Pop Star Ariana Grande go pay her ex $1.25m as divorce settlement

Di divorce between US singer Ariana Grande and Dalton Gomez don dey official, afta dia nearly three years of marriage.

One Los Angeles Superior Court judgment on Tuesday finalise di separation between di 30-year-old pop star and di 28-year-old real estate broker.

Under dia settlement, Grande go make a one-time payment of $1.25m (£980,000) to Mr Gomez.

Grande file for divorce six months ago, citing irreconcilable differences.

Di couple relationship start for January 2020 shortly before di Covid-19 pandemic, and dem wed for one "tiny and intimate" ceremony for her house for Montecito, California, for May 2021.

In addition to di one-time payment, di settlement also award Mr Gomez half di money from di sale of dia Los Angeles home.

Grande go also pay up to $25,000 towards im lawyers fees, and no future alimony.

According to court papers, di two separate more dan one year ago and dem bin get prenuptial agreement in place. Dem no also get any legal disputes, and dem no get children, so e allow di divorce to dey finalised quickly.

Mr Gomez, wey grow up for southern California, don dey work for di luxury real estate market for ten years, according to im profile for di AKG website.

Dem first spot im and Grande dey kiss for February 2020 for one restaurant for Los Angeles.

For May dat year, dem make dia first public appearance togeda as a couple for di lockdown music video for Grande and Justin Bieber collaboration, Stuck With U.

Dat December, di pop star announce her engagement for one Instagram post, with di caption "Forever n then some".

Grande, wey be a two-time Grammy Award winner, release her seventh studio album, titled Eternal Sunshine, on 8 March.

She go also dey di film adaptation of di musical Wicked, as di good witch Glinda, along with English Tony-award winning actress Cynthia Erivo, Oscar-winning Malaysian actress Michelle Yeoh and US actor Jeff Goldblum.

Di film dey scheduled to dey released for November.

For 2017, one terrorist detonate suicide bomb afta one Grande performance for di Manchester Arena for UK, 22 pipo die.