Mareykanka: Ciidammada Soomaaliya ma lahan awood ay uga adkaan karaan Shabaab

Tebin toos ah

1. 25 Juunyo 2020Rag loo xidhay inay carruur ku gadayeen barta Instagram

   Saddex nin ayaa lagu qabtay dalka Iiraan iyagoo looga shakiyay inay isku dayayeen inay ku iibiyaan laba cunug barta Instagram.

   Taliyaha booliska magaalada Tehran, Brig-Gen Hossein Rahimi, ayaa sheegay in mid ka mid ah carruurtaasi uu jiray 20 maalmood. Halka ka kalena uu jiray laba bilood.

   Dhallaankan ayaa hore loogu soo iibsaday $ 500 (£ 400), waxaana lagu sii iibin jiray inta u dhaxaysa $ 2,000 iyo $ 2,500.

   Mid ka mid ah dadka la qabtay ayaa la sheegay inuu "caruurta ka keenay qoysaska saboolka ah" isagoo damacsana inuu "u gacan geliyo qoysas siin kara mustaqbal wanaagsan".

   Halkan ka akhri faahfaahinta:

2. 25 Juunyo 2020Cudurka Ebola oo ka dhamaaday Waqooy Bari Jamhuuriyadda Dimuqraadiga ee Congo

   Ha'yadda Caafimaadka Adduunka ayaa ku dhawaaqday in cudurka Ebola uu ka dhamaaday Waqooy Bari Jamhuuriyadda Dimuqraadiga ee Congo kaddib markii uu cudurka ka dilaacay halkaas bishii Agosto ee sannadkii 2018-kii.

   Dr Matshidiso Moeti oo ah agaasimaha ha'yadda WHO ayaa sheegtay in arrintani la shaaciyay markii la sameeyay dadaallo wadajir ah iyo iskaashi ay la sameeyeen ha'yadaha kala duwan ee dowladda oo lagu xakameynayo cudurka.

   Wuxuu ahaa safmarkii labaad ee Ebola kaddib markii cudurka uu si weyn ugu baahay dalalka ku yaalla galbeedka Afrika sannadkii 2014-kii.

   Meelaha sida baahsan uu u saameeyay waxaa kamid ahaa gobolka Ituri iyo sidoo kale gobollada North iyo South Kivu.

3. 25 Juunyo 2020Khilaafka Guddoonka labada gole ee Soomaaliya

4. 25 Juunyo 2020Korona iyo dumarka Soomaaliya: Qiyaasaha dowladda oo su'aal la geliyay

   Ha'yadda caalamiga ah ee IRC ayaa ka digtay in laga gaabiyay tebinta kiisaska rasmiga ah ee ku saabsan haweenka uu ku dhacay cudurka Corona ee dalalka qaar sida, Chad, Jamhuuriyadda Bartamaha Afrika iyo Soomaaliya.

   Ha'yadda waxay sheegtay inay jirto cabsida ah in haweenka ku nool dalalka Soomaaliya, Yemen iyo Afqanistaan aanan laga baarin cudurka marka ay socdaan dadaallada lagu xakameynayo safmarka.

   Waxay sidoo kale sheegtay in kiisaska ay dawladahan shaaciyeen ee dumarka ay si aad ah uga hooseeyaan tirada ragga uu ku dhacay Covid-19.

   Soomaaliya iyo Afqanistaan kiisaska haweenka uu ku dhacay cudurka waxay yihiin boqolkiiba 28 halka kiisaska ragguna ay yihiin 72%.

   Ha'yadda waxay ka dhawaajisay in arrintani aysan macquul aheyn maadama dumarka ku nool waddamadan ay halis ugu jiraan feyraska.

5. 25 Juunyo 2020Darasaad ka hadleysa aqoon la'aanta horseeday in laga faa'ideysan waayo kheyraadka badda Soomaaliya

   Daraasad cusub oo ay soo bandhigeen Mac-hadka Heritage iyo Jaamacadda City ee Muqdisho ayaa lagu sheegay in aqoon iyo xirfad la'aan ka jirta Soomaaliya ay keeneen in si wacan looga faa'iideysan waayo kheyraadka badda.

   Soomaaliya ayaa kamid ah wadamada ugu xeebaha dheer Afrika, sidaa oo ay tahayna dadkeeda waxa ay kamid yihiin kuwa ugu saboolsan qaaradda. Dr Cabdiraxaam Jaamac Kulmiye oo qoray warbixintan ayaan ka waraystay waxyaabaha ay ku ogaadeen. Wuxuu u warramay Cabdiraxmaan Cali Dhimbiil.

6. 25 Juunyo 2020Mareykanka: Ciidammada Soomaaliya ma lahan awood ay uga adkaan karaan Shabaab

   Waaxda arrimaha dibadda Mareykanka ayaa sheegtay in ciidammada Soomaaliya aysan laheyn awood ay Al Shabaab uga saari karaan deegaannada ay ku xooggan yihiin.

   'Dalku wuxuu si weyn ugu tiirsan yahay tageerada ay siiyaan dalalka shisheeye gaar ahaan dadaallada ay geliyaan arrimaha amniga' ayaa lagu yiri warbixin ku saabsan howlaha argagixisada sannadka 2019-ka ee uu Mareykanku soo saaray.

   Warbixinta ayaa sidoo kale lagu sheegay in 'Al Shabaab' uu dakhli kasoo galo dhoofinta dhuxusha iyo canshuurta ay qaadaan ganacsatada iyo shacabka'

   Ururka Al Shabaab ayaa gacanta ku hayaa deegaanno badan oo ka tirsan dalka, waxay sidoo kale weeraro ka geysteen dalka Kenya.

7. 25 Juunyo 2020Nin ku taajiray hal maalin gudahood kaddib markii uu helay dhagaxaan qaali ah

   Nin u dhashay dalka Tanzania ayaa hal maalin gudahood ku taajiray kaddib markii uu helay labo dhagaxaan oo qaali ah- kuwaas oo lagu sheegay dhagxantii ugu weyneyd ee dalkaas laga soo saaro.

   Ninkan oo lagu magacaabo Saniniu Laizer wuxuu helay 3.4 malyan oo doolar kaddib ay dhagaxaanta ka iibsatay wasaaradda macdanta ee Tanzania.

   Dhagaxaantaas ayaa laga helaa waqooyiga Tanzania oo kaliya ah, waxaana laga sameeyay qalabka laisku qurxiyo sida dhega-dhegaha.

   Saniniu Laizer wuxuu sheegay in maanta uu qaban doono munaasabad weyn uu ugu dabaaldegayo farxadda.

   Waxaa uu sheegay in uu dhiso iskuul iyo sidoo kale xarun weyn oo laga dukaameysto.

   Madaxweynaha Tanazania ayaa telefoon u diray ninka dhagaxanta soo helay , waanu u hambalyeeyay.

8. 25 Juunyo 2020

   Kulan wacan saaxibbayaal kusoo dhawaada tebinta tooska ah oo aan idiin kuugu soo gudbinno wararkii ugu dambeeyay soomaalida iyo caalamka.