Friday, 02 February, 2007, 23:26 GMT 04:26 PST

بنگلور کے نزدیک ہیلی کاپٹر کا حادثہ

ہندوستان کےجنوبی شہر بنگلور میں پولیس کا کہنا ہے کہ ہندوستانی فضائیہ کے ایک ہیلی کاپٹر کے حادثے میں فضائیہ کا ایک پائلٹ ہلاک ہوگیاہے۔

بنگلور میں آئندہ ہفتے’ بین لااقوامی ائیر شو‘ ہونے والا ہے اور اس کی تیاری کےتحت فضائیہ کے ہواباز جب ہیلی کاپٹر کےذریعے کرتب دکھا رہے تھےتو یہ حادثہ پیش آیا۔ ہیلی کاپٹر ہندوستانی ساخت تھا۔

ہندوستانی فضائیہ کے ترجمان کا کہنا ہے کہ ہیلی کاپٹر یلہنکا کے فضائی اڈے کے نزدیک زمین پر گر کر تباہ ہوگیا۔

معاون ہواباز ’اسکویڈرون لیڈر‘ پی شرما موقعہ پر ہی ہلاک ہوگۓ جبکہ ونگ کمانڈر وی جیٹلی کو انتہائی تشویشناک حالت میں ہسپتال میں داخل کرایا گیا ہے۔

بنگلور میں واقع یلہنکا کےفضائی اڈے پانچ روزہ ’بین الاقوامی ائیر شو‘ سات فروری سے شروع ہونے والا ہے اور اس شو میں امریکہ، روس، برطانیہ، فرانس سمیت بیس سے زائد ممالک حصہ لے رہے ہیں۔

اس ہیلی کاپٹر کو ہندوستان ائیرونوٹکس لمیٹڈ نے بنایا تھا اور ہندوستانی فضائیہ نے فضائی کرتب دکھانے کے لیے اسے ’سارنگ‘ ٹیم کی طرف سے شو میں شامل کیا تھا۔

خیال رہے کرتب دکھانے کے دوران اس نوعیت کا یہ دوسرا حادثہ ہے۔ گزشتہ برس بنگلور سے سات سو کلومیٹر دور بیدار میں اس طرح کا حادثہ ہوگيا تھا جس میں دوپائلٹ ہلاک ہوگۓ تھے۔