ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
වෙලේසුදාට, බිරිඳට සහ ඥාති සහෝදරියකට සිරදඬුවම්
මත්ද්රව්ය ජාවාරම් කරුවකු බව කියන ගම්පොළ විදානලාගේ සමන්ත කුමාර හෙවත් වෙලේසුදා, ඔහුගේ බිරිඳ සහ තවත් ඥාති සහෝදරියකට කොළඹ මහාධිකරණය අද (ජනාවාරි 15 වැනිදා) බරපතළ වැඩ සහිත වසර 08 බැගින් සිර දඬුවම් නියම කළේය.
ඒ, හෙරොයින් මත්කුඩු ජාවාරම තුළින් උපයාගත් රුපියල් කෝටි 17 කට අධික දේපළ හා මුදල් උපයා ගැනීම තුළින් මුදල් විශුද්ධිකරණය වැළැක්වීමේ පනත යටතේ ගොනු කර තිබූ චෝදනාවලට වරදකරු කරමිනි.
දීර්ඝ නඩු විභාගයකින් අනතුරුව කොළඹ මහාධිකරණ විනිසුරු ආදිත්ය පටබැඳිගේ විසින් තීන්දුව ලබා දෙනු ලැබීය.
නඩුවේ විත්තිකාරියන් ලෙස නම් කර සිටි වෙලේසුදාගේ බිරිඳ වන ගයනී ප්රියදර්ශනී සහ ඥාති සොහොයුරියක වූ වසන්ති වසුන්දරා යන අයටද දඬුවම් නියම විය.
එමෙන්ම මෙම නඩුවේ පළමුවන විත්තිකාරිය වශයෙන් නම් කර සිටි වෙලේ සුදාගේ බිරිඳවන ගයනී ප්රියදර්ශනී නමැත්තියට රුපියල් කෝටි 12 කට අධික දඩයක්ද ගම්පොළ විදානලාගේ සමන්ත කුමාර හෙවත් වෙලේසුදා ට රුපියල් කෝටි තුනකට අධික දඩයක්ද නියම කෙරුණි.
කෝටි 17 ක වත්කම් රාජසන්තක කිරීමට නියෝග
නීති විරෝධී ලෙස උපයාගත් රුපියල් කෝටි 17 කට අධික දේපළ, මුදල් හා රන් භාණ්ඩ රාජසන්තක කිරීමටත් විනිසුරුවරයා නියම කළේය.
තීන්දුව ප්රකාශයට පත් කරමින් මහාධිකරණ විනිසුරුවරයා සඳහන් කළේ මෙම නඩුවේ පළමුවන විත්තිකාරිය සහ දෙවන විත්තිකරු අඹු සැමියන් බැවින් ඔවුන්ට එරෙහිව කුමණ්ත්රන චෝදනා පවත්වාගෙන යා නොහැකි බවට විත්තිකරුවන් විසින් ඉදිරිපත් කළ තර්කය පිළිගත නොහැකි බව ය.
මුදල් විශුද්ධිකරණය වැළැක්වීමේ පනතේ 4 වන වගන්තියට අනුව යම් පුද්ගලයකු විසින් අත්පත් කර ගෙන සිටින නිශ්චල සහ චංචල දේපල නීත්යානුකූල ආදායම් මාර්ගයකින් අත්පත් කරගත් බව ඔප්පු කිරීමට අසමත් වන අවස්ථාවක එම දේපළ නීති විරෝධී ලෙස අත්පත් කරගත් දේපළ ලෙස සැලකෙන බව විනිසුරු වරයා සඳහන් කළේය.
ඒ අනුව විත්තිකරුවන් ණය දෙන ආයතනයක්, එනම් පුද්ගලික සමාගමක් පවත්වාගෙන ගිය බව සඳහන් කර තිබුණද එම සමාගමේ ලේකම්වරියගේ සාක්ෂියට අනුව එම සමාගම ලියාපදිංචි කර තිබුණද එය සක්රිය ලෙස පවත්වාගෙන නොයාම හේතුවෙන් එහි ලියාපදිංචි ඉවත් කර තිබූ බව අනාවරණය වූ බවත් විනිසුරුවරයා පෙන්වා දුන්නේය.
විත්තිකරුවන්ට වෙනත් ස්වාධීන ආදායම් මාර්ගයක් තිබූ බව නඩු විභාගයේ දී කරුණු අනාවරණය නොවූ පෙන්වා දුන් විනිසුරුවරයා ඒ අනුව මෙම නඩුවට පාදක වන නිශ්චල සහ චංචල දේපල හෙරොයින් ජාවාරම තුළින් උපයාගත් මුදල් වලින් අත්පත් කර ගෙන තිබෙන බව පැහැදිලි වන බවත් සඳහන් කර සිටියේ ය.
මෙලෙස නීතිවිරෝධී ලෙස උපයා ගත් මුදල් විශුද්ධිකරණය කිරීම සඳහා මෙම විත්තිකරුවන් එකඟතාවයක් ඇතිව කටයුතු කර තිබෙන අතර ඒ අනුව විත්තිකරුවන් මුදල් විශුද්ධිකරණ චෝදනාවලට වරදකරු කරන බවත් සඳහන් කළේය.
ඉන් අනතුරුව විත්තිකාර. වෙලේසුදා හා ඔහුගේ බිරිඳ වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් තම සේවාදායකයින් තිදරු මව්පියන් බවත් ඔවුන්ගේ එක් පුත්රයෙකු හෘද රෝගී තත්ත්වයකින් පසුවන බවත් සඳහන් කර සිටියහ.
මෙම වරද සිදු වූ කාල සීමාවේ තම සේවාදායකයා (වෙලේසුදා) විදේශ ගතව සිටි අතර මෙම සියලු කරුණු සැලකිල්ලට ගෙන ලිහිල් දඬුවමක් නියම කරන ලෙසත් එම නීතිවේදීන් අධිකරණයෙන් ඉල්ලා සිටියේ ය.
තුන්වන විත්තිකාරිය වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින් තම සේවාදායිකාව දෙදරු මවක් වන අතර ඇයට පෙර වැරදි නොමැති බවත් සඳහන් කළේය.
මෙම කරුණු සැලකිල්ලට ගෙන ඇයට ලිහිල් දඬුවමක් නියම කරන ලෙසත් නීතිඥවරයා අධිකරණයෙන් ඉල්ලා සිටියේ ය.
දඩුවම් නියම කිරීමට පෙර අධිකරණය හමුවේ කරුණු දැක්වූ පැමිණිල්ල වෙනුවෙන් පෙනී සිටි නියෝජ්ය සොලිසිටර් ජෙනරාල් සුදර්ශන ද සිල්වා අධිකරණය හමුවේ කරුණු දක්වමින් මෙම විත්තිකරුවන් නීති විරෝධී ලෙස මෙම නිශ්චල සහ චංචල දේපල අත්පත් කරගෙන ඇති බව තහවුරු වී ඇති බැවින් මෙවැනි වැරදි කරන පුද්ගලයින්ට හා සමාජයට පණිවුඩයක් දියහැකි සුදුසු දඬුවමක් නියම කරන ලෙස අධිකරණයෙන් ඉල්ලා සිටියේය.
ඉදිරිපත් වූ සියලු කරුණු සලකා බැලූ විනිසුරු වරයා මෙම තීන්දුව ප්රකාශයට පත් කළ අතර තම තීන්දුවට එරෙහිව අභියාචනයක් ඉදිරිපත් කිරීමට විත්තිකරුවන්ට අවස්ථාව තිබෙන බවත් සඳහන් කර කළේය.
චෝදනා මොනවාද?
2010 වසරේ ජනවාරි මස 01 වනදා සහ 2012 වසරේ අප්රේල් මස 25 වනදා අතර කාලසීමාව තුළ හෙරොයින් මත්කුඩු ජාවාරම තුළින් උපයාගත් රුපියල් කෝටි 17කට අධික නිවාස, දේපළ, මුදල්, ස්වර්ණාභරණ අත්පත් කර ගැනීම තුළින් මුදල් විශුද්ධිකරණය වැළැක්වීමයි පනත යටතේ වරදක් සිදුකළ යැයි චෝදනා කරමින් නීතිපතිවරයා විසින් විත්තිකරුවන්ට එරෙහිව මෙම නඩුව ගොනු කර තිබිණි.
රාජසන්තක වූ වත්කම් මොනවා ද?
හෙරොයින් මත්කුඩු ජාවාරම තුළින් උපයාගත් මුදල් වලින් අත්පත් කරගෙන තිබූ රාජගිරිය රෝයල් පාක් සුපිරි නිවාස සංකීර්ණයේ සහ බගතලේ පාරේ මෙන්ම මැකාදි සුපිරි නිවාස සංකීර්ණයේ පිහිටි රුපියල් කෝටි ගණනක් වටිනා නිවාස කිහිපයක් , අධි සුඛෝපභෝගී වාහන 4ක් හා රන් ආභරණ කිලෝ තුනහමාරක් රාජසන්තක කිරීමට විනිසුරුවරයා නියෝග කළේය.
ඊට අමතරව විත්තිකරුවන්ගේ නමින් පවත්වාගෙන ගිය රුපියල් එක්කෝටි විසි ලක්ෂයකට අධික මුදල් තැන්පතු සහිත බැංකු ගිණුම් කිහිපයක් ද රාජසන්තක කිරීමට ද නියෝග කෙරුණි.