Blinken yatangiye ibiganiro n'abategetsi mu ruzinduko i Beijing

Minisitiri w'ububanyi n'amahanga w'Amerika Antony Blinken arimo guhura i Beijing na Minisitiri w'ububanyi n'amahanga w'Ubushinwa Qin Gang, mu ntangiriro y'ibiganiro by'iminsi ibiri agirana n'abategetsi bo muri icyo gihugu.

Uru ruzindiko ni rwo rwa mbere umudiplomate w'Amerika agiriye mu Bushinwa mu gihe kigera ku myaka hafi itanu ishize.

Abategetsi bo muri Amerika bavuga ko intego y'ingenzi y'ibiganiro ari ugutuma umubano hagati y'ibihugu byombi ubamo umutuzo, uyu mubano ukaba umaze igihe urimo ubushyamirane bukomeye.

Uru ruzinduko rubaye hashize amezi hafi atanu uruzinduko Blinken yari kugirira mu Bushinwa mbere rusubitswe, nyuma yuko igipurizo cy'Ubushinwa gicyekwa ko cyarimo gikora ubutasi kigurukiye mu kirere cy'Amerika.

Amerika imaze igihe igabanya kwitega ko hari byinshi byava muri urwo ruzinduko, ndetse impande zombi zavuze ko zititeze ko hari ikintu gikomeye kigerwaho.

Abategetsi bo muri Amerika bavuga ko intego ari ukongera gufungura imirongo yo kuvugana ku rwego rwo hejuru no gutuma umubano hagati y'impande zombi uzamo umutuzo, nyuma yuko ubaye mubi kubera ibyabaye bijyanye n'icyo gipurizo.

Ubushinwa bwakoreye imyitozo ya gisirikare hafi ya Taiwan. Bufata Taiwan nk'intara imwe mu zigize Ubushinwa. Amerika ifitanye umubano wa hafi na guverinoma ya Taiwan yatowe mu buryo bunyuze muri demokarasi.

Hari gahunda irambuye, irimo n'inama na Minisitiri w'ububanyi n'amahanga w'Ubushinwa Qin Gang n'umutegetsi wo hejuru w'Ubushinwa ushinzwe ububanyi n'amahanga, Wang Yi.

Intambara yo muri Ukraine, ubushyamirane mu bucuruzi bushingiye ku ikoranabuhanga rya mudasobwa riteye imbere, imyitwarire y'Ubushinwa ku burenganzira bwa muntu, ni zimwe mu ngingo uruhande rw'Amerika rwiteze kuganira n'Ubushinwa.

Ubwo bavugaga ku ruzinduko rwa Blinken, abategetsi bo mu Bushinwa bibajije niba Amerika koko ishaka ko umubano hagati w'ibihugu byombi uba mwiza.

Ntibizwi niba Blinken azahura na Perezida w'Ubushinwa Xi Jinping.

Blinken ni we mutegetsi wo hejuru wo muri leta y'Amerika usuye Ubushinwa kuva Perezida Joe Biden yatangira imirimo ye mu kwezi kwa Mutarama (1) mu 2021.

Ku wa gatanu, Blinken yabwiye abanyamakuru ati: "Niba dushaka ko, nkuko tubishaka, ihatana dufitanye n'Ubushinwa ridahinduka intambara, ahantu ho gutangirira ni mu kuvugana".

Nyuma, yavuze ko yizeye guhura na Perezida Xi mu mezi macye ari imbere.

Inama hagati ya Perezida Biden na Perezida Xi Jinping yabereye i Bali muri Indonesia mu kwezi kw'Ugushyingo (11) mu mwaka ushize, yakuyeho by'igihe gito ubwoba bwuko habaho intambara y'ubutita nshya.

Ariko kuva habaho ikibazo cy'igipurizo, kuvugana byo ku rwego rwo hejuru hagati y'abo bategetsi byabaye imbonekarimwe.