महाराष्ट्र कोरोना : राजेश टोपे- सध्या लॉकडाऊन नाही, ऑक्सिजनच्या उपलब्धतेनुसार पुढील निर्णय घेऊ
फोटो स्रोत, Facebook/Rajesh Tope
"बेड आणि ऑक्सिजनच्या उपलब्धतेवर पुढील निर्णय घेऊ. मात्र, आता लॉकडाऊनचा निर्णय नाही. लॉकडाऊनविषयी कुठेही चर्चा नाही," अशी माहिती महाराष्ट्राचे आरोग्यमंत्री राजेश टोपे यांनी दिली.
"संख्या वाढतेय. त्यामुळे निर्बंधांची नीट अंमलबजावणी करणं आवश्यक आहे. निर्बंध पहिलं पाऊल असतं. निर्बंधांच्या बाबतीत कठोर कारवाई करण्याच्या अनुषंगानं काम करत आहोत. निर्बंध कागदावर राहू नये असाच मानस महाविकास आघाडी सरकारचा आहे," असं राजेश टोपे म्हणाले.
मात्र, निर्बंधांबाबत रेस्टॉरंट, सिनेमा हॉल, शाळा आणि कॉलेज यांना अद्याप हात लावला नाही, असंही त्यांनी सांगितलं.
सध्याच्या RT-PCR मध्ये ओमिक्रॉनचं डिटेक्शन शक्य असल्याचंही टोपेंनी यावेळी सांगितलं.
यावेळी राजेश टोपेंनी बनावट लशीच्या मुद्द्यावर म्हटलं की, "कोविन अॅप केंद्रानं बनवलंय, लसीकरणाचं केंद्र ठरवतायेत, त्यामुळे बनावट लशीचा प्रश्न केंद्रानं सोडवावा."
राज्यात तिसरी लाट; होम आयसोलेशनवर भर
महाराष्ट्रात कोरोनाच्या तिसऱ्या लाटेदरम्यान रुग्णांची संख्या वेगाने वाढत असल्यामुळे होम आयसोलेशनवर भर देण्याची गरज राज्याचे अतिरिक्त मुख्य सचिव डॉ. प्रदीप व्यास यांनी व्यक्त केली आहे.
फोटो स्रोत, PUNIT PARANJPE
सहकाऱ्यांना लिहिलेल्या पत्रात त्यांनी आगामी काळात काय उपाययोजना कराव्या लागतील याचा उहापोह या पत्रात केला आहे.
कोरोनाच्या तिसऱ्या लाटेदरम्यान रुग्णसंख्येचा वेग असाच राहिला आणि लक्षणं सौम्य स्वरुपाची असली किंवा लक्षणं नसतील तर रुग्णांना होम आयसोलेशनमध्ये राहू द्यावं, असं डॉ. व्यास यांनी म्हटलं आहे.
"ओमिक्रॉन व्हेरियंटचा संसर्ग झपाट्याने होतो. त्यामुळे ओमिक्रॉनबाधित व्यक्ती सार्वजनिक जीवनात लोकांमध्ये मिसळणार नाही याची काळजी घ्यायला हवी. यासाठी सदैव तत्पर अशा कॉल सेंटरची आवश्यकता आहे. रुग्णांना कोरोनाच्या नव्या तसंच जुन्या व्हेरिएंटच्या लक्षणांची माहिती या कॉलसेंटरद्वारे देता येईल.
"या केंद्राच्या माध्यमातून ऑक्सिजनची पातळी, 6 मिनिट चालण्याची चाचणी याबाबतही रुग्णांना माहिती देता येईल", असं डॉ. व्यास यांनी लिहिलं आहे.
ते पुढे लिहितात, "कॉल सेंटर कोरोना डॅशबोर्डाशी संलग्न असेल तर विशिष्ट शहरात किती बेड्स उपलब्ध आहेत ते कळू शकेल. जेणेकरून आवश्यकता भासल्यास रुग्णाला विशिष्ट रुग्णालयात पाठवता येईल. कॉल सेंटर आणि रुग्णवाहिका नेटवर्कशीही जोडलेलं असावं."
'कोव्हिडच्या तिसऱ्या लाटेत महाराष्ट्रात जानेवारीत 2 लाख केसेस येऊ शकतील', असं राज्याचे अतिरिक्त मुख्य सचिव प्रदीप व्यास यांनी सर्व पालिका आयुक्त आणि जिल्हाधिकाऱ्यांना लिहिलेल्य़ा पत्रात म्हटलं आहे.
फोटो स्रोत, Government of Maharashtra
प्रदीप व्यास आपल्या पत्रात म्हणतात, "ओमिक्रॅान सौम्य आहे असं समजू नका, लस न घेतलेल्यांसाठी आणि सहव्याधी असलेल्यांसाठी हा व्हेरिएंट जीवघेणा आहे. तिसऱ्या लाटेत कोरोना संसर्ग खूप मोठा असेल आणि केसेस जास्त असतील, त्यामुळे लसीकरण मोहीम वाढवा आणि जीव वाचवा"
कोरोनाच्या नव्या ओमिक्रॉन व्हेरियंटनं सर्वांच्या चिंता वाढवल्या आहेत. गेल्या काही दिवसांमध्ये महाराष्ट्रात कोरोनाच्या रुग्णसंख्येमध्ये मोठ्या प्रमाणावर वाढ पाहायला मिळत आहे.आज मुंबई महानगर क्षेत्रात 5631 नवे रुग्ण आढळले आहेत.
या पार्श्वभूमीवर कोरोनाचा संसर्ग रोखण्यासाठी राज्य सरकारच्या वतीनं विविध प्रकारची पावलं उचलली जात आहेत. त्यानुसार राज्यात वेगवेगळे निर्बंध लागू करण्यात आलेले आहेत.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी'हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
