Imvo n'Imvano ku gikombe cy'isi cya 2026: Amahirwe y'amakipe y'Afurika yo kurenga amatsinda angana iki?

Ndabashuhuje mwese abakurikiye BBC, turi ku wa gatandatu tariki ya 13 y'ukwezi kwa gatandatu, mu mwaka wa 2026, ni umwanya w'ikiganiro Imvo n'Imvano.

Turavuga ku gikombe cy'isi, cyane cyane tureba amakipe y'Afurika amahirwe afite yo kurenga byibuze amatsinda.

Afurika ihagarariwe n'amakipe 10, ari yo Maroc, Tunisia, Misiri, Algeria, Cap-Vert, Afurika y'Epfo, Côte d'Ivoire, Sénégal, Repubulika ya Demokarasi ya Congo na Ghana.

Imikino y'igikombe cy'isi yatangiye ku wa kane muri Mexique, umukino ufungura irushanwa Mexique itsinda Afurika y'epfo ibitego 2-0.

Ni irushanwa rya mbere ribereye mu bihugu bitatu, ari byo Mexique, Canada n'Amerika.

Havuzwe byinshi cyane hanengwa imitegurire y'iri rushanwa, ibiciro bihanitse by'amatike yo kwinjira ku bibuga, ibyumba by'amahoteli bihenze n'abangirwa kwinjira muri Amerika, baba abafana, abasifuzi n'abandi bafite akazi gafite aho gahuriye n'imikino y'igikombe cy'isi.

Abatumire muri iki kiganiro ni umutoza w'umupira w'amaguru mu Rwanda Sogonya Hamiss, Iragena Oscarie, umutoza w'ikipe y'u Rwanda y'abari n'abategarugori y'abatarengeje imyaka 17, umutoza w'abazamu mu Burundi Hamidou Hassan, hamwe na Muhire Hassan uri muri Canada, wahoze ari umutoza mu Rwanda.

Iki kiganiro mwagiteguriwe kandi murakigezwaho na Yves Bucyana.