ኣብ ኤርትራ ሰለስተ ብኮሮናቫይረስ ተታሒዞም ዝነበሩ ሰባት ሓውዮም

ቀጥታዊ ሸፈነ

1. 21 ሚያዝያ 2020ኣብ ኤርትራ ሰለስተ ብኮሮናቫይረስ ተታሒዞም ዝነበሩ ሰባት ሓውዮም

   ኣብ ኤርትራ፡ ሰለስተ ብኮሮናቫይረስ ተታሒዝሞ ዝነበሩ ሰባት ሓውዮም ንግዝኦም ከምዝተፋነው ሚኒስትሪ ጥዕና ሓቢሩ።

   እቲ ሚኒስትሪ ሎሚ ኣብ ዘውጽኦ መግለጺ፡ እቶም ሰለስተ ሰባት ኣብ ሆስፒታል “ዘድልይ ክንክን ክግበረሎም ዝጸንሑ ሕሙማት ቫይረስኮሮና” ምዃኖም ገሊጹ።

   ንሳቶም፡ ኣብ ሃገራዊ ላበራቶሪ መርመራ ድሕሪ ምግባሮም'ዮም ካብቲ ሕማም ናጻ ምዃኖም ተረጋጊጹ።

   ብ18 ሚያዝያ 2020’ውን፡ ሰለስተ ካልኦት ሓውዮም ንገዝኦም ተፋንዮም ምንባሮም ይዝከር።

   በዚ መሰረት ካብቶም ኣብ ኤርትራ ብኮቪድ-19 ዝተለኽፉ 39 ሰባት፡ እቶም ሽዱሽተ ሓዊዮም ኣለዉ።

2. 21 ሚያዝያ 2020ኮሮናቫይረስ ሓያል ዓጸቦ ከስዕብ እዩ ተባሂሉ

   ለበዳ ኮሮናቫይረስ፡ ኣብ ሱዳንን ኮንጎን ሓያል ዓጸቦ ክስብዕ ከምዝኽእል ውድብ ሕቡራት ሃገራት ኣጠንቒቑ።

   ውድብ መግቢን ሕርሻን ዓለም ከምዝበሎ፡ ነቶም ኣብ ድሮ ጥምየትን ዓጸቦን ዝርከቡ ብሚልዮናት ዝቑጸሩ ሰባት ዘይተኣደነ ዕንወት ከስዕበሎም ከምዝኽእል ገሊጹ።

   በዚ ትካል ዝተዳለወ ጸብጻብ ከምዝሕብሮ፡ ብዝሒ ብጥምየት ዝሳቐዩ ሰባት ካብ 135 ሚልዮን ናብ 250 ሚልዮን ክድይብ ከምዝኽእል ሓቢሩ።

   እተን ዝተሃስያ ሃገራት የመን፡ ሶርያ ደቡብ ሱዳን፡ ኮንጎ፡ ቨኔዝዌላን ሃይቲን ከምኡ'ውን ኣፍጋኒስታን እየን።

3. 21 ሚያዝያ 2020ሓደ ሰራሕተኛ ውድብ ጥዕና ዓለም ኣብ ሚያንማር ብጥይት ተቐቲሉ

   ሓደ ሰራሕተኛ ውድብ ጥዕና ዓለም ኣብ ሚያንማር፡ ብዛዕባ ኮቪድ-19 ሓበሬታ ኣብ ዝእክበሉ ዝነበረ እዋን ተቐቲሉ።

   ፒያ ሶነ ዊን ማውንግ፡ ኣብቲ ጎንጺ ዝራኣየሉ ዞባ ራክሂን ብሓንቲ ናይ ውድብ ሕቡራት ሃገራት ኣርማ ዘለዋ መኪና እናተጓዕዘ እንከሎ፡ ሃንደበት ጥይት ከም ዝተተኮሰሉ ጸብጻባት ገሊጾም።

   ኣብዚ ቀረባ እዋን ኣብ መንጎ ሓይልተት መንግስትን ዕጡቓት ተቓወምቲ ብሄረ ኣራካንን ኣብ ዝተገብረ ግጭት፡ ብዓሰርተታት ዝቑጸሩ ሰላማውያን ሰባት ምቕታሎም ሕቡራት ሃገራት ገሊጹ።

   ሰራዊት መንግስቲን፡ እቲ ብሰራዊት ኣራካን ዝፍለጥ ጉጅለን ኣብቲ ትማሊ ሰኑይ ዝተፈጸመ ቅትለት ኢድ ከም ዘይነበሮም ገሊጾም ኣለዉ።

   ቤት ጽሕፈት ሕቡራት ሃገራት ኣብ ሚያንማር፡ ብሞት እቲ ወዲ 28 ዝተሰምዖ “መሪር ሓዘን” ገሊጹ።

   ውድብ ጥዕና ዓለም፡ ንሰራሕተኝኡ መን ከም ዝቐተሎ ዛጊት ዝኾነ መግለጺ ኣይሃበን ዘሎ።

4. 21 ሚያዝያ 2020ቁጽሪ ግዳያት ኮቪድ19 ልዕሊ 170 ሽሕ በጺሑ

   ብዓለም ደረጃ፡ ቁጽሪ ናይቶም ኮሮናቫይረ ከም ዘለዎም ዝተረጋገጸ ሰባት ኣስታት 2.5 ሚልዮን በጺሑ።

   ዛጊት 171, 152 በቲ ቫይረስ ሞይቶም ከም ዘለዉ’ውን ማዕከን ሓበሬታ ኣመሪካዊ ዩኒቨርሲቲ ጆንስ ሆፕኪንስ የረድእ።

   ቁጽሪ ዝተለኽፉ ካብዚ ንላዕሊ ክኸውን ከም ዝኽእል ይግመት። እቲ ዝወሃብ ዘሎ ቁጽሪ፡ ብመርመራ ዝተረጋገጸሎም ጥራይ ዘካትት’ዩ።

   ብዙሓት ሃገራት፡ ብሰንኪ ዋሕዲ መሰርሒ፡ እኹል መርመራ ክገብራ ኣይክኣላን ዘለዋ።

5. 21 ሚያዝያ 2020ሓድሽ ዜና, ኣብ ኢትዮጵያ ብዝሒ ብኮሮናቫይረስ ዝተትሓዙ ሰባት 114 በጺሑ

   ሚኒስትሪ ጥዕና ኢትዮጵያ ኣብ ዝሓለፉ 24 ሰዓታት፡ 745 ምርመራታት ከምዝተገበረን፤ በቲ ቫይረስ ዝተትሓዙ 3 ተወሰኽቲ ሰባት ከምዝተረኸቡን ኣፍሊጡ።

   በዚ ድማ ኣብ ኢትዮጵያ ብዝሒ ብኮሮናቫይረስ ዝተትሓዙ ሰባት 114 በጺሑ ኣሎ።

   ካብቶም በቲ ቫይረስ ከምዝተትሓዙ ዝተገለጹ ሓደሽቲ ሰባት፡ እቲ ሓደ ቻይናዊ ኾይኑ ኣብ ሰበታ ዝተረኸበ ክኸውን ከሎ፡ ክልቲኦም ድማ ነበርቲ ኣዲስ ኣበባ ኢትዮጵያውያን እዮም።

   ኢትዮጵያ፡ ክሳብ ሕዚ ብድምሩ 8698 ናይ ላብራቶሪ ምርመራታት ከምዘካየደት ትገልጽ።

   ኣብዚ እዋን፡ ኣብ ኢትዮጵያ 93 ሰባት በቲ ቫይረስ ተታሒዞም ክትትል ሕክምና ይግበረሎም ከምዘሎ ሚኒስተር ጥዕና ኢትዮጵያ ዶክተር ሊያ ታደሰ ኣፍሊጣ።

   ክሳብ ሕዚ ድማ፡ 16 ሰባት ካብቲ ሕማም ከምዝሓወዩ ይግለጽ።

   ኣብታ ሃገር፡ 3 ሰባት ብሕማም ኮሮናቫይረስ ህይወቶም ስኢኖም እዮም።

6. 21 ሚያዝያ 2020ኣብ ዴንማርክ፡ እንዳ መጸባበቒ ጸጉሪ ተባዕትዮ ብዓማዊል ተጨናኒቖም

   ዴንማርካውያን ነዛ ዕድል ድሕሪ ናይ ሓደ ወርሒ ዕጽዋ እዮም ረኺቦምዋ።

   እታ ሃገር ሕማም ኮሮናቫይረስ ንምግታእ ኢላ ዝኣወጀቶ ኣዋጅ ዕጽዋ፡ ክተፍኩሶ ትፍትን ኣለ።

   "ስራሕ ጽዒቑና እዩ ዘሎ። ንመጻኢ ክልተ ሰሙን ምሉእ ምስ ዓማዊል ቆጸራ ሒዝና ኣለና" ይብል በዓል ዋና፡ ፊልስ ባርበር።

   እቲ ዕጽዋ ኣብ ዝሓለፈ ዓርቢ ክፎክስ ምስተኣወጀ፡ ቆጸሮ ክሕዙ ዝድውሉ ዓማዊል ነቲ ቴሌፎን ከምዘጨናነቕዎ ይዛረብ።

   ካሊእቲ ቀምቃሚት ድማ፡ ንመጻኢ ሰለስተ ሰሙናት ምሉእ ትሕዝቲ ምዃና ንቢቢሲ ገሊጻ።

   ካልኦት ትካላት ጽባቐ፡ ከም ቤት-ውቃጦ፣ ኣብያተ ምምልኻዕ ውን ክኸፈቱ ተፈቒዱ እዩ።

   እንዳ ሕክምና-ስኒ፡ ሕክምና ዓይንን እውን ብተመሳሳሊ ክኽፈቱ ተፈቒድሎም እዩ።

   ነፍሲወከፎም ድማ፡ ከመይ ክሰርሑ ከምዘለዎም መምርሒ ተዋሂቢዎም ኣሎ።

7. 21 ሚያዝያ 2020ደቡብ ኣፍሪቃ ኣብ ልዕሊ ሓደ ዓብዪ ግዝኣታ ኣዋጅ ዕጽዋ ኣንቢራ

   መንግስቲ ደቡብ ኣፍሪቃ ኣብ ገምግም ባሕሪ እትርከብን በቲ ቫይረስ ኣዝያ ዝተጠቕዐትን ከተማ ደርባን ጀሚሩ ኣብቲ ሰፊሕ ግዝኣት ዝትግበር ኣዋጅ ዕጽዋ ኣንቢሩ።

   እዚ ግዝኣት፡ ክዋ-ዙሉ ናታል ዝበሃል ክልል እዩ።

   ካብቶም 52 በቲ ቫይረስ ዝሞቱ ደቡብ ኣፍሪቃውያን እቶም 21 ደቂ እዚ ግዝኣት እዮም።

   ካብ 600 ንላዕሊ ድማ፡ በቲ ቫይረስ ዝዘተትሓዙ ዜጋታት ኣብዛ ግዝኣት ይርከቡ።

   ኣብታ ሃገር ንምልባዕ እቲ ቫይረስ ቀንዲ ጠንቂ ምዃና እዩ ዝዝረብ።

   50 ሰብ-ሞያ ጥዕና፡ በቲ ቫይረስ ዝተለኸፉ ኾይኖም፡ ሰለስተ ዓበይቲ ሆስፒታላት ክዕጸው ተገይሩ እዩ።

   እዚ ምስ ኮነ፡ መንግስቲ ብፍላይ ኣብዛ ግዝኣት ትርር ዝበለ ኣዋጅ ዕጽዋ ዘንበረ።

   ዛጊድ ነቲ በኽልል ደረጃ ዝተኣወጀ ውሳነ ዝጠሓሱ 1500 ሰባት ተአሲሮም።

8. 21 ሚያዝያ 2020ትራምፕ፡ ናብ ኣመሪካ ዝግበር 'ኹሉ ዓይነት' ስደት ደው ከብሎ ምዃኑ ገሊጹ

   ትራምፕ፡ ኣብዚ ናይ ለበዳ እዋን ናብ ኣመሪካ ዝግበር ዝኾነ ዓይነት ስደት ደው ከብሎ ምዃኑ ገሊጹ።

   ፕረዚደንት ኣመሪካ ዶናልድ ትራምፕ፡ ብሰንኪ ኮሮናቫይረስ፡ ወጻእተኛታት ናብታ ሃገር ኣትዮም ምንባርን ምስራሕን ክኽልክሎ ምዃኑ ገሊጹ ኣሎ።

   ምኽንያቱ ድማ፤ ንምክልኻል ለበዳ እቲ “ዘይረኣይ ጸላኢ” ክብል ዝገለጾ ኮሮናቫይረስን “ዕድል ስራሕ ኣመሪካውያን ንምውሓስን” ምዃኑ ጠቒሱ።

   ትራምፕ ‘ንኹሉ ዓይነት ናብታ ሃገር ዝግበር ስደት’ ክእግድ እየ ካብ ምባል ወጻኢ ዝርዝር ኣይሃበን።

   ነቐፍቲ ድማ፡ ትራምፕ ብኮሮናቫይረስ ኣሳቢቡ፡ ኣብ ልዕሊ ስደተኛታት ስጉምትታት ከወስድ ስለዝደለየ እዩ ኢሎም።

   ኣመሪካ ምስ ካናዳን ሜክሲኮ ንዝዝገበረቶ ስምምምዕ፡ ብዶባት ንዝግበር ‘ኣገዳሲ ዘይኮነ ጉዕዞ’ ክሳብ መፋርቕ ጉንበት ኣጊዳቶ እያ ዘላ።

   ካብ ኣውሮጳን ቻይናን ንዝበግሩ ጉዕዞተት እውን ገዲባቶ እያ።

   እንተኾነ፡ ግዚያዊ ናይ ስራሕ ፍቓድ ዘለዎም ሰባት፣ ተምሃሮን ንንግዳዊ ንጥፈት ዝጓዓዙን ሰባት ክኣትዉ ክትፈቅድ እያ ጸኒሓ።

9. 21 ሚያዝያ 2020ኣብ ታንዛንያ፡ ሓደ ኣባል ባይቶ ኮሮናቫይረስ ስለዝተረኸቦ ስግኣት ፈጢሩ

   ሓደ ኣባል ሃገራዊ ባይቶ ታንዛንያ በቲ ቫይረስ ስለዝተትሓዘ ኣብ'ቲ ባይቶ ሓያል ስግኣት ፈጢሩ።

   እቲ ባይቶ ዘካይዶም ኣኼባታት ጠጠው ከብሉ ድማ ጻውዒት ቀሪቡ ኣሎ።

   ምክትል ኣፈ ጉባኤ እቲ ሃገራዊ ባይቶ፡ ስም እቲ ኮሮናቫይረስ ዝተረኸቦ ኣባል ከይጸርሐ፡ ኣብ ቀረባ እዋን ናብ'ታ ናይ ቁጠባን ንግድን ማእከል እታ ዓዲ ዝኾነት ከተማ ዳረሰላም ተጓዒዙ ከምዝነበረ ተዛሪቡ።

   ቅድሚ ሰለስተ ሰሙን ኣቢሎም ዝተጀመሩ ኣኼባታት'ቲ ባይቶ ዛጊድ ኣይተወድኡን።

   እንተኾነ ቁጽሪ ተኣከብቲ ኣባለት እቲ ባይቶ ነክዩ እዩ ተራእዩ።

   ኣፈ ጉባኤ እቲ ባይቶ ኣኼባታት ክቋረጹ የብሎምን በሃሊ እዩ።

   ገለ ኣባለት እቲ ባይቶን ፖለቲከኛታትን፡ ለበዳ እቲ ቫይረስ ንምግታእ ኣዋጅ ዕጽዋ ክውሰን ክሓቱ ቐንዮም።

   እንተኾነ፡ ኣፈ ጉባኤ እቲ ባይቶን ፕረዚደንት እታ ሃገርን ግን ዕጽዋ ኾነ ካሊእ ትርር ዝበለ ስጉምቲ ከይውሰድ ቅዋም ሒዞም።

   ኣብታ ሃገር፡ ዛጊድ ቁጽሪ በቲ ቫይረስ ዝተትሓዙ ሰባት፡ 254 ዝበጽሐ ኮይኑ፡ 10 ድማ ሞይቶም።

10. 21 ሚያዝያ 2020ጣልያን፡ ብዝሒ ብኮሮናቫይረስ ተታሒዞም ዘለዉ ሰባት ብምንካዩ ተስፋ ፈጢ

    ኣብ ጣልያን ብዝሒ ብኮሮናቫይረስ ቫይረስ ተታሒዞም ሕክምና ዝረክብ ዘለዉን ኣብ ገዝኦም ኣብ ምሕዋይ ዝርከቡን ሰባት ብዝሖም ከምዝነከየ ሰብ መዚ ገሊጾም።

    እዚ ከኣ፡ እቲ ለበዳ ካብ ዝጅምር ኣትሒዙ፡ ካብቲ ዝነበሮ ክንክይ እንተሎ ንፈለማ እዋን እዩ።

    ትማሊ ሰኑይ፡ በቲ ቫይረስ ተታሒዞም ናይ ዘለዉ ሰባት ብዝሒ 108,237 ዝነበረ ኾይኑ፡ ካብቲ ናይ ሰንበት ዝነበረ ብ20 ዝጎደለ እዩ።

    ሰብ መዚ ከምዝብልዎ፡ እቲ ዝነከየ ቁጽሪ ክረኣይ ከሎ ውሑድ እኳ እንተኾነ “ጽቡቕ ምዕባለ” ዘመላኽት እዩ ኢሎም።

    ኣብ ጣልያን ዝተኣወጀ ዕጽዋ ክሳብ 3 ጉንበት ዝቕጽል ኮይኑ፡ ገለ ናይ ንግዲ ቦታታት ግን ክኽፈቱ ጀሚሮም ኣለዉ።

    ካብቶም ዝኽፈቱ ዘለዉ ድማ፡ እንዳ መጻሕፍቲ፣ መሸጢ መሳርሕታት ጽሕፈት፣ መሸጢ ክዳውንቲ ህጻናት ይርከቡዎም።