Rwanda: Imvo n'Imvano ku kwihangira imishinga mu nkambi y'impunzi ya Mugombwa

Igitondo cyiza mwese abateze amatwi BBC, uyu ni umwanya w’ikiganiro Imvo n’Imvano, none ni ku wa gatandatu tariki ya 16 z’ukwezi kwa 7 umwaka wa 2022. Uyu munsi turi mu nkambi y’impunzi ya  Mugombwa, ni mu karere ka Gisagara mu ntara y’amajyepfo y’u Rwanda.

Ni inkambi icumbikiye impunzi z’Abanyecongo, ikaba ihamaze imyaka 8.

Muri iyi nkambi ni ho hatangirijwe gahunda yo gufasha impunzi kwihangira imishinga mu rwego rwo kwibeshaho. Ni ibikorwa leta y’u Rwanda ivuga ko biri gukwirakwizwa mu nkambi  zose z’impunzi ziri mu Rwanda.

Aha mu nkambi ya Mugombwa turasura imwe mu mishinga  ihari y’ubuhinzi n’ubworozi ndetse n’ubucuruzi hagati mu nkambi. Ni mu gihe umwaka ushize  imiryango ifasha impunzi yagabanyije ku buryo bugaragara imfashanyo y’ibiribwa yageneraga impunzi ziri mu Rwanda.

Nubwo bimeze gutyo ariko iyo mishinga  igera ku mpunzi 300, mu gihe inkambi yose ibarirwamo impunzi zisaga ibihumbi 11, ibintu impunzi zinubira cyane zisaba ko yagera kuri buri umwe wese.

Muri iki kiganiro turaganira n’abagerwaho n’iyo mishinga batubwire icyo ibamariye. Hari  n’impunzi zitagerwaho n’iyo mishinga ndetse imfashanyo y’ibiribwa ikaba yarahagaritswe kuri zo, ese bo babayeho bate?

Iyo mishinga impunzi ziyihuriyeho  n’Abanyarwanda baturiye iyo nkambi basabwe guhara amasambu yabo cyangwa se kuyasaranganya n’impunzi ngo na zo zibone ubutaka bwo guhinga. Ese bo barabivugaho iki?

Ikiganiro ni Imvo n’Imvano, icyo kuri uyu wa gatandatu mwagiteguriwe kandi murakigezwaho na Yves Bucyana.