Friday, 28 July, 2006, 07:57 GMT 12:57 PST
الطاف حسین
بی بی سی، سرینگر
سرینگر:صدر دورے کے خلاف ہڑتال
ہندوستان کے زیر انتظام کشمیر میں علیحدگی پسند تنظیموں کی اپیل پر ہندوستان کے صدر اے پی جے عبدالکلام کے کشمیر دورے پر عام ہڑتال کی گئی ہے۔
صدر کا دورہ، عوامی مشکلاتہڑتال کے سبب عام زندگی بری طرح متاثر ہوئی ہے، دکانیں بند رہیں جبکہ ٹریفک پر بھی اثر پڑا۔ اس ہڑتال کی اپیل علیحدگی پسند جماعت حریت کانفرنس کے سخت گیرگروپ کے رہنما سید علی شاہ گیلانی کی طرف سے کی گئی ہے۔
صدر اے پی جے عبدالکلام دو دن کے لیۓ کشمیر کے دورے پر ہیں۔ وہ جمعہ کے روز لداخ پہنچے جہاں انہوں نے گوتم بدھ کی 2،550ویں سالگرہ کی تقریب کا افتتاح کیا۔
صدر اے پی جےعبدالکلام کے سرینگر دورے کے موقع پر سکیورٹی کے سخت انتظامات ہیں۔ سری نگر میں وہ کشمیر کی ریاستی اسمبلی کے مشترکہ اجلاس سے خطاب کریں گے۔
صدر عبدالکلام کے اس دورے کے موقع پر ہڑتال کے بارے میں علی شاہ گیلانی کا کہنا تھا کہ ’چونکہ صدر جمہوریہ ملک کی فوج کے سپریم کمانڈر ہیں اسلیۓ فوج نے کشمیر میں حقوق انسانی کی جو بھی خلاف ورزیاں کی ہیں اس کی ذمہ داری انہیں بھی لینی چاہیۓ۔‘
حزب المجاہدین اور دختران ملت جیسے علیحدگی پسند گروپوں نے بھی ہڑتال کی حمایت کی ہے۔
صدر اے پی جے عبدالکلام سرینگر میں ہائی کورٹ کی پچہترویں سالگرہ کے سلسلے میں گولڈن جوبلی تقریبات کا افتتاح بھی کریں گے۔
گزشتہ دو ماہ کے دوران وادی میں ہندوستان کی اہم ترین شخصیات کا یہ دوسرا دورہ ہوگا۔ اس سے قبل چوبیس اور پچیس مئی کو گول میز کانفرنس کے موقع پر وزیراعظم ڈاکٹر منموہن سنگھ بھی یہاں آئے تھے۔