Wednesday, 29 September, 2004, 04:46 GMT 09:46 PST

’طبی سیاحت کے لیے بھارت آئیں‘

بھارت کے شہر کلکتہ میں صحت کے شعبے سے تعلق رکھنے والی تنظیموں نے میڈیکل ٹورزم یعنی علاج کے لیے سیاحت کو فروغ دینے کی کوشش پر غور کیا ہے۔

تفصیلات کے مطابق اس وقت بھی دنیا بھر سے ہزاروں لوگ سستے لیکن معیاری علاج کے لیے بھارت جاتے ہیں ۔ اگرچہ ان میں سے زیادہ تر کا تعلق بھارت کے پڑوسی ممالک سے ہے لیکن حالیہ دنوں میں دور کے ممالک سے بھی لوگ جلدی، سستے اور معیاری علاج کی خواہش لیے یہاں آنے لگے ہیں ۔

بھارت میں ہسپتالوں اور صحت کےشعبے سے متعلق گروہوں کی کوشش ہے کہ اس سے فائدہ اٹھایا جائے اور ترقی یافتہ ممالک کی حکومتوں اور بڑی بڑی میڈیکل انشورنس کمپنیوں کو بھی اپنے مریض وہاں بھیجنے پر راضی کیا جائے۔

ان میں برطانیہ کی نیشنل ہیلتھ سروس سر فہرست ہے۔ اور ایک بھارتی وفد نے اس سلسلے میں حال ہی میں برطانیہ کا دورہ بھی کیا۔ لیکن ایک ڈاکٹر کا کہنا ہے کہ ہو سکتا ہے ایک امیر ملک اپنی مشکلات کے حل کے لیے اپنی سابقہ کالونی کی مدد لینے میں ہچکچاہٹ محسوس کرے۔