Monday, 25 September, 2006, 17:48 GMT 22:48 PST

پچاس ہزار ڈالرمیں سشمیتا کی پینٹنگ

بالی وڈ کی اداکارہ اور سابق مس یونیورس سشمیتا سین کی ایک پینٹنگ پچاس ہزار امریکی ڈالر میں نیلام ہوئی ہے۔
عام طور پر کسی پینٹگ کے لیئے اتنی بڑی رقم بھارت کے کسی بڑے پینٹر کو ہی ملا کرتی ہے۔

چیریٹی کے لیئے فنڈ اکٹھا کرنے کے لیئے دبئی میں منعقد ایک پروگرام میں یہ رقم جمع کی گئی۔ یہ رقم عمران خان کےکینسر ہسپتال کو دیا جائے گا۔

’شوکت خانم میموریئل کینسر ہوسپیٹل اینڈ ریسرچ سنٹر ‘ کا قیام پاکستان کے سابق کرکٹر عمران خان نےاپنی ماں کی یاد میں لاہور میں کیا تھا۔

سشمیتا سین نے بی بی سی سے کہا کہ ’ انہیں خوشی ہے کہ انکی پینٹنگ کو اتنی بڑی رقم ملی ہے‘۔

سشمیتا نے کہا کہ ’ حقیقت یہ ہے کہ یہ پینٹنگ فروخت نہیں بکہ نیلام ہوئی ہے اور یہ رقم ایک ایسی تنظیم کو ملے گی جس سے لوگوں کی کافی امیدیں وابسطہ ہیں‘۔
یہ پہلا موقع ہے جب سشمتا سین کی کسی پینٹنگ کو نیلام کیا گیا ہے۔

سشمیتا نے کہا کہ ’ یہ میرے لیئے عزت افزائی کی بات ہو گی اگر میری اور پینٹینگس کو نیلام کر کے اس سے حاصل ہونے والی رقم کا استعمال کسی فلاحی کام میں ہو۔‘

کینسر ہسپتال کے ترجمان محمود اختر نے کہا کہ ’ ہم لوگ ہرسال رقم جمع کرنے کے لیئے خاص پروگرام کا اہتمام کرتے ہیں اور اس سال کے پروگرام میں سشمیتا سین کی پینٹنگ کو منتخب کیا گیا تھا۔

پینٹنگ خریدنے والے کا نام ابھی تک ظاہر نہیں کیا گیا ہے۔ محمود اختر نے کہا کہ ’ مجھے نہیں معلوم کے پینٹنگ کے خریداراپنا نام ظاہر کرنا چاہتے ہیں یا نہیں لیکن وہ ایک پاکستانی بزنس مین ہیں جو دبئی میں سیٹل ہو گئے ہیں اور اس ہسپتال سے ان کی کافی ہمدردی رہی ہے۔‘