دښارغږ: د ښوونځي دوسايلوساتل

په دې وروستيو څو کلونو کې ډير ښونځي جوړ شوي او يا هم پخواني مکتبونه ترميم شويدي او نوي وسايل ورته چمتو شويدي.

يوشمير زده کوونکي بيا د ښوونځو له وسايلو لکه، ميز، څوکۍ او داسې نوروسره بې غوري کوي. دکابل په ښارکې د يوه ښوونځي ښوونکي فتاح وايي:

"د کال په پيل کې يې زموږ ښوونځي ته په پوره اندازه ميز او څوکۍ راوړې وې، خو اوس يې ډيرې ماتي شوې او د استفادې وړ نه دي."

خو که ميزونه او چوکۍ نه وې، زده کونکو ته به کومې ستونزې پيدا شي؟ په دې اړه د دريم ټولګې يو زده کوونکی تميم وايي:

"زه له ټاکلی وخت نه مخکې ښوونځي ته راځم چې د ناستې لپاره څوکۍ ونيسم. موږ څو تنه په يوه څوکۍ کينو او ډيري ستونزې لرو."

د اووم ټولګې زده کوونکی بلال بيا وايي: "زموږ د ښوونځي اڼګړسپيره دی، کړکۍ اودروازې يې ماتې دې،

دا شيان په خپله زده کوونکو مات کړي او اوس يې زيان بېرته دوی ته رسيږي." د غلام حيدرخان د ښوونځي يو زده کوونکي رحمت الله وايي:

"موږ د ښوونځي د مدير او ښوونکو په مرسته د کال په پيل کې د ګلانو او چمن تخمونه واخيستل او اوس مو د ښونځی انګړ تک شين دی."

د مخفي بدخشي دښوونځي ښوونکې فوزيه وايي:

"پخوا زموږ په ښوونځي کې دا ستونزه وه چې زده کوونکو به د ښوونځي وسايل ماتول. خو اوس دا ستونزه نه لرو.

په خپله د زده کوونکو له ډلې څخه مو يو څو تنه انضباطان وټاکل، هغوی له خپلو درسونو سره د ښوونځي د وسايلو د ساتنې په برخه کې هم کارکوي او نه پريږدي چې څوک کوم څه مات کړي."
.

د چاريکارو د ښار يوه اوسيدونکې رحيمه چې يوه مورده وايي: "ما خپل اولادونه پوهولی چې د ښوونځي وسايل مات نه کړي،

ځکه بيا دوی خپله له ستونزوسره مخ کيږي، که نن دښوونځي وسايل مات کړي سبا دکوروسايل ماتوي او بله ورځ هېوادته زيان رسوي."