں لے جاتا تھا اور انہیں اپنے موبائل فون پر فحش فلموں کے ٹکڑے دکھاتا اور ان سے جنسی زیادتی کرتا تھا

زیادتی کا شکار ہونے والے تمام بچوں کی عمریں تیرہ سے پندرہ سال کے درمیان تھیں اور ان کا تعلق غریب خاندانوں سے ہے۔ ہلاک ہونے والے بچے کی عمر دس سال تھی۔