Friday, 14 April, 2006, 11:31 GMT 16:31 PST

کشمیر میں پانچ افراد ہلاک

بھارت کے زیر انتظام کشمیر میں پولیس نے بتایا ہے کہ مشتبہ شدت پسندوں کے ایک حملے میں کم سے کم چار شہری ہلاک ہو گئے ہیں۔ پولیس کی جوابی فائرنگ سے ایک ’حملہ آور‘ ہلاک ہو گیا۔ حکام نے بتایا کہ اس حملے میں سترہ افراد زخمی ہوئے۔

پولیس نے بتایا کہ ایک لڑکی سمیت دو شہری اس وقت ہلاک ہوئے جب شدت پسندوں نے ڈل جھیل کے قریب پولیس کی ایک چوکی پر حملہ کر دیا۔ ایک شہری اس وقت ہلاک ہوا جب پولیس نے حملہ آوروں پر جوابی فائرنگ کی۔

دوسرا حملہ نیم فوجی دستوں کو لے جانے والے ایک ٹرک پر ہوا جس میں پر دستی بم پھینکے گئے۔ حکام نے بتایا کہ اس حملے میں ایک عورت سمیت دو شہری ہلاک اور دو فوجیوں سمیت چار افراد زخمی ہوئے۔

اطلاعات کے مطابق شہر میں اس کے علاوہ بھی دستی بموں سے حملے کیے گئے جن میں کچھ لوگ زخمی ہوئے۔

سرینگر میں بی بی سی کے نامہ نگار نے بتایا کہ یہ سب حملے ایک گھنٹے کے دوران ہوئے۔

بھارت کے زیر انتظام کشمیر میں گزشتہ سترہ سال میں علیحدگی پسند مزاحمت کے دوران ساٹھ ہزار افراد ہلاک ہو چکے ہیں۔