इराणी सैन्याने होर्मुझच्या सामुद्रधुनीत घेतलं एक जहाज ताब्यात, जहाजावर 25 क्रू मेंबर्स
इराणी सैन्याने होर्मुझच्या सामुद्रधुनीत एक कंटेनर जहाज ताब्यात घेतलं आहे. सीरियातील आपल्या वाणिज्य दूतावासावरील हल्ल्याला प्रत्युत्तर म्हणून इराणकडून हल्ला होण्याची भीती बळावली असतानाच ही कारवाई करण्यात आली आहे.
एमएससी अराईज असे या कंटेनर जहाजाचे नाव असून ते संयुक्त अरब अमिराती आणि इराण यांच्यातील होर्मुझच्या सामुद्रधुनीतून जात होते. हे जहाज शनिवारी (13 एप्रिल) पहाटे ताब्यात घेण्यात आलं आहे.
इराणची वृत्तसंस्था आयआरएनएने एक व्हिडिओ प्रसिद्ध केला आहे. यात कंटेनर जहाजाच्या वर हेलिकॉप्टर उडताना दिसत असून कमीतकमी तीन लोक दोरीचा वापर करून जहाजात उतरत आहेत.
या जहाजाची देखभाल करणाऱ्या एमएससी कंपनीने म्हटलंय की जहाजावर एकूण 25 क्रू मेंबर्स आहेत. जहाजावर पोर्तुगीज झेंडा असला तरी हे जहाज झोडियाक मेरीटाईमच्या मालकीचे आहे. ही कंपनी लंडन-आधारित आंतरराष्ट्रीय शिपिंग ऑपरेटरची असून याचे मालक एक इस्रायली आहेत.