डीडीसी निवडणूक जम्मू-काश्मीर: गुपकर अलायन्स आघाडीवर तर भाजप ठरला सर्वांत मोठा पक्ष
फोटो स्रोत, EPA/JAIPAL SINGH
जम्मू-काश्मीरमध्ये फारुख अब्दुल्ला यांच्या नेतृत्वाखालील सात पक्षांच्या गुपकर आघाडीने जिल्हा विकास परिषदेच्या (डीस्ट्रिक्ट डेव्हलपमेंट कॉर्पोरेशन) 280 जागांपैकी सर्वाधिक 110 जागा जिंकल्या आहेत.
टाईम्स ऑफ इंडियानुसार, गुपकर आघाडीने जम्मूमध्ये 26 तर काश्मीरमध्ये 84 जागांवर विजय मिळवला आहे.
एकूण 75 जागांवर विजय मिळवत भाजप सर्वांत मोठा पक्ष ठरला आहे. भाजपने पहिल्यांदाच काश्मीर खोऱ्यातील 3 जागा जिंकल्या आहेत. भाजपने जम्मूमध्ये 72 तर काश्मीरमध्ये 3 जागा जिंकल्या आहेत.
जम्मू-काश्मीर अपनी पार्टी (JKAP) पक्षाची कामगिरी निराशाजनक असून पक्षाला 12 जागांवर विजय मिळवण्यात यश आले आहे. पक्षाने जम्मूत जागा 3 तर काश्मीरमध्ये 9 जागांवर विजय मिळवला आहे.
काँग्रेसने जम्मूतील 17 आणि काश्मीरमधील 9 जागा अशा 26 जागांवर विजय मिळवला आहे.
जम्मूतील 22 जागा तर काश्मीरमधील 33 जागा अशा एकूण 55 जागा अपक्ष उमेदवारांनी जिंकल्या आहेत.
फोटो स्रोत, TAUSEEF MUSTAFA
आठ टप्प्यात पार पडलेली डीडीसी निवडणूक 28 नोव्हेंबरपासून सुरू झाली होती.
डीस्ट्रिक्ट डेव्हलपमेंट कॉर्पोरेशनची निवडणूक एकूण 280 जागांसाठी पार पडली. एकूण 2,178 उमेदवार निवडणुकीच्या रिंगणात होते. यापैकी 450 महिला उमेदावार होत्या.
जम्मू आणि काश्मीरमध्ये या निवडणुकीसाठी 51.42 टक्के मतदान झाले होते.
केंद्र सरकारने गेल्या वर्षी जम्मू-काश्मीरचा विशेष दर्जा रद्द केल्यानंतर आणि राज्य केंद्र शासित प्रदेश बनल्यानंतर ही राज्यातील पहिलीच निवडणूक आहे.
फोटो स्रोत, Getty Images
जम्मू-काश्मीर भागात 140-140 जागांवर निवडणुका झाल्या.
डीडीसी निवडणुकीतील बहुतांश जागांचा ट्रेंड अपेक्षेप्रमाणे दिसून येत आहे. हिंदू बहुल जम्मू क्षेत्राचा निकाल भाजपच्या बाजूने दिसत असताना मुस्लीम बहुल काश्मीर भागात पीएजीडीचे वर्चस्व दिसून आले.
पीटीआयने दिलेल्या वृत्तानुसार, मतमोजणीच्या एक दिवस आधी प्रशासनाने नईम अख्तर, सरताज मदनी, पीर मन्सूर आणि हिलाल अहमद लोन यांच्यासह अनेक पीडीपी आणि एनसी नेत्यांना ताब्यात घेतले होते. यांना ताब्यात घेण्याचे कारण अद्याप अस्पष्ट आहे.
काश्मीरमध्ये भाजपने तीन जागांवर विजय मिळवत खाते उघडले आहे. श्रीनगरमधील खोनमोह-2, बांदीपोरा जिल्ह्यातील तुलाईल जागा आणि पुलवामामधील काकपोरा जागा अशा तीन जागा भाजपने जिंकल्या आहेत.
हा विजय भाजपसाठी महत्त्वाचा मानला जात आहे कारण या जागांवर भाजपसमोर पीडीपी आणि एनसीसारख्या पक्षांचे आव्हान होते.
डीडीसी निवडणूक म्हणजे काय?
जम्मू आणि काश्मीरमध्ये पहिल्यांदाच डीडीसीसाठी (जिल्हा विकास परिषद) निवडणूक पार पडली. कलम 370 रद्द होण्यापूर्वी जम्मू-काश्मीरमध्ये त्रिस्तरीय पंचायत यंत्रणा (गावपातळी, ब्लॉक लेव्हल, जिल्हास्तरीय) नव्हती.
केंद्रातील नरेंद्र मोदी सरकारने गेल्या महिन्यात जम्मू आणि कश्मीर पंचायत राज अधिनियम 1989 मध्ये दुरूस्तीसाठी परवानगी दिली होती. आता या निवडणुकांमार्फत जम्मू क्षेत्रातील 10 आणि काश्मीर खोऱ्यातील 10 अशा 20 जिल्ह्यांत डीसीसी नेमली जाईल.
केंद्रशासित प्रदेशातील प्रत्येक जिल्ह्यात 14 मतदारसंघ स्थापन करण्यात आले आहेत. त्यामुळे जम्मू-काश्मीरमधील एकूण 280 मतदारसंघांसाठी या निवडणुकांच्या माध्यमातून डीसीसी प्रतिनिधींची निवड करण्यात येत आहे.
पीपल्स डेमोक्रॅटिक पक्षाने 2018 मध्ये नगरपालिका आणि पंचायत निवडणुकांवर बहिष्कार टाकला होता. नॅशनल कॉन्फरन्स आणि पीपल्स डेमोक्रॅटिक पार्टी या दोन पक्षांनी पंतप्रधान नरेंद्र मोदी यांच्याकडे कलम 35-अ च्या सुरक्षेबाबत आश्वासन मागितले होते.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)
