Sunday, 05 December, 2004, 00:24 GMT 05:24 PST

بھارت کو ویٹو کے اختیار کی حمایت

روس کے صدر ولادیمیر پوتن نے بھارت کی طرف سے سلامتی کونسل میں ویٹو کے اختیار کے مطالبے کی حمایت کی ہے۔

انہوں نے کہا ہے کہ اقوام متحدہ کی سلامتی کونسل میں اصلاحات کی صورت میں بھارت کو ویٹو کا اختیار ملنا چاہیے۔ اس کے جواب میں بھارت روس کی ’ڈبلیو ٹی او‘ میں شمولیت کی حمایت کرتا ہے۔

اقوام متحدہ میں اصلاحات کے بارے میں فیصلہ آئندہ سمتبر میں متوقع ہے۔ یہ اصلاحات ’سرد جنگ کے خاتمے کے بعد عالمی حالات کی عکاسی کریں گی‘۔

بھارت کے تین روزہ دورے کے دوسرے دن صدر پوتن نے بھارت کی کمپیوٹر فرموں کو روس میں کاروبار کی دعوت دی اور کہا کہ انہیں ٹیکسوں میں چھوٹ دی جائے گی۔

صدر پوتن کے دورے کا مقصد بھارت کے ساتھ سرد جنگ کے دنوں کی طرح دوبارہ مضبوط تعلقات قائم کرنا ہے۔

اس سے پہلے جمعہ کو بھارت کے وزیر اعظم منموہن سنگھ اور روس کے صدر ولادیمیر پوتن نے ایک مشترکہ اعلامیہ پر دستخط کیے جس کے تحت دونوں ممالک میں ’سٹریٹیجک پارٹنرشپ‘، لوگوں کے روابط میں بہتری اور باہمی تجارت میں اضافے پر زور دیا گیا ہے۔

دِلّی میں بی بی سی کے نامہ نگاروں کے مطابق بھارت کی طرف سے امریکہ، اسرائیل اور برطانیہ سے اسلحہ خریدنے کے فیصلے سے روس کو نقصان ہوا اور روس کے صدر
کے دورے کو اسی تناظر میں دیکھنا چاہیے۔