Leabhar Fiosrachaidh: Iain O'Sullivan

Rugadh 1700. Bhàsaich – chan eil fios.

B’ e Èireannach a bh’ ann an Iain O’Sullivan a bha na dheagh charaid aig a’ Phrionnsa Teàrlach. Coltach ris a’ Mhorair Seòras Moireach, b’ e duine glè chudromach ann an arm nan Seumasach a bh’ ann.

• B’ e obair O’ Sullivan an t-arm a chur an òrdugh agus dèanamh cinnteach gu robh biadh agus armachd gu leòr aca agus gu robh iad far am bu chòir dhaibh a bhith!
• Cha bu toil leis am Moireach agus bha iad an còmhnaidh a’ dol a-mach air a chèile.
• Chuir mòran dhaoine a’ choire air O’ Sullivan airson gun do chaill na Seumasaich blàr Chùil Lodair. Ach b’e saighdear le mòran eòlais a bh’ ann agus bha e fìor mhath air obair!
• Chuidich O’ Sullivan ann a bhith a’ dèanamh aon de na co-dhùnaidhean as cudromaiche san Ar-a-mach.
• Cha robh am Moireach airson gun deidheadh iad a shabaid air mòinteach Dhruim Athasaigh aig Cùil Lodair. Shaoil e gu robh an talamh ro bhog agus ro chòmhnard. Shaoil am Prionnsa Teàrlach gu robh am Moireach ceàrr. Dh’aontaich O’ Sullivan leis a’ Phrionnsa agus chaidh am blàr air adhart. Chaill na Seumasaich!
• As dèidh an Ar-a-mach theich O’Sullivan don Fhraing.