TP Mazembe yatangajwe ko ari yo yegukanye igikombe cya shampiyona y’uyu mwaka

TP Mazembe yatangajwe ko ari yo yegukanye igikombe cya shampiyona y'uyu mwaka muri Repubulika ya Demokarasi ya Kongo, nyuma y'isozwa rya shampiyona kubera coronavirus.

Ishyirahamwe ry'umupira w'amaguru muri DR Congo (FECOFA) ryasohoye itangazo rivuga ko ryafashe icyo cyemezo nyuma y'inama yabaye ejo ku wa gatatu.

Shampiyona y'umupira w'amaguru muri DR Congo yari yarahagaze kubera Covid-19, indwara y'ubuhumekero iterwa n'ubu bwoko bushya bwa coronavirus.

Iryo tangazo rya FECOFA rivuga ko TP Mazembe, yari iyoboye urutonde rw'agateganyo rwa shampiyona mbere yuko ihagarikwa, ihawe igikombe cy'uyu mwaka wa 2019/2020 n'amanota 53.

AS Vita Club ni yo yabaye iya kabiri n'amanota 48, nkuko iryo tangazo rikomeza ribivuga.

FECOFA yanemeje ko amakipe abiri ya nyuma ku rutonde rwa shampiyona - OC Bukavu Dawa de Bukavu na AS Nyuki de Butembo - yamanutse mu cyiciro cya kabiri.

Ni mu gihe amakipe ya Jeunesse Sportive de Kinshasa na Etoile Jaune du Katanga yo yazamutse mu cyiciro cya mbere.

FECOFA yanatangaje ko Tout Puissant Mazembe na Vita Club ari yo makipe azahagararira DR Congo muri Champions League nyafurika umwaka utaha.

AS Maniema, ya gatatu ku rutonde rwa shampiyona y'uyu mwaka, yo ikazitabira irushanwa rya CAF Confederation Cup.

TP Mazembe yishimiye iki gikombe cya 18 cya shampiyona yegukanye, ibinyujije ku rubuga rwayo rwa internet.