Friday, 18 June, 2004, 02:54 GMT 07:54 PST

گبسن رئیسوں کے رئیس

امریکی بزنس میگزین فوربز نے ہالی ووڈ کے اداکار میل گبسن کو نامور شخصیات میں سب سے طاقتور شخصیت یا پاورفل سلیبریٹی قرار دیا ہے۔

پیشن آف دی کرائسٹ کے فلم ڈائریکٹر میل گبسن نے دو ہزار تین میں اکیس کروڑ ڈالر کمائے تھے جس کی بنیاد پر وہ سب سے زیادہ آمدنی حاصل کرنے والے سو افراد کی فہرست میں سب سے اوپر رہے۔

اڑتالیس سالہ اداکار نے پچھلے برس سرفہرست رہنے والی جینیفر اینسٹین کو بہت پیچھے چھوڑ دیا ہے۔ اس سال جنیفیر سترہویں نمبر پر ہیں۔

ہیری پوٹر کی خالق جے کے راؤلنگ چھٹے نمبر پر ہیں۔

فوربز میگزین کا طریقہ یہ ہے کہ وہ سب سے زیادہ آمدنی اور شہرت رکھنے والے ایک سو افراد کو اس فہرست میں جگہ دیتا ہے۔

اس فہرست میں انگلیڈ فٹبال ٹیم کے کپتان ڈیوڈ بیکہم چھپنویں نمبر سے بائیسویں پر آگئے ہیں۔

اس پر فوربز کے ایڈیٹر انچیف کا کہنا تھا کہ بیکہم کے ریئل میڈرڈ چلنے جانے کے فیصلے نے انہیں انٹرنیشنل سٹار بنایا۔

اداکارہ کیتھرین زیٹا جونز چھپنویں نمبر پر ہیں جبکہ ان کے شوہر مائیکل ڈگلس کا دور دور تک نام نشان نہیں ہے۔