Sunday, 28 November, 2004, 23:50 GMT 04:50 PST

’الیگزینڈر‘ باکس آفس پر ناکام

سکندر اعظم کی زندگی پر بننے والی مشہور ڈائریکٹر اولیور سٹون کی فلم ’الیگزینڈر‘ امریکہ میں باکس آفس پر بہت زیادہ کاروبار کرنے میں ناکام رہی ہے اور امریکی فلموں کے چارٹ پر نمبر چھ پر ہے۔

بہت بڑے پیمانے پر بننے والی اس تاریخی فلم نے، جس پر ایک اندازے کے مطابق ڈیرھ سو ملین ڈالر خرچ ہوئے ہیں، پہلے تین دن میں صرف ساڑھے تین ملین ڈالر کمائے ہیں۔

پچھلہ ہفتے فلم کی ریلیز کے موقع پر اس کے ڈائریکٹر اولیور سٹون کو سخت تنقید کا سامنا کرنا پڑا تھا خاص طور پر انہیں سکندراعظم کے کردار کو ہم جنس دکھانے پر یونانی وکیلوں کی طرف سے مقدمات کا بھی خدشہ ہے۔

اینجیلینا جولی نے فلم میں سکندراعظم کی ماں کا کردار ادا کیا ہے۔

اس فلم میں آیرش ایکٹر کولن فیرل نے سکندراعظم کا کردار ادا کیا ہے جنہیں تاریخ کی سب سے مقبول جنگجو رہنما کے طور پر جانا جاتا ہے اور جنہوں نے پچیس برس کی عمر تک تقریباً تمام دنیا پر قبضہ کرلیا تھا۔

امریکی ناقدین نے اس میں کولن فیرل کے سنہرے بالوں اور سکندراعظم کی ماں کا کردار کرنے والی اداکارہ اینجلینا جولی کی ڈائیلاگ کی ادائیگی پر سخت تنقید کی ہے۔

لیکن مشہور ناول نگار گور ودال نے اس فلم کا دفاع کرتے ہوئے کہا ہے کہ اس فلم میں سکندر اعظم کی جنسیت یعنی مردوں اور عورتوں دونوں سے تعلق رکھنے کی عکاسی کرکے پرانی حدوں کو توڑا گیا ہے۔

فلم کے ڈائریکٹر اولیور سٹون نے پچھلے ہفتے سویڈن میں ایک ایوارڈ حاصل کرنے کے موقع پر کہا تھا کہ انہیں امید ہے کہ یہ فلم یورپ میں زیادہ پسند کی جائے گی۔