You’re viewing a text-only version of this website that uses less data. View the main version of the website including all images and videos.
Di Three Lions of England welcome Ukraine to Wembley wit di aim of recording dia second Euro 2024 qualification victory.
Moseph Ekine
Despite dia slow start to di game, Saka and England produce two quick goals to defeat Ukraine for Wembley.
Na here we go end our live coverage of di qualifier.
We go bring you live update of di Afcon qualifier between Guinea Bissau and Nigeria on Monday by 5pm.
Make you scroll down to read more of how England defeat Ukraine to stay top of Group C.
England maintain dia perfect start to qualification for Euro 2024 as first half goals from Harry Kane and Bukayo Saka help dem defeat Ukraine 2-0 for Wembley.
Di Three Lions bin no start well and bin rely on di brilliance of Saka to take hold of di match.
Saka produce fine cross down di right for Kane wey jab im cross into di net on 37 minutes.
Kane wey become England all time top scorer on Thursday wit 54 goals stretch di record even further wit im effort tonight.
Before Ukraine go know wetin dey happun, England stretch dia lead three minutes later through Saka.
Di Arsenal wideman curl im shot beautifully into di top corner afta im receive di ball from Henderson.
England boss much of di second half and Ukraine get dia goalkeeper Trubin to tank as im ensure say di scoreline remain di same.
Im first save from Gallagher late into di game before im deny Maguire deep into injury time.
Victory see England record dia second group win in four days as dem dey top of Group C wit maximum points from two matches.
England see out di match afta dem do di damage to Ukraine for di first half.
Goals from Harry Kane and Bukayo Saka see di Three Lions maintain dia fine start to qualification for Euro 2024.
England 2-0 Ukraine
Ukraine make another substitution as Konoplyanka come on for Stapanenko.
England 2-0 Ukraine
Gallagher almost open im account for England wit im first touch of dis match.
Di midfielder connect wit Chilwell cross down di left. Trubin save di shot well go out for corner kick.
From di corner, Maguire head di ball towards goal but Trubin again ensure say di score remain di same.
England 2-0 Ukraine
Conor Gallagher and Jack Grealish don enter di game in place of Bellingham and Maddison.
England get five more minutes plus added time to see out dis match.
England 2-0 Ukraine
Gareth Southgate make im move.
Di Emgland coach don take off Kane come replace am wit Toney.
Stadium announcer say na over 83,000 pipo gada for Wembley.
England 2-0 Ukraine
Brentford striker Ivan Toney dey about to come on for im England debut.
England 2-0 Ukraine
Ukraine make anoda substitution.
Artem Dovbyk don replace Yaremchuk.
England 2-0 Ukraine
Afta a period of midfield play England up di tempo wit Kane, di Spurs man find Bellingham down by di left.
Wit Saka and Maddison inside di box, di Dortmund midfielder cross no reach any of dem as Svatok clear di ball
Ukraine launch dia own counter but England clear dia lines.
England 2-0 Ukraine
Malinovskyi don collect yellow card afta im bring down Saka just by di eighteen yard box.
Di Arsenal man receive Henderson layoff from di freekick, im try to curl another one in but di ball fly high and over.
England 2-0 Ukraine
Di tempo of di game don drop small wit those substitutions.
England no go care much as dem firmly dey in di lead.
For Ukraine, dem need to score di next goal to stand any chance of getting something from dis game.
Ukraine make three changes wit hope say dem fit fight back into dis match.
Tsygankov, Buyalskiy and Sobol don come on for Mudryk, Karavaev and Mykolenko respectively.
England never make any change so far.
England 2-0 Ukraine
Saka send in teasing low cross inside di area but no one fit connect wit di ball.
Coach Gareth Southgate go dey impressed wit wetin im dey see from e side but go like make dem stretch dia lead.
England 2-0 Ukraine
Maddison wit good turn confuse im marker just near di penalty area.
Di crowd love di move but not di finish though as di midfielder sky im shot aftawards.
England 2-0 Ukraine
England win consecutive corner kicks but Ukraine clear any danger from di two corner kicks.
England 2-0 Ukraine
Ukraine restart play as dem go hope to bounce back from dia poor first half showing.
Di visitors stuggle to create any meaningful opportunity whereas di hosts finish di first half strongly.
What a way to end di first half!
Two quick goals from Kane and Saka see di hosts head into di break wit a good lead.
Di Arsenal man create di first for Kane before e hit wonderful strike past di goalkeeper three minutes later.
England 2-0 Ukraine
Those two back-to-back goals don give di Three Lions confidence.
Dis time Kane test di Ukrainian goalkeeper wit a shot down di right.
Trubin save im shot well
England 2-0 Ukraine
Saka receive pass from Henderson, im hold off e marker before e come curl e shot straight into di net. Wow!