Voter registration: मतदार यादीत नाव असं नोंदवा

निवडणूक सरपंचपदाची असो किंवा आमदार-खासदार पदासाठीची. मतदान करायचं म्हटलं तर आपल्याकडे मतदान कार्ड म्हणजेच व्होटर आयडी कार्ड असणं आवश्यक असतं.

आता आपण घरबसल्या फक्त 5 मिनिटांमध्ये मतदार यादीत नाव नोंदवण्यासाठी अर्ज करू शकतो. त्यासाठीची प्रक्रिया काय याची माहिती घेऊ.

मतदार यादीत नाव कसं नोंदवायचं?

मतदार यादीत नाव नोंदवण्यासाठी सगळ्यात आधी तुम्हाला www.nvsp.in या वेबसाईटवर जावं लागेल. तिथे National Voters Service Portalची वेबसाईट तुमच्यासमोर ओपन होईल.

तिथं login/register या पर्यायावर क्लिक करावं लागेल.

जर तुम्ही पहिल्यांदाच या वेबसाईटवर आला असाल, तर तुमचं यावर अकाऊंट असण्याची शक्यता कमीच आहे. त्यामुळे मग Don't have account. Register as a new user या पर्यायावर क्लिक करावं लागेल.

त्यानंतर एक नवीन पेज तुमच्यासमोर ओपन होईल.

इथं सुरुवातीला मोबाईल नंबर टाकायचा आहे आणि त्यानंतर कॅप्चा टाकायचा आहे. म्हणजे समोरच्या रकान्यात दिसणारे आकडे किंवा अक्षरं जशीच्या तशी टाकायची आहेत आणि मग Send OTP या पर्यायावर क्लिक करायचं आहे.

त्यानंतर तुमच्या मोबाईलवर एक OTP येईल. तो Enter OTP या पर्यायासमोर टाकून Verifyवर क्लिक करायचं आहे.

पुढे तिथं दोन पर्याय तुम्हाला दिसतील. एक म्हणजे I have EPIC Number आणि दुसरा म्हणजे I don't have EPIC Number.

आता EPIC म्हणजे काय तर Electors photo identity card. यालाच आपण Voter ID card म्हणतो. त्या कार्डवरचा नंबर म्हणजे EPIC Number.

पण, तुम्ही पहिल्यांदाच मतदान करणार असल्यामुळे तुमच्याकडे व्होटर आयडी कार्ड नसणार आहे. त्यामुळे I don't have EPIC Number या पर्यायावर क्लिक करायचं आहे.

त्यानंतर नाव, आडनाव, ई-मेल आयडी, पासवर्ड टाकायचा आहे. पुन्हा एकदा पासवर्ड टाकून तो कन्फर्म करायचा आहे आणि मग Register या पर्यायावर क्लिक करायचं आहे.

त्यानंतर आता तुम्हाला परत एकदा लॉग-इन करायचं आहे. Registration करताना टाकलेला मोबईल नंबर, पासवर्ड आणि कॅप्चा टाकून लॉग-इन या पर्यायावर क्लिक करायचं आहे.

पुढे एका नवीन पेजवरील पहिल्या fresh inclusion/ enrolment या पर्यायावर क्लिक करायचं आहे.

त्यानंतर Citizenshipमध्ये I reside in India, अर्थात मी भारतातच राहतो, या पर्यायावर टिक करायचं आहे, आणि मग राज्य निवडायचं आहे.

त्यानंतर नेक्स्ट या पर्यायावर क्लिक केलं की, तुमचं गाव किंवा शहर ज्या मतदारसंघात येतं त्याविषयीची माहिती भरायची आहे.

इथं सुरुवातीला लोकसभा किंवा विधानसभा मतदारसंघ निवडायचा आहे. त्यानंतर तुमचा पोस्टाचा पत्ता टाकायचा आहे.

यात राज्य, जिल्हा, घर क्रमांक, रस्त्याचं आणि गावाचं नाव, पोस्ट ऑफिस, पिन कोड ही माहिती टाकायची आहे.

त्याखाली Date या पर्यायासमोर तुम्हाला तारीख निवडायची आहे. वर सांगितलेल्या पत्त्यावर तुम्ही किती वर्षांपासून राहत आहात, ती तारीख, महिना आणि वर्षं इथं तुम्हाला सांगायचं आहे.

आता तुम्हाला एक address proof जोडायचा आहे. इथं तुम्ही बँक पासबुक किंवा रेशन कार्ड असा एक पर्याय सिलेक्ट करून त्याचा फोटो अपलोड करू शकता.

त्यानंतर नेक्स्ट या पर्यायावर क्लिक केलं की जन्माविषयीची माहिती द्यायची आहे.

इथं जन्मतारीख, गावाचं नाव, राज्य आणि जिल्हा निवडायचा आहे. त्यानंतर वयाचा पुरावा म्हणून आधार कार्डाचा फोटो तुम्ही इथं अपलोड करू शकता.

आता तुम्हाला इथं Age declaration form हा एक पर्याय दिसेल. त्यावर क्लिक करून हा फॉर्म डाऊनलोड करून भरायचा आहे.

इथं तुम्हाला तुमचं नाव, वडील किंवा पतीचं नाव आणि गावाचं नाव टाकायचं आहे.

पुढे मतदारसंघाचं नाव टाकल्यानंतर सही करून ठिकाण आणि तारीख टाकायची आहे. या भरलेल्या फॉर्मचा फोटो काढून तो Age declaration या पर्यायासमोर अपलोड करायचा आहे. त्यानंतर नेक्स्ट या पर्यायावर क्लिक करायचं आहे.

आता वैयक्तिक माहिती भरायची आहे. इथं नाव आणि आडनाव टाकून लिंग निवडायचं आहे. त्यानंतर वडील, आई किंवा पतीविषयी माहिती द्यायची आहे.

सुरुवातील तुमचं त्यांच्यासोबत काय नातं आहे ते निवडायचं आहे आणि मग त्यांचं नाव आणि आडनाव टाकायचं आहे.

मग शेवटी तुम्हाला तुमचा फोटो अपलोड करून नेक्स्ट या पर्यायावर क्लिक करायचं आहे.

त्यानंतर तुम्हाला अपंगत्व असेल तर त्याची माहिती द्यायची आहे.

सगळ्यात शेवटी दुसऱ्या एखाद्या मतदारसंघात नाव समाविष्ट करण्यासाठी मी अर्ज केलेला नाही तसंच माझं नाव कोणत्याच मतदारसंघाच्या यादीत नाहीये, या आशयाच्या declaration वर ठिकाण आणि तारीख टाकून नेक्स्ट या पर्यायावर क्लिक करायचं आहे.

त्यानंतर मग preview या पर्यायाअंतर्गत नवीन मतदान कार्डासाठी तुम्ही आता भरलेला फॉर्म-6 तुम्हाला स्क्रीनवर दिसेल. त्याखालील सबमिट या बटनावर क्लिक केलं की तुमचा फॉर्म सबमिट होईल आणि तुम्हाला एक रेफरन्स आयडी दिला जाईल.

हा आयडी वापरून तुम्ही तुमच्या फॉर्मचं स्टेटस चेक करू शकता.

या वेबसाईटच्या होमपेजवर परत आलात की तुम्हाला तिथं Track application Status हा पर्याय दिसेल.

त्यावर क्लिक केलं की, रेफरन्स आयडी टाकून Track status या पर्यायावर क्लिक करायचं आहे.

एकदा का फॉर्म सबमिट झाला की त्याची स्थानिक Booth level officer छाननी करतात. त्यानंतर तो Electoral Registration officer (उपजिल्हाधिकारी) यांच्याकडे पाठवला जातो.

सगळी माहिती आणि कागदपत्रं व्यवस्थित असल्यास तो फॉर्म accept केला जातो आणि जवळपास 2 महिन्यांत तुमच्या पत्त्यावर मतदान कार्ड पाठवलं जातं.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता. 'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)