Steven Gerrard: Umutoza wa Aston Villa agiye kudatoza imikino ibiri ya Premier League kubera Covid-19

Umutoza mukuru wa Aston Villa Steven Gerrard ntazatoza imikino ibiri iri imbere yo muri shampiyona ya Premier League nyuma yuko bamusanzemo Covid-19.

Gerrard ntatoza umukino wo kuri iki cyumweru ikipe ye yakiramo Chelsea, n'umukino wo ku wa kabiri izakina kwa Leeds.

Iyi ni inshuro ya kabiri muri uyu mwaka w'imikino Gerrard adashoboye gutoza kubera Covid-19.

Mbere yaho muri uyu mwaka, uyu mutoza w'imyaka 41 byabaye ngombwa ko yishyira mu kato ubwo yari akiri umutoza wa Rangers, ntiyatoza imikino yayihuje na Alashkert na Celtic.

Byabaye ngombwa ko Villa isubika umukino wayo na Burnley ku wa gatandatu ushize kubera ubwandu bwa Covid muri Villa.

Imikino itatu ya Premier League yo kuri iki cyumweru yamaze gusubikwa, iyi ni umukino Liverpool yari kwakiramo Leeds, uwari guhuza Watford kwa Wolves, hamwe n'uwari guhuza Burnley na Everton, kubera coronavirus.

Umukino wa Chelsea na Villa ku kibuga cyayo Villa Park, ni umwe mu mikino itandatu ya Premier League ikiri kuri gahunda ko ikinwa.

Gerrard yamaze imyaka itatu ari umutoza wa Rangers, mbere yuko yerekeza muri Villa nk'umutoza ku itariki ya 11 y'ukwezi kwa cumi na kumwe gusimbura Dean Smith wirukanwe nyuma yo gutsindwa imikino itanu.

Kuva icyo gihe, Villa yatsinze imikino ine muri itandatu ya Premier League imaze gukina, iyo ibiri yatsinzwe ni uwo yakinnye na Manchester City n'umukino yakinnye n'ikipe ya Liverpool yahoze akinira.

Itangazo ry'iyi kipe rigira riti: "Aston Villa ishobora kwemeza ko umutoza mukuru Steven Gerrard atazashobora kwitabira imikino ibiri yacu iri imbere yo muri Premier League izaduhuza na Chelsea na Leeds United kuko azaba arimo kwishyira mu kato nyuma yuko bamusanzemo Covid-19".