እዚ ውሑድ ዳታ ብምጥቃም፡ ጽሑፍ ጥራይ እተንብቡሉ መርበብ ሓበሬታ ቢቢሲ ትግርኛ እዩ። ምሉእ ኣሳእልን ቪድዮታትን ንምርኣይ ድማ ቀንዲ መርበብ ሓበሬታና ተጠቐሙ።
ኣብ ዝሓለፉ ሒደት መዓልታት፡ ኣብተን ብለበዳ ኮሮናቫይረስ ኣዝየን ዝተሃሰያ ሃገራት ቁጽሪ መወቲ ምንካይ ዘርአየ እንተኾነ'ኳ፡ ሕጂ'ውን ዓብዪ ስግኣት ከምዘሎ እዩ ዝዝረብ። ዛጊት ኣብ መላእ ዓለም ቁጽሪ በቲ ቫይረስ ዝተትሓዙ ሰባት፡ 2,971,090 ዝበጽሐ ኮይኑ፡ ልዕሊ 200 ሽሕ ሰባት ድማ ሞይቶም። ናይ ሎሚ መዓልቲ፡ ቀጥታዊ ጸብጻብና ኣብዚ ክነቕርበልኩም ኢና ተኸታተተሉ።
ኣብ ቻይና ዝርከቡ ኣፍሪቃውያን ብሓይሊ ክውሸቡ ይግደዱ ከም ዘለዉ፡ ጉጅለታት ተጣበቕቲ ሰባዊ መሰላት ሓቢሮም።
ኮቪድ-19 ኣብ ኣፍሪቃውያን ይረአ ኣሎ ብዝብል ምስምስን ፍርሕን ኣብ ደቡባዊት ከተማ ጓንዙ ምስርጣይ የጋጥሞም ከም ዘሎ ይገልጹ።
እቶም ኣፍሪቃውያን ዋላ እቲ ቫይረስ ከም ዘይብሎም እናተፈልጠ ኣብ ሆቴላት፡ ንነዊሕ ግዜ ክውሸቡ ይግደዱ ምህላዎም፡ ሁዪማን ራይትስ ዎች ነቒፉ።
ጋና፡ ልዕሊ 90 ሓደስቲ ሆስፒታላት ክትሰርሕ ከም ዝወጠነት፡ ፕረዚደንት ናና ኣኩፎ ኣዶ ኣፍሊጡ።
እቲ ውሳነ፡ ምስ ለበዳ ኮቪድ-19 ተኣሳሲሩ፡ ንስርዓተ-ጥዕና እታ ሃገር ንምሕያል ዝተሰውስደ ስጉምቲ ምዃኑ ተገሊጹ።
እቲ ንነዊሕ ዓመታት ሸለል ዝተባህለ ኣገልግሎት ጥዕና በቲ ለበዳ ዕርቃኑ ከምዝወጸ እቲ ፕረዚደንት ተኣሚኑ።
መንግስቲ ኒውዚላንድ፡ ካብ ኮም ናብ ኮም ዝመሓላለፍ ለበዳ ኮሮናቫይረስ ከምዝተቆጻጸሮን፡ ነቲ ቫይረስ ምሉእ ንምሉእ ከምዝኣለይዎን ሓቢሩ።
እንተኾነ ግን፡ እዚ መወዳእታ እቲ ቫይረስ ከምዘይኮነ ድሕሪ ምሕባር፡ ሰባት ኣድላዪ ዝኾነ ጥንቃቐ ክገብሩ ሰብመዚ እታ ሃገር ኣተሓሳሲቦም።
ካብ ሰሉስ ጀሚሩ ድማ ንግዲ፡ ኣብያተ-ጥዕና ከምኡ’ውን ንጥፈታት ትምህርቲ ከምዝጅመር ተገሊጹ።
ኣብ ኒውዚላንድ፡ 1,500 ሰባት በቲ ቫይረስ ክልከፉ እንከለው፡ 19 ከምዝሞቱ ይግለጽ።
ኣብ ዓባይ ብሪጣንያ፡15 እሱራትን ሓሙሽተ ሰራሕተኛታትን ብኮሮናቫይረስ ተለኺፎም ከምዝሞቱ ሚኒስትሪ ፍትሒ እታ ሃገር ሓቢሩ።
እቲ ሚኒስተር ከምዝሓበሮ፡ 321 እሱራትን 293 ሰራሕተኛታት ቤት-ማእሰርትን በቲ ቫይረስ ተለኺፎም ከምዘለው ገሊጹ።
ብተወሳኺ፡ ንዝርጋሐ ኮሮናቫይረስ ንምቍጽጻር 33 እሱራት ከምዝተፈትሑ’ውን እቲ ሚኒስተር ጠቒሱ።
ኣብ መጀመርያ እዚ ወርሒ፡ 4,000 ሓደገኛታት ዘይኮኑ ዝበሎም እሱራት ምፍትሖም'ውን ኣዘኻኺሩ።
ቀዳማይ ሚኒስተር ቦሪስ ጆንሰን፡ ካብ ኮሮና ቫይረስ ምስ ደሓነ ንፈለማ ግዘ ኣብ ዝሃቦ መግለፂ፡ ስግኣት ለበዳ ኮሮናቫይረስ ሕዚ እውን ከምዘሎን፡ ዝገደደ ሓደጋ ክመፅእ ከምዝኽእልን ኣጠንቂቑ።
ስለዝኾነ ድማ ኣብታ ሃገር ዝተኣወጀ ገደብ ምንቅስቓስ፡ ዘድልዩ ነገራት ከምዝተማልኡ ምስ ተፈለጠ ጥራሕ ከምዝለዓል ተዛሪቡ።
'መዓስ?' ንዝብል ግና ሕዚ ክዛረብ ከምዘይደልን፡ መንግስቲ ኣብ ዝቕፅሉ መዓልታት ከምዘፍልጥን ሓቢሩ።
“ዝወሃቡ ውሳነታት ብልዑል ግልፅነት ክኸውን እዩ” ኢሉ፡ ቦሪስ ጆንሰን።
ህዝቢ ንሰሙናት ካብ ገዝኡ እንከይወፅአ ዝኸፈሎ መስዋእቲ፡ ከንቱ ከትርፎ ከምዘይደልይ ዝተዛረበ እቲ ቀዳማይ ሚኒስተር፡ “እቲ ዘለናሉ ኩነታት ኣዝዩ ከቢድ ከምዝኾነ እፈልጥ እየ። ቁጠባና ቀልጢፉ ንክንቀሳቐስ ዝከኣለኒ ኩሉ ክገብር እየ’’’ ኢሉ።
እቲ ኣብታ ሃገር ዝተኣወጀ ፅኑዕ ዕፅዋ፡ ዘስዓቦ ፅዕንቶን ክውሰዱ ዝግበኦም ስጉምትታትን ዝሓበረ ቦሪስ፡ ህዝቢ ዝኸፈሎ መስዋእቲ ዕሽሽ ብምባል፡ እቲ ሕማም ዳግማይ ደጊሱ፡ ለበዳ ንክፍጠር ኣይፈቅድን” ኢሉ።
ቀዳማይ ሚኒስተር ቦሪስ ጆንሰን፡ ናብ ቤት-ፅሕፈቱ ተመሊሱ ነዚ መግለፂ ዝሃበ፡ ኣብታ ሃገር ዝተኣወጀ ዕፅዋ መዓዝ ከምዝለዓል ንከፍልጥ ፀቕጢ ስለዝተገበረሉ እዩ።
ሚኒስቴር ፍትሒ ላይቤሪያ ብኮሮናቫይረስ ተታሒዙ።
ሚኒስቴር ፍትሒ ፍራንክ ሙሳ ዲን፡ ብኮቪድ-19 ከምዝተለኸፈ፡ ሚኒስቴር ጥዕና እታ ሃገር ኣፍሊጢ።
ካብ ዋና ከተማ ሞንሮቪያ ውፅእ ኢሉ ኣብ ዝርከብ ሆስፒታል ክትትል ይግበረሉ ከምዘሎ ድማ ተገሊፁ።
እቲ ሚንቴር ትማሊ ሰንበት እዩ፡ ብኮሮናቫይረስ ከምዝተትሓዘ ተፈሊጡ።
ኣብ ኢትዮጵያ ኣብቶም ዝሓለፉ 24 ሰዓታት ምርመራ ዝተገበረሎም 943 ሰባት ፡ ሓደ ሰብ ጥራሕ ብኮሮናቫይረስ ከምዝተትሓዘ ከምዘረጋገፀ ሚኒስቴር ጥዕና እታ ሃገር ኣፍሊጡ።
ብኮሮናቫይረስ ተታሒዞም፡ ሕክምና ይከታተሉ ካብ ሞንጎ ዝነበሩ ድማ፡ 19 ሰባት ከምዝሓወዩ ተገሊፁ።
እቲ ቫይረስ ዝተረኸቦ ውልቀሰብ ሓደ ሰብ፡ ትውልደ ኢትዮጵያዊ ኢንግሊዛዊ ከምዝኾነ ዝሓበረ እቲ ሚኒስቴር፡ በስገዳድ ንክውሸብ ከምዝተገበረ ኣፍሊጡ።
ኣብታ ሃገር ዛጊድ ቁፅሪ ብኮሮናቫይረስ ዝተትሓዙ ሰባት 124 ዝበፅሐ እንትኸውን፡ 50 ሰባት ድማ ካብ ኮሮናቫይረስ ድሒኖም እዮም ኢሉ፡ እቲ ሚኒስቴር።
ካብዚ ብተወሳኺ፡ 69 ሰባት ኣብ መእለይ ማእኸል ከምዝርከቡ እውን እቲ ሚኒስቴር ገሊፁ።
ኣብ ብሄራዊ ክልላዊ መንግስቲ ትግራይ፡ ትማሊ 18 ሚያዝያ 2012 ዓ/ም ኣብ ልዕሊ 87 ምርመራ ተኻይዱ።
ኩሎም ድማ ካብቲ ቫይረስ ነጻ ኾይኖም ተረኺቦም።
ዛጊድ ኣብቲ ክልል፡ ኣብ ልዕሊ 286 ሰባት ናይ ላብራቶሪ ምርመራ ከምዝተኻየደ ተገሊጹ።
ርክብ ህዝቢ ክልላዊ መንግስቲ ትግራይ ኣብ ዝወጽኣ መግለጺ ከምዝሓበሮ፡ ክሳዕ ሕዚ ኣብቲ ክልል ብኮሮናቫይረስ ዝተትሓዘ ሰብ ኣይተረኸበን።
ኣብቲ ክልል፡ ለበዳ ኮሮናቫይተስ ንምክልኻል ቅድም ክብል ተወሲኑ ዝነበረ ትርር ዝበለ ህጹጽ ኣዋጅ፡ ኣብ ዝሓለፈ ሰሙን ክቐልል ከምዝተገብረ ዝፍለጥ እዩ።
ብዚ መሰረት፡ ህዝቢ ኣብ ወወረድኡ መዓልታዊ ዕዳጋ ከካይድን ኣብ መንጎ ከተማን ገጠርን ካብን ናብን ምንቅስቓሳት ክህሉ ተፈቒዱ እዩ። እንዳ ኣብያተ ጽባቐን እንዳ ቡንን ሻህን ድማ፡ ክኸፍቱ ተፈቒድሎም እዩ።
እንተኾነ፡ ሕዚ'ውን ኣብያተ መስተታት ክኸፍቱ ኣይፍቀድን፤ ካብቲ ክልል ወጻኢ ዝመጽአ ዝኾነ ሰብ ንክልተ ሰሙን ክውሸብ ዝተደንገገ ሕዚ'ውን ኣብ ቦትኡ እዩ።
ከም ሓበሬታ ዩኒቨርሲቲ ጆን ሆፕኪንስ፡ ብዝሒ ብኮሮናቫይረስ ከምዝተትሓዙ ናይ ዝተረጋገፁ ሰባት ፡ ናብ 3 ሚልየን ተፀጊዑ ኣሎ።
ክሳብ ሕዚ ብብርኪ ዓለም 2,971,831 ሰባት ብኮሮናቫይረስ እንትትሓዙ፡ 206,542 ሰባት ድማ በዚ ቫይረስ ህይወቶም ስኢኖም እዮም።
ኣሜሪካ 965,910 ብኮቪድ-19 ዝተትሓዙ ሰባት ብምምዝጋብ፡ ኣብ ቅድሚት ተሰሪዓ ትርከብ።
ስፔን ድማ፡ 226,629 ብኮረናቫይረስ ዝተለኸፉ ሰባት ብመምዝጋብ፡ ኣብ ካልኣይ ደረጃ ተሰሪዓ ኣላ።
ይኹን’ምበር፡ ዘይተመርመሩን ዘይተፀብፀቡን ረኽስታትን ግዳያትን ስለዝህልዉ፡ ብደረጃ ዓለም ናይ ዝተለኸፉ ሰባት ብዝሒ፡ ልዕሊ እቲ ተረጋጊፁ ዘሎ ክኸውን ከምዝኽእል እዩ ዝግመት።
ቀዳማይ ሚኒስተር ዓባይ ብሪጣንያ [እንግሊዝ] ቦሪስ ጆንሰን ብኮሮናቫይረስ ምስተትሓዘ፡ ድሕሪ ሓደ ወርሒ ሎሚ መዓልቲ ናብ ስርሑ ክምለስ ምዃኑ ተፈሊጡ።
እቲ ቀዳማይ ሚኒስተ፡ እቲ ቫይረስ ምስተረኸቦ፡ ኣብ ከተማ ለንደን ዝርከብ ሴንት ቶማስ ሆስፒታል ኣትዩ ንሓደ ሰሙን ጥቡቕ ሕክምናዊ ክትትል ገይሩ እዩ።
ቦሪስ ጆንሰን ኣብ ዝሓመመሉ እዋን ንዕኡ ተኪኡ ክሰርሕ ዝጸንሐ ሚኒስተር ጉዳያት ወጻኢ እታ ሃገር፡ ዶምኒክ ራብ፡ ቦሪስ ጆንሰን ሕዚ ናብ ስርሑ ንክምለስ ጥዕንኡ ኣብ ዘተኣማምን ደረጃ ከምዝርከብ ተዛሪቡ።
ቦሪስ ጆንሰን ፈላማይ ስርሑ ዝጅምር፡ ሎሚ መዓልቲ ብዛዕባ ኮቪድ -19 ዝካየድ ስሩዕ ኣኼባ ብምምራሕ እዩ ክኸውን ተባሂሉ።
ኣብ ሰሜናዊ ናይጄርያ ግዝኣት ካኖ፡ ኣብ ዝሓለፈ ሰሙን ዘጋጠመ ሞት፡ ምስ ኣካላት ስርዓተ-ምትንፋስ ዘጥቅዕ ሕማም ከምዘይዛመድ፡ ሰብመዚ እታ ሃገር ገሊፆም።
ምኽንያት እቲ ዘጋጠመ ሞት የፃርዩ ከምዘለዉ ዝሓበሩ እቶም ሰብመዚ፡ ዛጊድ ዝተገበሩ ምርመራታት ግና፡ ምስ ኮሮናቫይረስ ዘራኽብ የብሉን ኢሎም።
ሚኒስትር ጥዕና ናይጄርያ፡ ነዚ ጉዳይ “ብቐረባ ይከታተሎ ከምዘሎ” ድማ ኣፍሊጡ።
መራኸብቲ ሓፋሽ እታ ሃገር፡ ኣብቲ ከባቢ ብኣማኢት ዝቑፀሩ ሰባት፡ ከምዝሞቱ ምፅብፃበን ይዝከር።
እቲ ጉዳይ ምስ ለበዳ ኮሮናቫይረስ ተኣሳሲሩ ድማ ስግኣት ፈጢሩ ነይሩ።
ሚኒስትር ጥዕና እታ ሃገር ኣብ ዘውፅኦ መግለፂ ግና፡ ከቢድ ጭንቀት፣ ሕማም ሽኮር፣ ኣንቅፅን ዓሶን ጠንቂ እቲ ሞት ክኸውን ከምዝኽእል እዩ ዝግምት።
ኣብ ነዊሕ ዕፅዋ ዝፀንሑ ቻይናውያን ተምሃሮ፡ ሎሚመዓልቲ ናብ ቤት-ትምህርቲ ይምለሱ ኣለዉ።
ኣብ ከተማታት ሻንግሃይን ቤይጂንግን ዝርከባ ኣብያተ-ትምህርቲ ይኽፈታ ኣለዋ።
ኣብ ሻንጋይ፡ ትምህርቶም ንክዛዝሙ ኣዋርሕ ጥራሕ ዝተረፎም ተምሃሮ ካልኣይ ብርኪ፡ ትምህቲ እንትጅምሩ፡ ኣብ ቤንጂንግ ድማ፡ ንተምሃሮ ካልኣይ ብርኪ መጠቓለሊ ፈተና ክወሃብ እዩ።
እዚ ‘ጋዎካዎ’ ዝብል ስያመ ዘለዎ ፈተና፡ ከቢድ ፈተና ዝሓለፉ ተምሃሮ ከኣ፡ ናብ ዩኒቨርሲቲ ይኣትዉ።
ምንጪ ኮረናቫይረስ ከምዝኾነት ኣብ ትግለፅ ከተማ ውሃን እውን፡ ኣብያተ-ትምህርቲ ካብ ዝቕፅል ሰሙን ከምዝኽፈታ ተገሊፁ።
ህፃናት ከተማ ሃንግዙ ድማ፡ ማሕበራዊ ርሕቐቶም ንምሕላው፡ ሓደ ሜትሮ ንውሓት ዘለዎ ቆቢዕ ገይሮም ተራእዮም እዮም።
ሓሙሽተ ሚልየን ህዝቢ ኣብ ዘለዋ ሲንጋፖር፡ 13 ሽሕ ሰባት ብኮሮናቫይረስ ከምዝተትሓዙ ተረጋጊፁ ።
እዚ ድማ፡ ብዝሒ ሕሙማት ብምምዝጋብ፡ ካብ ቻይናን ህንድን ቀፂላ ኣብ ኤስያ ኣብ ሳልሳይ ደረጃ ተሰሪዓ ኣላ።
ኮረናቫይረስ፡ ናብታ ሃገር ብምኽንያት ስራሕ ብዝመፅኡ ሰራሕተኛታት፡ ክላበድ ከምዝኸኣለ እዩ፡ ዝግለፅ።
ካብ ሃገራት ደቡብ ኤስያ ዝመፅኡ ሸቃሎ (ሚንዋለ)፡ ኣብ ዝተጸቐዓቐቱ ገዛውቲ ዝነብሩ ብምዃኖም፡ እቲ ቫይረስ ብቐሊሉ ንክላባዕ ምኽንያት ኮይኑ እዩ።
ትማሊ ኣብ ሓደ መዓልቲ ጥራሕ፡ ካብ ሃገራት ወፃኢ ዝመፅኡ 931 ሰባት፡ ኮቪድ-19 ተረኺብዎም እዩ።
መንግስቲ ቺሊ፡ ካብ ኮቪድ-19 ዝደሓኑ ሰባት ወረቐት-ምስክር ከምዝወሃቦም ኣፍሊጡ።
ይኹን'ምበር መንግስቲ እታ ሃገር ከተኣታትዎ ተሊሙ ዘሎ፡ ወረቐት-ምስክር፡ ንብዙሓት የካትዕ ኣሎ።
ሚኒስትር ጥዕና እታ ሃገር ፓውላ ዳዛ፡ እዚ ወረቐት-ምስክር፡ ካብ ኮረናቫይረስ ዝሓወዩ ሰባት ናብ ስራሕ ንክምለሱ ዘኽእል ከምዝኾነ ኣፍሊጣ።
ውድብ ጥዕና ዓለም ግና፡ ብኮቪድ-19 ተታሒዞም ዝበሩ ሰባት፡ ግን ድማ ብናይ ሰብነቶም ስርዓት ምክልኻል ዝደሓኑ ሰባት፡ ዳግማይ በቲ ቫይረስ ከምዘይልከፉ መረጋገፂ ከምዘየለ ገሊፁ እዩ።
እዚ ስጉምቲ ፡ለበዳ እቲ ቫይረስ ከጋድድ ከምዝኽእል እውን ኣጠንቂቑ ።
ልዕሊ 13,000 ሰባት ብኮሮናቫይረስ ኣብ ዝተለኸፉላ ቺሊ፡ ህይወት 189 ሰባት ምስዚ ቫይረስ ብዝተሓሓዝ ጠፊኡ እዩ።ሙሉእ እቲ ዛንታ ኣብዚ ኣለኩም!
"ኣቱም ሰባት ኪዱ ንዓድኹም ተመለሱ፡ ምምዝጋብን ምቕባልን ተኸልኪሉ'ዩ!"
"ኣይንምለስን ኢና"
" ኣይንምለስን ኢና እንተይልኩም ንኽልተ ቕነ ክንውሽበኩም ኢና። ንኹሉ ወጻኢታት ከኣ ባዕላትኩም ኢኹም ክትሽፍንዎ"
"ገንዘብ የብልናን"
"ዳሕራይ ተሸጊርና ከይትብሉ ኣቐዲምና ንነግረኩም ኣሎና"
"ምርጫ የብልናን - ሕጂ ኣይንምለስን ኢና፡ ዝረኸበ ይርከበና!"
እዚ ኣብ ዶባት ራማ ክሳድ ዒቃ ዝተገብረ ዝርርብ እዩ።
እቶም ኣብ ሓለዋ ዶባት ዘለው ወተሃደራት ኢትዮጵያ፡ መንግስትና ስደተኛታት ምቕባል ስለዘቋረጸ ተመለሱ ምስበሉዎም ዝተገብረ ዝርርብ።
ኣብዚ እዋን'ዚ ኣብ ኢትዮጵያ ብኮማንድ ፖስት ተኣዊጁ ብዘሎ ናይ ውሸባ ፖሊሲ፡ ኩሉ ዶብ ሰጊሩ ዝመጽአ ስደተኛ ይኹን ኣብ ውሽጢ እታ ሃገር ዝርከብ ህዝቢ ናይ ግድን ንኽልተ ሰሙን ክውሸብ ኣለዎ።
እንተኾነ እቲ ፌዴራል መንግስቲ ኮነ ብሄራዊ ክልላዊ መንግስቲ ትግራይ መወሸቢ ማእከል ስለዘይብሎም፡ ነቶም ብራማ ዝኣተዉ ኤርትራውያን ኣብ ሓደ ዘይተወደአ ህንጻ እዮም ዝሕዝዎም ዘለው። ህዝቢ እታ ኸተማ ከኣ በብዓቕሞም ይሕግዙ ኣለው።
ኣቶ ተኪአ ዝተባህለ በዓል ጸጋ ትግራዋይ ነባሪ ከተማ ራማ ብርክት ዝበለ ኣሽሓት ወፍዩ ክሕግዞም ከምዝፈተነ ኣመሓዳሪ እታ ከተማ ይዛረብ።
ዳሕራይ ግን እቲ ቑጽሪ እናወሰኸ ምስ ከደ ከምዝኸበዶን ዝምልከቶ ኣካል ቖላሕታ ክገብረሎም ከምዝተማሕጸኑን ምንጭታትና ካብ ራማ ይሕብሩ።ዓለም ለኸ ሕጊ ስደተኛታትከ እንታይ ይብል?
ብለባዳ ኮሮናቫይረስ ሕሱም ካብ መንጎ ዝተሃሰያ ሃገራት ኣብ ዝኾና፡ ክልት ሃገራት ኤውሮጳን ሓንቲ ግዝኣት ኣመሪካን፡ ቁጽሪ መወትቲ ነክዩ።
ኣብ ጣልያን፣ ስፔን ከምኡ ድማ ኣብ ከተማ ኒውዮርክ፡ እዚ ሕማም ካብ ዝለዓል ጀሚሩ እቲ ዝበዝሐ ሞት ዝተርአየለን ከባብታት እንትኾና፡ እንተኾነ ኣብ ዝሓለፉ ተኸታተልቲ መዓልታት ብዝሒ መወትቲ እናነከየ ብምጻእ ትሑት ናብ ዝበሃል ብርኪ ከምዝወረደ ተገሊጹ።
ብዚ መሰረት፡ ኣብ ጣልያን ንሓደ ወርሒ መዓልታዊ ዝተመዝገበ ቁጽሪ መሰረት፡ ሎሚ እቲ ዝነኣሰ ቁጽሪ መወትቲ ተረኺቡ።
ብሓፈሽኡ ኣብ ጣልያን ዛጊድ፡ 26 644 ሰባት በቲ ለበዳ ህይወቶም ስኢኖም እዮም።
ብተመሳሳሊ፡ ስፔን ንሓደ ወርሒ ካብ ዝነበረ መዓልታዊ ቁጽሪ መወትቲ፡ ናይ ሎሚ ዝጎደለ ኾይኑ ተመዝጊቡ።
ብምዃኑ ድማ፡ ስፔን ነቲ ቅድሚ ሽደሽተ ሰሙን፡ ዝኣወጀቶ ኣዋጅ ዕጽዋ ኣላሕሊሓቶ። ዕድሚኦም ትሕቲ 14 ዓመት ዝኾኑ ህጻናት፡ ካብ ትማሊ ሰንበት ጀሚሩ ኣብ መዓልቲ ንሓደ ሰዓት ዝኣክል ካብ ገዘኦም ወጺኦም ክናፈሱን ክጻወቱን ፈቒዳ ኣላ።
ስፔን፡ ዛጊድ በቲ ለበዳ፡ 23,190 ሰባት ሞይቶምዋ።
አመሓዳሪ ከተማ ኒውዮርክብወገኑ፡ ካብ ዝሓለፈ ዓርቢ ጀሚሩ ቁጽሪ መወትቲ ፡ እናነከየ ምምጽኡ ተዛሪቡ።
ኣብ ዝሓለፉ መዓልታት ቁጽሪ መወትቲ ትሕቲ 400 ከምዝኾነን እናጎደለ ይመጽእ ከምዘሎን፡ እቲ ኣመሓዳሪ ወሲኹ ሓቢሩ።
እንተኾነ፡ ቁጽሪ መወትቲ እንተነከየ'ኳ፡ ቁጽሪ በቲ ቫይረስ ዝተሓዙ ሓደሽቲ ሰባት ስለዘይነከየ እቲ ኣዋጅ ዕጽዋ ኣይክፎክስን ኢሉ።
ፖሊስ ፈረንሳይ፡ ንፀሊም ዕዳጋ ዝተሓስበ ናይ ኣፍን ኣፍንጫን መሸፈኒ ከምዝመንጠለ ኣፍሊጡ።
ፖሊስ እታ ሃገር ነዚ ስጉምቲ ዝወሰደ፡ ሓደ ነጋዳይ ኣብ ከባቢ ፓሪስ ኣብ ዝርከብ ሓደ ገዛ፡ 140,000 ማስክ እንተራግፍ ብምርካቡ እዩ።
ፈረንሳይ፡ ኣብቲ ዝሓለፈ ወርሒ፡ ኩሎም ናብ ዕዳጋ ዝቐርቡን ዝፈርዩን ዘለዉ መሸፈኒ ኣፍን ኣፍንጫን፡ ንሰራሕተኛታት ጥዕና ክውዕሉ ምእዛዛ ይዝከር።
ለበዳ ኮሮናቫይረስ ንምክልኻል ስጉምትታት ምስወሰደት ድማ፡ ዋጋ መሸፈኒ ኣፍን ኣፍንጫን (ማስክ)፡ ኣብ ሹቓትን ኦንላይንን ብሰለስተ ዕፅፊ ወሲኹ እዩ።
ዛጊድ ኣብ መላእ ዓለም ቁጽሪ ብኮሮናቫይረስ ዝተትሓዙ ሰባት፡ 2,971,090 ዝበጽሐ ኾይኑ፡ ልዕሊ 200 ሽሕ ሰባት ድማ ሞይቶም።
ናይ ሎሚ መዓልቲ፡ ቀጥታዊ ጸብጻብና ኣብዚ ክነቕርበልኩም ጀሚርና ኢና ተኸታተተሉና። ብሩኽ መዓልቲ ክኾነልኩም ንምነ!