Monday, 23 August, 2004, 17:46 GMT 22:46 PST

بھارت : ٹرک ہڑتال کا تیسرا دن

بھارت میں لاکھوں ٹرک ڈرائیور پیر کو تیسرے دن بھی نئے سروس ٹیکس کے خلاف ہڑتال پر رہے۔

سنیچر کو شروع کی جانے والی اس ہڑتال کے نتیجے میں چھوٹے بڑے تمام شہروں میں پھلوں اور سبزیوں کی سپلائی اور قیمتوں پر اثر پڑا ہے ۔

حکومت نے ان ٹرک ڈرائیوروں سے ہڑتال ختم کرنے کی اپیل کرتے ہوئے کہا ہے کہ بکنگ ایجنٹوں کے لیے شروع کیے جانے والے دس فیصد سروس چارج کا براہِ راست ان پر کوئی اثر نہیں پڑے گا۔

آل انڈیا موٹر ٹرانسپورٹ کانگرس کی کال پر تیس لاکھ سے زیادہ ٹرک ڈرائیوروں نے اپنی گاڑیاں روڈ سے ہٹا لی تھیں۔

اقتصادی ماہرین کا کہنا ہے کہ ٹرک ڈرائیوروں کی ہڑتال کی وجہ سے بھارت میں کاروبار کو روزانہ لاکھوں ڈالر کا نقصان ہو گا۔