Friday, 09 July, 2004, 11:02 GMT 16:02 PST

ممبئی دھماکے: 11افراد کو عمر قید

بھارت کی ایک عدالت نے چھ سال پہلے ممبئی میں دھماکے کرنے کی پاداش میں گیارہ ملزموں کو عمر قید کی سزا سنائی ہے۔

انیس سو اٹھانوے کے اوائل میں ہونے والے ان دھماکوں میں چار افراد ہلاک ہوگئے تھے۔

جج نے حکومت کو ہدایت کی کہ ملزموں کو کسی بھی طرح کی رعایت نہ دی جائے اور ان کی سزا میں کمی نہ کی جائے۔

ان ملزمان کے بارے میں عدالت نے گزشتہ ہفتے ہی فیصلہ دے دیا تھا لیکن اس فیصلے کا اعلان جمعہ کو کیا گیا۔

پولیس نے ممبئی بم دھماکوں کے سلسلے میں تیرہ افراد کو گرفتار کیا تھا اور ان پر الزام تھا کہ انہوں نے بم بنائے اور دھماکے کیئے۔

عدالت نے ایک پاکستانی کی رہائی کا حکم دیا ہے جبکہ ایک دوسرا ملزم عدالتی کارروائی کے دوران مر گیا تھا۔ عدالتی کارروائی چھ سال تک جاری رہی۔

ملزموں نے دھماکوں میں ملوث ہونے سے انکار کیا ہے اور عندیہ دیا ہے کہ وہ اس سزا کے خلاف ممبئی کے ہائی کورٹ میں جائیں گے۔