Saturday, 17 December, 2005, 17:42 GMT 22:42 PST

کانسی کا دو ٹن وزنی مجسمہ چوری

انگلینڈ کے علاقے ہرٹفورڈ شر کے ایک عجائب گھر سے مجسمہ ساز ہنری مور کا کانسی کا مجسمہ چوری ہوگیا ہے۔ عجائب گھر کے احاطے میں نصب اس مجسمے کی مالیت تین ملین پاؤنڈ تھی۔

بغیر سر کی عورت کا یہ عظیم الشان مجسمہ تین افراد نے بذریعہ کرین ایک بڑی گاڑی پر رکھا اور موقع سے فرار ہوگئے۔ یہ تمام حرکات وہاں موجود سی سی ٹی وی پر ریکارڈ ہوچکی ہیں۔

واقعے کی تحقیقات کرنے والے ایک افسر کا کہنا ہے کہ ان کے خیال میں یہ مجسمہ کانسی کی مالیت کی وجہ سے چرایا گیا ہے۔

1969/1970 میں بنایا گیا یہ شاہکار گیارہ فٹ لمبا ہے اور اس کا وزن دو ٹن سے زیادہ ہے۔

بتایا گیا ہے کہ سرخ رنگ کی گاڈی پر سوار چوری کرنے والوں میں سے ایک نے ٹوپی والی جیکٹ پہن رکھی تھی جبکہ دوسرے نے بیس بال کیپ پہنی ہوئی ہے۔

حکام کا کہنا ہے کہ یہ بہت قیمتی مجسمہ ہے اور وہ مجسمہ کی واپسی کے لیے ہر ممکن کوشش کررہے ہیں۔ تاہم انہوں نے خدشہ ظاہر کیا ہے کہ اسے محض کانسی کی مالیت پر فروخت کردیا جائے گا جو کہ شرمناک ہے۔

مجسمے کی برآمدگی پر متعلقہ محکمے نے انعام کا اعلان بھی کیا ہے۔

ایک افسر نے بتایا کہ یہ مجسمہ عجائب گھر کے احاطے میں تھا اور اسے جلد ہی ایک دوسرے مقام پر منتقل کیا جانا تھا۔