Herve Renard: Umutoza wa Maroke yeguye nyuma y'igikombe cy'ibihugu bya Afurika
Ahavuye isanamu, Getty Images
Herve Renard yeguye ku mwanya w'umutoza wa Maroke nyuma y'isezererwa imburagihe mu gikombe cy'ibihugu cya Afurika 2019.
Maroke ni kimwe mu bihugu byahabwaga amahirwe mbere y'irushanwa ry'igikombe cy'ibihugu bya Afurika mu Misiri muri 2019 ariko itungurwa na Benin muri kimwe cy'umunani yayisezereye kuri penaliti.
Renard, watwaye igikombe cya Afurika muri 2012 na Cote d''Ivoire muri 2015 yatangiye gutoza Maroke mu kwezi kwa Kabiri 2016.
Uyu mutoza w'Umufaransa w'imyaka 50 yagize ati:
"Harageze ko nsoza iki gice cyirekire kandi cyiza cy'ubuzima bwanjye"
Mu itangazo yacishije ku rubuga nkoranyambaga Renard yavuze ko "ari icyemezo ntakuka cyafashwe mbere y'irushanwa rya 2019.
"Birumvikana ko nafashe iki cyemezo nyuma yo kugitekerezaho neza. Ubwo rero ntigikuka."
Renard yatangiye gutoza Maroke iri ku mwanya wa 81 ku rutonde rw'ishyirahamwe ry'umupira w'amaguru ku isi, FIFA, ayigeza ku mwanya wa 47.
Yabajyanye mu bikombe bibiri bya Afurika ndetse no mu gikombe cy'isi cya 2018 cyabereye mu Burusiya. Ni ku nshuro ya mbere Maroke yari igiye mu irushanwa ry'igikombe cy'isi mu myaka 20.
Icyizere cye cyo gutwara igikombe cy'ibihugu cya Afurika ku nshuro ya gatatu cyaburijwemo mu Misiri, kandi Renard yemeye ko atari wo musaruro yari yiteze.
"Twari twizeye ibirenze mu gikombe cyo mu Misiri cya 2019. Ariko uyu ni umupira w'amaguru. Itanga indoto zikomeye, ariko ikatugarura mu kuri gukomeye ko gukurwamo hakiri kare kuri penaliti."
