Aurelien Tchouameni ya zama na hudu mafi tsada da Real Madrid ta saya

Real Madrid ta dauki Aurelien Tchouameni daga Monaco kan yarjeniyar kaka shida, shi ne na hudu a jerin 'yan wasan da ta dauka mafi tsada a tarihi.

Wasu rahotanni na cewar Real Madrid ta sayo dan kwallon kan fam miliyan 68.3 da karin tsarabe-tsaraben da zai kai fam miliyan 17.

Hakan ne ya sa Tchouameni ya zama na hudu mafi tsada da kungiyar Santiago Bernabeu ta dauka a tarihi.

Cikin 'yan kwallon da Real Madrid ta saya mafi tsada da ke gaban dan kwallon Faransa, sun hada da Gareth Bale daga Tottenham a 2013 da Eden Hazard daga Chelsea a 2019 da kuma Cristiano Ronaldo daga Manchester United a 2009.

Daga nan sai Tchouameni a mataki na hudu da Real Madrid ta dauka da dan karen kudi, wanda ya ke na biyar kuwa shi ne dan wasan tawagar Colombia, James Rodriguez a 2014, bayan kammala gasar kofin duniya kan Yuro miliyan 75.

Haka kuma an tabbatar da cewar Tchouameni shi ne mafi tsada a Real Madrid a gurbin masu buga tsakiya, yana gaba da Zinedine Zidane, wanda ta dauka kan Yuro miliyan 73.5 a 2001 da kuma Kaka na Brazil da ta dauka a 2009 kan Yuro miliyan 65.

Har yanzu Eder Militao shi ne mai tsaron baya da aka dauka cikin masu tsada a Real Madrid, bayan da ta dauko shi daga Porto kan Yuro miliyan 50.