Wednesday, 15 March, 2006, 01:14 GMT 06:14 PST

بھارت کو روس کاایٹمی ایندھن

بھارتی وزارت خارجہ نے کہا ہے کہ روس نے مغربی ریاست مہاراشٹر میں تاراپور ایٹمی پلانٹ کے دو یونٹوں کے لیے ایندھن فراہم کرنے پر رضامندی ظاہر کر دی ہے۔

وزارت خارجہ کے ترجمان نوتیج سرنا نے منگل کے روز صحافیوں کو بتایا کہ روس ان یونٹوں کے لیے محدود پیمانے پر یورینیم فراہم کرنے پر راضی ہوگیا ہے اور اس سے ملک کے مغربی گرِڈ میں بجلی حاصل کرنے میں مدد ملے گی۔

نوتیج سرنا نے کہا کہ اس سلسلے میں روس نے نیوکلیر سپلائرز گروپ کو، جس میں امریکہ بھی شامل ہے، آگاہ کر دیا ہے۔ ان کا کہنا تھا کہ تاراپور پلانٹ کے لیے ایندھن کی فراہمی کی درخواست امریکہ سے بھی کی گئی ہے مگر وہاں کے موجودہ قوانین کے تحت فی الحال یہ ممکن نہیں ہوگا۔

تاہم نوتیج سرنا نے صحافیوں کو بتایا کہ پچھلے سال جولائی میں امریکہ اور بھارت میں ہونے والے سمجھوتے کے تحت امریکہ ان ضابطوں میں تبدیلی لائے گا تاکہ توانائی کی ضرورت کے لیے ایندھن کے حصول میں رکاوٹوں کو دور کیا جا سکے۔

وزارت خارجہ کے ترجمان کا کہنا تھا کہ روسی وزیراعظم میخائل فریدکوف جمعرات کو دو روزہ دورے پر بھارت پہنچ رہے ہیں جب اس معاملے پر مزید بات چیت آگے بڑھے گی۔