Tanzania na Uganda ku mukino wa nyuma wa CECAFA y'abatarengeje imyaka 17 ibera mu Rwanda

Yves Bucyana, BBC Gahuzamiryango, ku Gisenyi

Uganda na Tanzania ni zo zizahatana ku mukino wa nyuma wa CECAFA y'abatarengeje imyaka 17 ibera mu mujyi wa Rubavu mu burengerazuba bw'u Rwanda.

Mu mikino ya ½ yabaye ku cyumweru, Uganda yasezereye biyigoye Djibouti iyitsinze igitego 1 - 0, igitego cyabonetse ku munota wa 90 w'umukino gitsinzwe na Oscar Mawa.

Uyu mukinnyi akaba ari we umaze gutsinda ibitego byinshi muri iri rushanwa, amaze kwinjiza ibitego 6.

Nyuma y'uwo mukino, umutoza wa Uganda Hamza Lutalo yavuze ko Djibouti yabahaye akazi katoroshye mu buryo batari babyiteze.

Yagize ati: "Djibouti batugoye cyane. Ni ibintu tutari twiteze kuko barahindutse cyane. Ubushize ubwo twakiniraga muri Tanzania twari twabatsinze ibitego 8-0, ariko ubu barakina birundiye inyuma cyane".

"Abakinnyi banjye bagize igihunga gikomeye bidusaba guhindura imikinire kuko byabaye ngombwa ko dukina imipira miremire kuko Djibouti batavaga inyuma".

Mu mukino wundi wa ½ , Serengeti Boys ya Tanzania yasezereye Ethiopia kuri za penaliti 4 - 3. Iminota 90 y'umukino yari yarangiye amakipe yombi atsindanye igitego 1 - 1.

Umutoza wa Tanzania Maalim Swalehe avuga ko ari umukino utaboroheye na gato.

Ati: "Umukino wa ½ ni wo wari ingenzi kurenza ibindi byose. Twari twawiteguye cyane kuko twari tuzi ko ari wo utugeza mu mikino ya nyuma y'igikombe cya Afurika. Ni nayo yari intego ya Tanzania".

"Mu gice cya mbere twakinnye neza. Ethiopia twari tuzi neza ubushobozi bwabo uko buhagaze n'aho bafite imbaraga nkeya. Icyo twakoze ni ukubabuza gukina, cyane cyane mu gice cya mbere".

U Rwanda rwavuyemo rugikubita

Tanzania ni yo yari yabaye iya mbere mu itsinda ryarimo n'u Rwanda na Djibouti.

Ikipe y'u Rwanda Amavubi yasezerewe mu mikino yo mu matsinda kuko yarangije ifite inota 1. Yanganyije na Djibouti 0 - 0 mu gihe Djibouti yarangije ifite amanota 2 kuko mu wundi mukino yanganyije na Tanzania 1 - 1.

Imikino iraba nta bafana bari ku kibuga mu rwego rwo kwirinda ikwirakwizwa ry'icyorezo cya coronavirus.

Umukino wa nyuma uteganyijwe ejo ku wa kabiri hagati ya Uganda na Serengeti Boys, zombi zarangije kubona itike yo kuzakina imikino ya nyuma y'igikombe cy'Afurika izabera mu gihugu cya Maroc mu mwaka utaha wa 2021.