Imvo n'Imvano ku bahoze mu mitwe irwanya leta y'u Rwanda ubu basubijwe mu buzima busanzwe

Ndabashuhuje mwebwe mwese abateze amatwi BBC, uyu ni umwanya w’ikiganiro Imvo n’Imvano. None ni ku wa gatandatu tariki ya 24 ukwezi kwa cyenda umwaka wa 2022.

Ikiganiro cyacu uyu munsi kiribanda ku buzima bw’abahoze ari abarwanyi mu mitwe itandukanye irwanya leta y’u Rwanda, ubu bamaze gusubizwa mu buzima busanzwe mu Rwanda.

Leta y’u Rwanda ivuga ko kuva ibikorwa byo gutahuka kw’abo bahoze ari abarwanyi no kubasubiza mu buzima busanzwe byatangira mu mwaka wa 2000, abasaga 70,000 (barimo abari abarwanyi n’imiryango yabo) bamaze gusubizwa mu buzima busanzwe, bakaba batuye kandi babanye neza n’abandi Banyarwanda ku misozi aho bari batuye mbere yo mu 1994.

Bimenyerewe ko abatahutse haba ku bushake cyangwa se ku ngufu banyuzwa mu kigo cya Mutobo mu karere ka Musanze mu majyaruguru y’u Rwanda, bakahamara igihe bahabwa inyigisho zitandukanye zigendanye n’ubumwe n’ubwiyunge, n’uburyo bwo kongera gusubira mu muryango nyarwanda nyuma y’igihe kirekire bamaze batari mu gihugu.

Muri ayo mahugurwa kandi bigishwa imyuga ishobora kubafasha mu gihe bari mu buzima busanzwe.

BBC yasuye bamwe na bamwe basubiye mu byaro no ku misozi bahoze batuyemo mbere yo guhunga igihugu – turabaha ijambo.

Leta y’u Rwanda ivuga ko ikomeza gukurikirana abahoze mu mitwe yitwara gisirikare bamaze gusubizwa mu buzima busanzwe, ibashishikariza kwibumbira mu mashyirahamwe kugira ngo bahabwe imfashanyo.

Ndetse ngo n’abadafite imiryango bafite uburyo bitabwaho, bitabuza kandi ko abacyekwaho ko basize bakoze ibyaha bashyikirizwa ubutabera.

Muri iki kiganiro turumva icyo komisiyo ibishinzwe ibivugaho.

Ikiganiro ni Imvo n’Imvano, icyo kuri uyu munsi mwagiteguriwe kandi murakigezwaho na Yves Bucyana.