Tuesday, 12 April, 2005, 16:49 GMT 21:49 PST

جیکسن نےساتھ سونےکی التجا کی

مائیکل جیکسن کیس میں گواہی کے لیے بلائے گئے لڑکے کی والدہ نے عدالت کو بتایا ہے کہ جیکسن نے ان سے التجا کی تھی کہ وہ اپنے بیٹے کو ان کے ساتھ سونے کی اجازت دے دیں۔

اس لڑکے کے معاملے کو مائیکل جیکسن نے عدالت کے باہر باہمی طور پر طے کر لیا تھا اور اس کے خاندان کو ایک بڑی رقم ملی تھی۔

عدالت میں مقدمے کی کاروائی کے دوران لڑکے کی ماں جون چینڈلر نے کہا کہ شروع میں اس نے مائیکل جیکسن کی درخواست رد کر دی تھی مگر بعد میں اس نے اجازت دے دی کیوں کہ جیکسن ناراض ہو گئے تھےاور جیکسن نے کہا
” کیا آپ کومجھ پر اعتبار نہیں ہے۔ ہم ایک خاندان کی طرح ہیں”

چھیالس سالہ مائیکل جیکسن نے ان الزامات کی تردید کی ہے کہ انہوں نے ایک اور تیرہ سالہ لڑکے کو جنسی زیادتی کا نشانہ بنایا ہے۔

اس مقدمے میں استغاثہ مائیکل جیکسن پر بچوں کے ساتھ جنسی زیادتی کا الزام ثابت کرنے کی کوشش کر رہا ہے۔ استعغاثہ کا کہنا ہے کہ جیکسن نے پانچ بچوں کے ساتھ یا تو زیادتی کی یا زیادتی کرنے کے لیے ان کی پرورش کی۔