Ayavugwa mu mupira w'amaguru i Bulaya ku wa 09.07.2019: Griezmann, Pogba, James, Icardi, Sane, Bakayoko, Gomez

Atletico Madrid yatanguye umugambi w'uguhana umusatirizi w'umufaransa, Antoine Griezmann w'imyaka 28 yitezwe kwimukira muri Barcelona ku giciro c'imiliyoni 107.5 z'amapawundi . (Guardian)

Real Madrid iriko iraraba nimba yogurisha umunyakolombiya, James Rodriguez w'imyaka 27 kugira ngo irabe ko yokwegeranya amahera ashika imiliyoni 150 z'amapawundi ikeneye kugira ngo igure umukinyi wo hagati wa Manchester United Paul Pogba w'imyaka 26. (Mail)

Napoli iripfuza kugura uyo mukinyi James Rodriguez wa Real Madrid, hamwe n'umusatirizi wa Inter Milan, umunya Argentine Mauro Icardi w'imyaka 26. (Goal.com)

Bayern Munich yiteze ko mu ndwi iza, umukinyi wo ku ruhande w'umudagi, Leroy Sane w'imyaka 23 azofata ingingo yo kuva muri Manchester City akijira muri uwo murwi. (Mail)

Umurwi Fenerbahce wo muri Turukiya uriteguye kugura umukinyi w'umudagi Mesut Ozil w'imyaka 30 asanzwe akinira Arsenal. (Fanatik)

Arsenal, Manchester United na Paris St-Germain baripfuza kugura umukinyi wo hagati w'umufaransa, Tiemoue Bakayoko w'imyaka 24, asanzwe akinira Chelsea. (RMC Sport)

West Ham baripfuza gutanga amahera angana n'imiliyoni 43.5 z'amapawundi kuri Maxi Gomez w'imyaka 22 kugira basumvye Valencia mu ntumbero yo kugura uyo musatirizi wa Celta Vigo na Uruguay . (Evening Standard)

Umusatirizi wa Manchester United Romelu Lukaku w'imyaka 26 arizeye ko azoba yamaze kwinjira muri Inter Milan mu gihe uwo murwi uzoba uhura na Man United kw'igenekerezo rya 20 uku kwezi kw'indwi . (Mirror)

Aston Villa yatanze amahera angana n'imiliyoni indwi z'amapawundi kugira ngo irabe ko yogura umunyegori wa Burnley, umwongereza Tom Heaton w'imyaka 33. (Sun)

Arsenal iri mu gushika ku masezerano y'ukugura umukinyi w'inyuma wa Saint-Etienne William Saliba, bikaba vyitezwe ko izotanga imiliyoni 25 z'amapawundi kugira ngo ishobore kuronka uyo mukinyi w'umufaransa w'imyaka 18. (Evening Standard)

Umukinyi w'inyuma ku ruhande rw'ibubamfu mu murwi Liverpool, umunya Espanye Alberto Moreno w'imyaka 27, ari mu kwimukira muri Villarreal. (ESPN)

Liverpool yafashe ikibazo c'ukugumya umusatirizi w'umudagi Divock Origi nk'icihutirwa. Mu gihe uyo mukinyi w'imyaka 24 asigaje umwaka umwe mu masezerano afitaniye na Liverpool, yahawe ayandi masezerano y'igihe kirekire. (Star)

Manchester City iri hafi gushira umukono ku masezerano n'umukinyi w'umwongereza akina hagati muri West Brom, Morgan Rogers w'imyaka 17. (Mail)

Everton iriteguye gutanga imiliyoi 35 z'amapawundi kugira ishobore kugura umukinyi Malcom asanzwe akinira Barcelone, ni mu gihe na Arsenal nayo nyene isanzwe iriko iraraba ko yogura uyo mukinyi w'umunyabrezili w'imyaka 23. (RMC Sport)

Watford iripfuza kugura umukinyi wo ku ruhande, umufaransa Allan Saint-Maximin w'imyaka 22 asanzwe akinira umurwi Nice, ku miliyoni 25 y'amapawundi. (Sky Sports)

Aston Villa iripfuza ko yogumana vy'intizo umukinyi w'inyuma wa Manchester United, Axel Tuanzebe w'imyaka 21, yari amaze umwaka wose w'inkino akinira Aston Villa. (Telegraph)

Umukinyi w'umunya Espanye Ander Herrera w'imyaka 29 ubu yinjiye muri Paris St-Germain avuga ko yavuze muri Manchester United yahora akinira kubera habaye ukutumvikana ku kibanza yahora ahabwa. (Express)