ऑफिसमध्ये रोमान्स करण्याआधी कोणत्या गोष्टी लक्षात ठेवाल ?

अमेरिकेतील 'अ‍ॅस्ट्रोनॉमर' या टेक कंपनीने त्यांच्या सीईओवर कारवाई केली आहे. या सीईओला निलंबित करण्यात आलं आहे.

त्यामागचं कारण आहे ते त्यांच्या सीईओचा एका कॉन्सर्टमधील व्हीडिओ व्हायरल होणं. कोल्डप्ले कॉन्सर्टमधला तो व्हीडिओ तुम्ही पाहिला असेलच.

मॅसॅच्युसेट्समधील जिलेट स्टेडियममध्ये ही कॉन्सर्ट सुरू होती. यामध्ये, कोल्डप्ले कॉन्सर्टमधील किस-कॅमवर एक जोडपं दिसलं आणि ऑफिसमधलं एक अफेअर उघडकीला आलं. त्यानंतर तो व्हीडिओ इंटरनेटवर प्रचंड व्हायरल झाला.

मात्र, हा व्हीडिओ व्हायरल झाल्यानंतर त्या क्लिपमध्ये झळकलेल्या कंपनीच्या सीईओला राजीनामा द्यावा लागला, शिवाय ती महिला त्याच कंपनीत 'चीफ पीपल ऑफिसर' म्हणजेच एचआर आहे.

पण, यानंतर सर्वत्र चर्चा सुरू झाली आहे ती ऑफिस रोमान्सची, वर्क प्लेस रिलेशनशीपची. म्हणजे तुमच्या कामाच्या ठिकाणी समजा तुम्ही कुणाच्या प्रेमात पडलात, पुढे तर काय?

ऑफिस किंवा कलिगसोबतच्या रोमँटिक रिलेशनशिपमुळे अनेक उच्चपदस्थांना आपली नोकरी गमवावी लागल्याची उदाहरणे आहेत.

ऑफिसमधील व्यक्तीसोबत कार्यालयाच्या संकुलाबाहेर जरी नातेसंबंध ठेवले तर त्याला कार्यालयातील नातेसंबंधच म्हटले जाते.

बहुतेक कंपन्यांच्या कर्मचाऱ्यांसाठी असलेल्या हँडबुकमध्ये किंवा कोड ऑफ कंडक्टमध्ये कामाच्या ठिकाणी तुम्ही कसं वागायला हवं, यासाठीच्या गाईडलाईन्स दिलेल्या असतात.

मग कामाच्या ठिकाणी सूत जुळायला लागलं, नातं खुलायला लागलं तर या काही गोष्टी लक्षात ठेवा.

सगळ्यात महत्त्वाची गोष्ट म्हणजे कंपनी पॉलिसी काय सांगते?

तुम्ही काम करत असलेल्या कंपनीचं याबद्दलचं धोरण काय आहे, ते पाहा. अनेक कंपन्यांची याबद्दल अधिकृत धोरणं असतात.

यामध्ये कोणत्या गोष्टींना परवानगी आहे, कोणत्या गोष्टींना नाही, हे सगळं समजायला मदत होते.

म्हणजे उदाहरणार्थ अनेक कंपन्यांमध्ये मॅनेजर आणि त्याच्या वा तिच्या हाताखाली काम करणारी व्यक्ती यांच्यातल्या नात्याला परवानगी नसते.

कारण यामुळे कामाच्या ठिकाणी भेदभाव करणं म्हणजे झुकतं माप दिलं जाणं, यासारख्या गोष्टी होण्याची शक्यता असते.

काही कंपन्यांच्या धोरणांनुसार एकाच कंपनीत काम करणाऱ्या दोन व्यक्तींनी लग्न केलं तर त्या दोघांनी त्याच कंपनीत काम करण्याची परवानगी नसते. दोघांपैकी एकाला नोकरी सोडावी लागते.

अनेक कंपन्यांना कर्मचाऱ्यांमधल्या नात्यांवर आक्षेप नसतो, पण त्यांना अपेक्षित असतं की कर्मचाऱ्यांनी त्यांच्यातलं असं नातं जाहीर करावं.

अनेकदा दोन्ही कर्मचारी एकाच टीममधले असतील, त्यांच्यातलं प्रोफेशनल नातं हे बॉस - कर्मचारी असेल, तर एचआर या दोघांची टीम वेगवेगळी असेल, याची खात्री करू शकतं.

त्यामुळे तुमच्या कंपनीची याबद्दलची धोरणं काय आहेत, हे तपासून घ्या.

'कामाच्या ठिकाणी प्रोफेशनल रहा'

ऑफिसमध्ये नातेसंबंध असणे ही अतिशय नाजूक बाब असते. त्यामुळे त्याकडे संवेदनशीलतेनी पाहतानाच व्यावसायिक मर्यादांचे उल्लंघन कसे होणार नाही हे पाहणे आवश्यक असते. बीबीसी वर्कलाईफने यासंदर्भात एक लेख लिहिला होता आणि त्यात काही गोष्टी त्यांनी अधोरेखित केल्या होत्या.

कामाच्या ठिकाणी निर्माण होणाऱ्या खासगी नात्यांमधून पिळवणूक होऊ शकते, हे देखील लक्षात ठेवा.

विशेषत: हे नातं एका सीनिअर आणि ज्युनिअरमध्ये निर्माण होत असेल तर त्याचा वापर करून दबाव टाकणं, विशिष्ट कामं करून घेणं वा करायला लावणं, असले प्रकार होऊ शकतात.

म्हणून आपल्यात खरंच नातं आहे की नात्याचा वापर केला जातोय, याचीसुद्धा पडताळणी करा.

जर तुम्हाला एखाद्या अशा नात्यात अडकल्यासारखं वाटतंय तर तुमच्या कंपनीच्या एचआरला विश्वासात घेऊन त्यांच्याशी याविषयी सल्लामसलत करू शकता.

कामाच्या ठिकाणी निर्माण होणारे नातेसंबंध योग्यरीतीनं हाताळणं हे तुमच्या वैयक्तिक आयुष्यासोबतच तुमच्या करियरसाठी - प्रोफेशनल आयुष्यासाठीही महत्त्वाचं असतं.

कारण कंपनीच्या नियमांचं - धोरणांचं उल्लंघन झालं किंवा तुम्ही केलेल्या गोष्टीमुळे कंपनीच्या प्रतिष्ठेला, कामाला धोका निर्माण होत असेल, तर तुमची नोकरी तर जाईलच पण ही गोष्ट कायमची तुमच्या सिव्हीवर ही राहील.

बीबीसी वर्कलाईफने कामाच्या ठिकाणी नातेसंबंधाबाबत कोणती नैतिक जबाबदारी पाळायला हवी यासंबंधी लेख लिहिला आहे. तो देखील तुम्ही या ठिकाणी सविस्तर वाचू शकता.

बीबीसीसाठी कलेक्टिव्ह न्यूजरूमचे प्रकाशन.