Jana’izar Khamenei da sauran abubuwan da ke faruwa a duniya 05/07/2026

Rahoto kai-tsaye

Aisha Babangida da Isiyaku Muhammed

1. Mintuna 46 da suka wuceTsananin zafin rana da iska sun ƙara rura gobarar daji a kudancin Turai

   Tsananin zafin rana da ya kai kusan digiri 40 a ma’aunin Celsius tare da iska mai ƙarfi sun ƙara rura gobarar daji a sassan kudancin Turai, inda dubban jami’an kashe gobara ke ci gaba da kokarin dakile yaɗuwarta.

   Gobarar ta riga ta ƙone kusan murabba’in kilomita 200 na filayen dazuka da ciyayi a ƙasashen Portugal, Spain, Girka da Faransa, lamarin da ya tilasta hukumomi ɗaukar matakan gaggawa domin kare rayuka da dukiyoyi.

   A yankin gabashin tsaunukan Pyrenees da ke Faransa, inda gobarar ke ci gaba da yaɗuwa, hukumomi sun haramta wa masu kallo tsayawa a kan hanyar gasar tseren keke ta Tour de France, wadda matakinta na uku zai ƙare a yankin ranar Litinin.

   A Girka kuwa, gobarar daji ta lalata masana’antu biyu da ke kusa da birnin Thessaloniki.

   A arewacin Portugal kuma, jami’ai sun ce an samu gagarumar nasara wajen shawo kan wata babbar gobara da ta tashi a yankin. rewrite this and make the story tally with the heasdline Tsananin zafin rana da iska sun ƙara rura gobarar daji a kudancin Turai.

2. Sa'a 1 da ta wuce'Lafiyar fitaccen likitan Falasɗinawa da ke tsare a Isra’ila ta ƙara taɓarɓarewa'

   Lauyan fitaccen likitan Falasɗinawa, Dr. Hossam Abu Safia, ya bayyana cewa lafiyar wanda yake tsare a Isra’ila ba tare da an gurfanar da shi a gaban kotu ba tun watanni 18 da suka gabata ta ƙara taɓarɓarewa matuƙa.

   Dr. Abu Safia, wanda ya kasance daraktan Asibitin Kamal Adwan da ke arewacin Gaza, ya zama ɗaya daga cikin fitattun likitocin da suka yi aiki wajen kula da marasa lafiya a lokacin yaƙin Isra’ila da Hamas.

   Rahotanni sun ce lauyansa, Nasser Odeh, ya ziyarce shi a ranar Alhamis inda ya gano cewa yana ɗauke da sabbin raunuka masu tsanani.

   Kungiyar Likitoci Masu Kare Haƙƙin Dan Adam ta bukaci a gaggauta mayar da shi daga cibiyar binciken da ake tsare da shi zuwa wani wuri da zai samu kulawar lafiya.

   Sai dai Isra’ila ta ce tana tsare da likitan ne bisa zargin kasancewarsa mamba a ƙungiyar Hamas, ƙarƙashin dokar da ta shafi waɗanda ake zargi da shiga fada ba bisa ka’ida ba.

3. Sa'o'i 2 da suka wuceMuhimman abubuwan da suka faru a Iran yau

   • Ayatollah Ja’afar Sobhani ya jagoranci sallar jana’izar marigayi Ayatollah Ali Khamenei a wani masallaci da ke Tehran.
   • ‘Ya’yan marigayi Ali Khamenei uku maza, Meysam, Massoud da Mustafa Khamenei, sun halarci jana’izar, yayin da Mojtaba Khamenei bai bayyana a wurin ba.
   • Birgediya Janar Ahmad Vahidi ya halarci jana’izar a Tehran, lamarin da ya janyo hankali saboda rashin fitowarsa a bainar jama’a a watannin baya. Rahotannin da ba a tabbatar da su ba na nuna cewa an naɗa shi sabon kwamandan dakarun juyin juya halin Iran bayan mutuwar Mohammad Pakpour.
   • Mojtaba Khamenei ya sake naɗa Gholamhossein Mohseni Ejei a matsayin shugaban ma’aikatar shari’a ta Iran bayan ƙarewar wa’adinsa na shekaru biyar.
   • A fannin tattalin arziƙi, Iran da Qatar sun dawo da harkokin kasuwancin teku bayan dakatarwar kusan watanni biyar, yayin da bayanai suka nuna an samu raguwar zirga-zirgar jiragen ruwa ta Mashigin Hormuz zuwa Oman a cikin sa’o’i 24 da suka gabata.
   • A shirye-shiryen jana’izar Khamenei, shugaban ‘yan sandan kula da zirga-zirga ya sanar da cewa za a aiwatar da tsauraran matakan kula da zirga-zirga a Tehran da wasu birane domin sauƙaƙa zirga-zirgar mahalarta jana’izar.

4. Sa'o'i 2 da suka wuceShugaban Senegal Faye ya kafa sabuwar jam'iyya

   Shugaban Senegal, Bassirou Diomaye Faye, ya sanar da kafa sabuwar jam’iyya, lamarin da ya tabbatar da rabuwarsa da firaministan ƙasar, Ousmane Sonko, shugaban jam'iyyar PASTEF.

   An sanar da kafa jam’iyyar ne a gaban ɗaruruwan magajin gari da masu goyon bayansa, yayin da ake jiran yiwuwar sauya wasu tanade-tanaden ƙundin tsarin mulkin ƙasar.

   Sai dai jam’iyyar adawa ta APR ta yi watsi da iƙirarin cewa fiye da magajin gari 300 ne ke mara wa sabuwar jam’iyyar baya, yayin da wasu ke ganin matakin na iya shafar dimokuraɗiyyar ƙasar.

   Rabuwar kawunan Faye da Sonko na zuwa ne bayan watanni na saɓani kan yadda ake tafiyar da tattalin arziki da matsalar bashin Senegal, lamarin da ya sa IMF dakatar da shirin bayar da rancen dala biliyan 1.8 ga ƙasar.

5. Sa'o'i 3 da suka wuceHotunan yadda dubban Iraniyawa suka hallara domin jana'izar Ali Khamenei a Tehran

   Dubban mutane daga sassa daban-daban na Iranne suka hallara a Masallacin Imam Khomeini Mosalla da ke Tehran domin halartar jana'izar tsohon jagoran ƙasar, Ayatollah Ali Khamenei.

   Hotunan da aka ɗauka daga wurin jana'izar sun nuna dandazon jama'a sun cika harabar masallacin, yayin da Babban Malamin Addini Ayatollah Ja'afar Sobhani ya jagoranci sallar jana'izar a wani sashe na harabar masallacin.

   Mahalarta taron sun halarci jana'izar ne domin yi wa marigayin da wasu daga cikin 'yan uwansa da aka kashe a hare-haren da Amurka da Isra'ila suka kai ban kwana.

6. Sa'o'i 4 da suka wuceIran ta shirya tsauraran matakan kula da zirga-zirga domin jana'izar Khamenei

   Shugaban 'yan sandan kula da zirga-zirga na Iran, Taimur Hosseini, ya ce za a aiwatar da wani babban shirin kula da zirga-zirga a biranen Tehran, Qom da Mashhad domin jana'izar tsohon jagoran addinin ƙasar, Ayatollah Ali Khamenei.

   Ya ce tun daga daren yau za a fara takaita zirga-zirga da share hanyoyin da suka haɗa da titin Damavand, Dandalin Imam Hossein, titin Enghelab da babbar hanyar Shahid Lashkari, yayin da za a buƙaci masu motoci su matsar da motocinsu daga wasu wurare.

   A cewarsa, manufar shirin ita ce sarrafa yawan jama'ar da ake sa ran za su halarci jana'izar tare da hana cunkoson ababen hawa.

   Hosseini ya kuma tabbatar da cewa duk hanyoyin shiga Tehran a buɗe suke, kuma babu wani rahoton cunkoso ko matsalar zirga-zirga a halin yanzu.

   Ana sa ran za a gudanar da jana'izar Ayatollah Ali Khamenei a Tehran gobe.

7. Sa'o'i 4 da suka wuceSojojin Najeriya sun ceto ƙarin mutum shida da aka sace a Borno

   Rundunar sojin Najeriya ta ce dakarunta na Operation HADIN KAI sun yi nasarar ceto wasu karin mutane shida da aka yi garkuwa da su a Borno yayin da ake ci gaba neman waɗanda suka ɓace.

   Waɗanda aka ceto sun haɗa da manya huɗu da jarirai biyu, kuma an same su ne a yankin Talakawa da ke ƙaramar hukumar Chibok a jihar Borno.

   A cewar rundunar, mutanen da aka ceto an yi garkuwa da su ne a garin Mussa da ke ƙaramar hukumar Askira/Uba tun cikin watan Mayu.

   Ta ce an kai su zuwa wani wuri mai tsaro inda ake yi musu gwaje-gwajen lafiya tare da ba su kulawar da ta dace.

   Rundunar ta ƙara da cewa ta samar wa mutanen da aka ceto kayan agaji da muhimman abubuwan buƙata domin rage musu raɗaɗin halin da suka shiga, tare da shirye-shiryen haɗa su da iyalansu cikin aminci.

   Rundunar ta ce sojojin sun kuma ƙwato harsasai 50 na bindigar PKT da mayaƙan suka yi watsi da su.

8. Sa'o'i 5 da suka wuceGwamnatin Najeriya ta musanta zargin kashe tiriliyoyin naira ba tare da kasafin kuɗi ba

   Gwamnatin Tarayya ta musanta zargin cewa ta kashe sama da naira tiriliyan 8 ba tare da an tanada a kasafin kuɗi ba, tana mai cewa an yi kuskuren fahimtar bayanan Asusun Lamuni na Duniya (IMF).

   Ministan Kuɗi, Taiwo Oyedele, ya ce gwamnatin ba ta da wani "kasafin kuɗi na ɓoye", kuma duk kuɗaɗen da ake kashewa suna samun amincewar Majalisar Dokoki bisa tanadin doka.

   Ya ƙara da cewa wasu kashe-kashen gwamnati kamar ayyukan raya ƙasa, biyan basussuka da ayyukan gaggawa na tsaro doka ta amince da su, don haka ba za a ɗauke su a matsayin kashe kuɗi ba bisa ƙa'ida ba.

   Martanin ya biyo bayan rahoton IMF da ya ce wasu kashe-kashen gwamnati ba su bayyana a kasafin kuɗi ba, lamarin da ya sa Atiku Abubakar da Peter Obi suka buƙaci a binciki batun.

   Amma gwamnatin ta ce IMF ba ta zarge ta da karya doka ba, sai dai ta yi magana ne kan yadda ake gabatar da rahotannin kuɗi.

9. Sa'o'i 6 da suka wuceFilin jirgin saman Bandar Abbas a Iran ya koma aiki bayan watanni huɗu

   Filin jirgin saman Bandar Abbas a Iran ya koma aiki bayan dakatarwar watanni hudu, inda jirgin fasinja na farko daga birnin Mashhad ya sauka a filin.

   Rahotannin kafafen yaɗa labaran Iran sun ce sake buɗe filin jirgin na da matuƙar muhimmanci wajen dawo da zirga-zirgar jiragen sama zuwa yankin.

   A cewar rahotannin, za a fara ƙara zirga-zirgar jiragen sama zuwa biranen Tehran, Shiraz, Yazd da Mashhad a hankali cikin jadawalin ayyukan filin jirgin.

   Mahukunta sun bayyana cewa za a ci gaba da faɗaɗa ayyukan filin jirgin a matakai domin tabbatar da daidaituwar harkokin sufurin jiragen sama a yankin.

10. Sa'o'i 6 da suka wuceNetanyahu ya san wane ne jagora a tsakaninmu - Trump

    Shugaban Amurka Donald Trump ya ce firaministan Isra’ila Benjamin Netanyahu ya san wane ne jagora a tasakaninsu yana mai jaddada cewa dangantakar da ke tsakaninsu tana da ƙarfi duk da rahotannin da ke nuna akwai saɓani kan wasu batutuwa.

    Trump ya bayyana hakan ne a wata gajeriyar hira da ya yi da kafar Axios, inda ya ce: "Muna da kyakkyawar alaƙa, kuma Netanyahu ya san wane ne jagora."

    Kalaman na Trump na zuwa ne yayin da ake sa ran Netanyahu zai kai ziyara Fadar White House nan ba da jimawa ba.

    Idan ganawar ta tabbata, za ta kasance ta farko tsakanin shugabannin biyu tun bayan fara yaƙin Iran.

    Rahotanni sun nuna cewa akwai saɓanin ra'ayi tsakanin Trump da Netanyahu kan yadda ake tafiyar da wasu batutuwan tsaro, ciki har da yaƙin Iran da kuma matakan da Isra’ila ke ɗauka a Lebanon.

11. Sa'o'i 7 da suka wuceNajeriya ta yi Allah-wadai da kashe ƴanƙasarta biyu a Afirka ta Kudu

    Najeriya ta yi Allah wadai da zargin kashe wasu 'yan ƙasarta biyu a Afirka ta Kudu, tare da kira ga hukumomin ƙasar da su gudanar da bincike cikin gaggawa tare da gurfanar da waɗanda ke da hannu.

    A cikin wata sanarwa da mai magana da yawun ma'aikatar harkokin wajen Najeriya, Kimiebi Imomotimi Ebienfa, ya fitar a ranar Lahadi, ya ce ana zargin jami'an rundunar 'yan sandan Tshwane Metro da kashe ɗaya daga cikin mutanen a birnin Pretoria a ranar 28 ga Yuni.

    Ma'aikatar ta kuma ce wani ɗan Najeriya ya rasu bayan wasu da ba a tantance ba sun harbe shi a wajen shagon kasuwancinsa da ke garin Witbank a lardin Mpumalanga.

    Har zuwa yanzu, hukumomin Afirka ta Kudu ba su fitar da wata sanarwa kan waɗannan zarge-zarge ba.

    A wani lamari makamancin haka, an samu saɓani na diflomasiyya tsakanin Afirka ta Kudu da Ghana bayan Ghana ta ce an kashe ɗaya daga cikin 'yan ƙasarta yayin zanga-zangar adawa da baƙi a Cape Town. Sai dai hukumomin Afirka ta Kudu sun musanta wannan zargi, inda suka ce ba su da wani bayanin da ke tabbatar da irin wannan kisa.

12. Sa'o'i 7 da suka wuceIran da Qatar sun dawo da harkokin kasuwancin teku bayan wata biyar

    Mashawarcin harkokin kasuwancin Iran a Doha ya sanar da cewa Iran da Qatar sun sake dawo da harkokin kasuwancin teku tsakanin ƙasashen biyu bayan dakatarwar da ta ɗauki watanni biyar.

    Sanarwar ta zo ne bayan da Qatar ta bayyana cewa zirga-zirgar jiragen ruwa da sauran ayyukan ruwa a yankunanta sun koma yadda aka saba.

    A wani ɓangare kuma, yayin da Mojtaba Khamenei bai halarci sallar jana'izar mahaifinsa ba, ’ya’yan marigayin maza uku sun halarci jana’izar da aka gudanar a wani masallaci da ke birnin Tehran.

    Rahotanni sun nuna cewa ba a gayyaci tsoffin shugabannin ƙasar Iran zuwa wajen taron jana’izar ba.

13. Sa'o'i 8 da suka wuceRasha ta yi wa Amurka bayani game da yaƙin Ukraine

    Fadar Kremlin ta ce Shugaba Vladimir Putin na Rasha ya tattauna ta wayar tarho da Shugaban Amurka Donald Trump, sa'o'i kaɗan bayan da Mista Trump ya yi irin wannan tattaunawa da Shugaban Ukraine Volodymyr Zelensky domin bikin ranar samun ƴancin kan Amurka.

    Wani mai bai wa shugaba Putinn shawara, Yuri Ushakov, ya ce shugaban na Rasha ya yi wa takwaransa na Amurka bayani kan halin da ake ciki a fagen daga, yayin da Mista Trump ya bayyana aniyarsa ta taimakawa wajen samo mafita ga yaƙin Ukraine.

    Tun da farko, Rasha ta yi gargadin cewa zata mayar da kakkausan martani akan wani mummuna harin jirage marasa matuƙa da Ukraine ta kai cikin dare kan birnin St Petersburg da yankunan da ke kewaye da shi.

    Hukumomin Rasha sun ce za su ɗauki mataki kan harin, yayin da ake ci gaba da gwabza yaƙi tsakanin ƙasashen biyu.

14. Sa'o'i 9 da suka wuceAna zanga-zangar buƙatar Firaministan Albania ya sauka

    Dubban masu zanga-zanga sun hallara a tsakiyar Tirana, babban birnin Albania, a rana ta 35 a jere ta abin da ake kira "juyin-juya-halin Flamingo", domin nuna adawa da wani gagarumin aikin gina wurin shaƙatawa da ake alaƙanta shi da Ivanka Trump, ƴar tsohon shugaban Amurka Donald Trump, da mijinta Jared Kushner.

    Masu zanga-zangar, sun sake bayyana buƙatarsu ta cewa Firaministan ƙasar, Edi Rama, ya yi murabus.

    A yayin da ake ci gaba da ce-ce-ku-ce kan aikin, wata tawagar bincike ta tarayyar turai, ta yi gargaɗin cewa tattaunawar shigar Albania cikin tarayyar turai na iya fuskantar barazana idan gwamnatin Mista Rama ta ci gaba da aiwatar da shirin gina katafaren wurin shaƙatawar na alfarma da kuɗinsa ya kai yuro biliyan biyar.

15. 5 Yuli 2026Za mu cigaba a kare haƙƙin Amurkawa - Trump

    Shugaban Amurka Donald Trump ya gabatar da jawabi a birnin Washington, a yayin wani babban taro na murnar cika shekara 250 da samun ƴancin kan ƙasar daga Birtaniya.

    Jawabin, wanda ya fi karkata kan tarihin ƙasar, ya ƙunshi wasu batutuwa na siyasa, ciki har da suka ga abin da ya kira “ƴan kwaminisanci” da kuma alƙawarin ci gaba da kare haƙƙin Amurkawa na mallakar makamai.

    An jinkirta fara taron da aka shirya yi a wani babban fili taro na kasa saboda kwashe mahalarta taron da aka yi bayan fargabar da aka nuna ta fuskantar barazanar tsawa da guguwa mai karfi.

    Bukukuwan murnar cika shekara 250 da samun ƴancin kan Amurkan, sun fuskanci suka inda masu adawa da Mista Trump ke zarginsa da mayar da bikin wani dandali na siyasa.

    Wasu daga cikin ƴan jam’iyyar Democrat ma sun kaurace wa wasu daga cikin abubuwan da aka shirya domin bikin.

16. 5 Yuli 2026Za mu ɗaukaka ƙara kan hukuncin hana saka hijabi a makarantar Ibadan - MURIC

    A Najeriya, ƙungiyar kare haƙƙoƙin Musulmi ta MURIC, ta yi watsi da hukuncin da wata kotun ɗaukaka ƙara da ke garin Badun na jihar Oyo, ta yanke, wanda ya soke wani hukunci da ya yarje wa ɗalibai mata su riƙa sanya hijabi a makarantar International School da ke jami'ar Ibadan.

    Kungiyar ta lashi takobin jayayya kan hukuncin har zuwa kotun koli, kuma har ta fara bin matakan da suka kamata game da hakan, domin a cewarta, ta gano hukuncin yana cike da kura-kurai.

17. 5 Yuli 2026Muna cigba da ƙoƙarin ceto ɗaliban Oyo - Rundunar soji

    Babban hafsan sojin ƙasan Najeriya, Laftanar Janar Waidi Shaibu, ya ce dakarun soji na cigaba da ƙoƙarin domin ceto ɗalibai 39 da malamai bakwai da aka sace a Jihar Oyo.

    Shaibu ya bayyana hakan ne a lokacin da yake ganawa da manema labarai a ranar Asabar a Fatakwal na jihar Rivers, a cikin bukuwan ranar sojojin Najeriya ta shekarar 2026.

    An yi garkuwa da ɗalibai da malamai ne a ranar 15 ga Mayu daga makarantu uku da ke ƙaramar hukumar Orire a Jihar Oyo.

    “Yanzu haka ana ci gaba da ƙoƙari domin kuɓutar da ɗaliban, kuma muna ganin akwai alamar nasara bisa ga dukkan alamu, in ji shi kamar yadda jaridar Punch mai zaman kanta ta ruwaito.

    Ya bayyana ƙwarin gwiwarsa cewa za su samu nasarar ceto waɗanda aka sace cikin ƙoshin lafiya tare da miƙa su ga iyalansu.

    Tarihin yadda aka fara garkuwa da mutane a Najeriya

18. 5 Yuli 2026Za mu ci gaba da girmama ƴancin gudanar da addini a Najeriya - Tinubu

    Shugaban Najeriya Bola Ahmed Tinubu ya sake jaddada cewa gwamnatinsa na ba da fifiko wajen tabbatar fahimtar juna a tsakanin addinai da kuma inganta zaman lafiyar ƙasar.

    Shugaban ya bayyana hakan ne a ranar Asabar a Abuja yayin da ya karɓi baƙuncin Archbishop Paul R. Gallagher, sakataren hulɗa da ƙasashe da ƙungiyoyi na Vatican, wanda ya ziyarci shugaban tare da rakiyar ministan harkokin wajen Najeriya, Ambasada Bianca Ojukwu.

    Shugaba Tinubu ya ce tattaunawa domin fahimta juna a tsakanin addinai ita ce hanya mafi dacewa wajen magance ƙalubalen tsaron da ƙasar ke fuskanta.

    Ya shaida wa Archbishop ɗin cewa yana da dadaddiyar kyakkyawar alaƙa da Cocin Katolika tun lokacin da yake gwamnan Jihar Legas. Ya ce yana matuƙar alfahari da gudummawar da Cocin ke bayarwa a fannonin ilimi da kiwon lafiya.

    Tinubu ya kuma shaida wa baƙon cewa rundunar sojin Najeriya ta samu gagarumin ci gaba a baya-bayan nan, sannan ya ƙara da cewa za su ci gaba da ƙoƙari domin tabbatar da nasarar.

    A nasa jawabin, Archbishop Gallagher ya ce ya ziyarci Najeriya ne domin bikin cika shekara 50 da ƙulla hulɗar diflomasiyya tsakanin Najeriya da Cocin Katolika, sannan ya ce Najeriya ƙasa ce mai matuƙar muhimmanci ga Cocin saboda yawan mabiya da kuma ƙarfinta.

    Ya kuma isar da godiyar Paparoma Leo XIV ga Shugaba Tinubu bisa halartar bikin rantsar da shi. Haka kuma ya bayyana jin daɗinsa da irin ci gaban da Jami'ar Veritas, wadda Cocin Katolika ta kafa a Abuja, ta samu.

19. 5 Yuli 2026Waɗanda suka rasu a girgizar ƙasar Venezuela sun haura 3,000

    Gwamnatin Venezuela ta ce adadin mutanen da aka tabbatar sun mutu sakamakon munanan girgizar ƙasar biyu da suka afku a ƙarshen watan da ya gabata a kasar sun kai kusan mutum dubu uku.

    Sai dai wata ƙididdigar da ba ta hukuma ba ta nuna cewa har yanzu sama da mutum dubu 40 ba a san inda suke ba.

    Wakiliyar BBC ta ce, masu aikin ceton gaggawa a arewacin Venezuela na ci gaba da aikin zakulo gawarwaki daga ƙarƙashin baraguzan gine-ginen da suka rushe, a yayin da ake ganin kusan babu sauran fatan gano waɗanda suka tsira.

    Shugaban Majalisar Dokokin Venezuela, Jorge Rodriguez, wanda kuma ɗan'uwan shugabar riƙon ƙwarya ƙasar ne, ya jaddada cewa ana ci gaba da ayyukan ceto a yankunan da bala'in ya shafa.

    Me ya sa girgizar ƙasar Venezuela ta yi muni?

20. 5 Yuli 2026Ranar Litinin za a zagaya da gawar Khamenei domin ban-kwana da ƴan ƙasar

    An ayyana yau Lahadi a matsayin ranar hutu ga daukacin al'ummar Iran ,a yayin da ake ci gaba da shirye shiryen jana'izar jagoran addinin ƙasar da ya rasu, Ayatullah Ali Khamenei.

    Ana sa ran gudanar da addu'oi a kan gawarsa da misalin ƙarfe shida na safe agogon GMT.

    Wakiliyar BBC ta ce a ranar Litinin ana tsammanin za a gudanar da babban taro inda za a zaga da akwatin gawarsa akan titunan birnin Tehran, kuma ana sa rana miliyoyin mutane za su fito domin bankwanda da gawar.

    Ana sa ran binne Ayatullah Ali Khamenei a garinsa na haihuwa, wato Mashhad, a ranar Alhamis.

    Rahotannin kafafen yaɗa labaran Iran sun ce Ayatollah Jafar Sobhani Tabrizi ne zai jagoranci addu'ar Khamenei da za a gudanar a harabar Mosalla da ke Tehran.

    Abin da ya kamata ku sani kan jana'aizar Ayatollah Ali Khamenei